ହରିୟାଣା ଓ ଦିଲ୍ଲୀର ମୋଷ୍ଟ ଓ୍ୱାଣ୍ଟେଡ୍ ଗ୍ୟାଙ୍ଗଷ୍ଟର ହିମାଂଶୁ ଭାଉକୁ ଆମେରିକାରେ ଗିରଫ କରିଛି ଏଫବିଆଇ। ହରିୟାଣାରୁ ଦିଲ୍ଲୀ ଏବଂ ଉତ୍ତର ପ୍ରଦେଶ ପର୍ଯ୍ୟନ୍ତ ଭାଉ ଏବଂ ତାଙ୍କ ସହଯୋଗୀମାନଙ୍କ ନାଁରେ ହତ୍ୟା, ଅପହରଣ ଏବଂ ଦାଦାବଟି ଆଦାୟ ଭଳି ଅନେକ ମାମଲା ରୁଜୁ ହୋଇଛି। ଏହି କୁଖ୍ୟାତ ଗ୍ୟାଙ୍ଗଷ୍ଟରଙ୍କ ବିରୁଦ୍ଧରେ ଇଣ୍ଟରପୋଲ୍ ନୋଟିସ୍ ମଧ୍ୟ ଜାରି କରାଯାଇଥିଲା। ଗତ ବର୍ଷ ଅଗଷ୍ଟ ମାସରେ ହିମାଂଶୁ ଭାଉ ଗ୍ୟାଙ୍ଗ ଗୁରୁଗ୍ରାମରେ ଏଲଭିଶ ଯାଦବଙ୍କ ଘର ବାହାରେ ହୋଇଥିବା ଗୁଳିକାଣ୍ଡର ମୁଖ୍ୟ ଷଡ଼ଯନ୍ତ୍ର ରଚିଥିଲା। ଏହି ଘଟଣା ପରଠାରୁ ପୋଲିସ ତାକୁ ଖୋଜୁଥିଲା। ଇଣ୍ଟରପୋଲ ମାଧ୍ୟମରେ ଏକ ଲୁକଆଉଟ୍ ନୋଟିସ୍ ମଧ୍ୟ ଜାରି କରାଯାଇଥିଲା। 

ହିମାଂଶୁ ଭାଉ ମାତ୍ର ୧୭ ବର୍ଷ ବୟସରେ ଅପରାଧ ଜଗତରେ ପ୍ରବେଶ କରିଥିଲା । କିଶୋରାବସ୍ଥାରେ ସେ ଏକ ବାଳ ସୁଧାର ଗୃହରେ ମଧ୍ୟ ରହିଥିଲା । ପରେ ଅପରାଧିକ ଗତିବିଧିରେ ତା’ର ନାମ ବାରମ୍ବାର ସାମ୍ନାକୁ ଆସିଥିଲା । ୨୦୨୩ ମସିହାରେ ଇଣ୍ଟରପୋଲ୍ ତା’ ବିରୋଧରେ ରେଡ୍ କର୍ନର ନୋଟିସ୍ ଜାରି କରିଥିବା ସୂଚନା ରହିଛି । ଦିଲ୍ଲୀ ପୋଲିସ, ହରିୟାଣା ପୋଲିସ ଏବଂ ଜାତୀୟ ଅନୁସନ୍ଧାନ ସଂସ୍ଥା (ଏନ୍‌ଆଇଏ) ତା’ ବିରୋଧରେ ବିଭିନ୍ନ ମାମଲାର ତଦନ୍ତ କରୁଥିବା କୁହାଯାଏ । ହତ୍ୟା, ହତ୍ୟା ଉଦ୍ୟମ ଓ ବଟି ଆଦାୟ ଭଳି ସଙ୍ଗିନ ଅଭିଯୋଗ ତା’ ନାମରେ ରହିଛି । ୨୦୨୨ ମସିହାରେ ହରିୟାଣାରେ ୨୪ ଘଣ୍ଟା ମଧ୍ୟରେ ଘଟିଥିବା ତିନୋଟି ହତ୍ୟାକାଣ୍ଡ ଏବଂ ଯୁଟ୍ୟୁବର୍ ଏଲଭିଶ ଯାଦବଙ୍କ ଘର ବାହାରେ ହୋଇଥିବା ଗୁଳିକାଣ୍ଡ ଘଟଣାର ଦାୟିତ୍ୱ ହିମାଂଶୁ ନିଜ ଉପରକୁ ନେଇଥିବା ରିପୋର୍ଟରେ ଉଲ୍ଲେଖ ରହିଛି ।

ହିମାଂଶୁ ଭାଉ ବିଦେଶରୁ ତାର ଗ୍ୟାଙ୍ଗ ପରିଚାଳନା କରୁଥିଲା। ସେ ନୀରଜ ବୱାନା ଗ୍ୟାଙ୍ଗର ନିକଟତର ଏବଂ ଲରେନ୍ସ ବିଷ୍ନୋଇ ଗ୍ୟାଙ୍ଗର ପ୍ରତିଦ୍ୱନ୍ଦ୍ୱୀ।ଦିଲ୍ଲୀର ଛୋଟା ଡନ୍ ଭାବରେ ମଧ୍ୟ ଜଣାଶୁଣା ହିମାଂଶୁ ଭାଉ। ଗ୍ୟାଙ୍ଗଷ୍ଟର ଲରେନ୍ସ ବିଷ୍ନୋଇର ଜଣାଶୁଣା ଶତ୍ରୁ ଭାବେ ପରିଚିତ ହିମାଂଶୁ ଭାଉ। ହିମାଂଶୁର ଘର ହରିୟାଣା ରୋହତକର ରାତୌଲି ଗାଁରେ।  ସେ ବର୍ଷକ ଧରି ଦିଲ୍ଲୀରେ ସକ୍ରିୟ ଥିଲା। ତାର କିଛି ସହଯୋଗୀ ଗତ ଛଅ ମାସ ମଧ୍ୟରେ ଅନେକ ଗୁଳିକାଣ୍ଡ ଘଟାଇଛନ୍ତି।

Powered by Froala Editor