ଭୁବନେଶ୍ୱର : ଶୁକ୍ରବାରଠାରୁ ସମସ୍ତ ସରକାରୀ କାର୍ଯ୍ୟାଳୟଗୁଡ଼ିକ ପୂର୍ଣ୍ଣ କ୍ଷମତାରେ ଚାଲିବାକୁ ଆଦେଶ ହୋଇଛି । ଅର୍ଥାତ ସମସ୍ତ କର୍ମଚାରୀ ଅଫିସ ଆସିବା ବାଧ୍ୟତାମୂଳକ କରାଯାଇଛି । ଏ ନେଇ ସାଧାରଣ ପ୍ରଶାସନ ଓ ଜନ ଅଭିଯୋଗ ବିଭାଗ ପକ୍ଷରୁ ଆଦେଶନାମା ଜାରି ହୋଇଛି । ସମସ୍ତ ସରକାରୀ କର୍ମଚାରୀ ଦୁଇ ଡୋଜ ଟିକା ନେଇ ସାରିଥିବାରୁ ଏଭଳି ନିଷ୍ପତ୍ତି ନିଆଯାଇଥିବା ଆଦେଶନାମାରେ ସ୍ପଷ୍ଟ କରାଯାଇଛି । ଯେଉଁମାନେ ସ୍ୱାସ୍ଥ୍ୟଗତ କାରଣରୁ ଟିକା ନେଇ ପାରି ନାହାନ୍ତି, ସେମାନେ ଘରୁ କାମ କରିବା ପାଇଁ ଆବେଦନ କରିପାରିବେ । ସମ୍ପୃକ୍ତ କର୍ତ୍ତୃପକ୍ଷ ଆବେଦନର ବିଚାର କରି ନିଷ୍ପତ୍ତି ନେବେ । ଟିକା ନେଇସାରିଥିବା କୌଣସି କର୍ମଚାରୀ ଅନୁପସ୍ଥିତ ରହିଲେ ବା ଘରୁ କାମ କଲେ, ତାହାକୁ ସରକାରୀ ଆଦେଶ ଉଲ୍ଲଂଘନ ବୋଲି ଧରାଯିବ । ସମସ୍ତ କର୍ମଚାରୀ କୋଭିଡ ନିୟମ ମାନି କାମ କରିବେ । ଯଦି କେହି ସଂକ୍ରମିତ ହେଲେ, ବିଭାଗୀୟ ପ୍ରୋଟୋକଲ ଅନୁଯାୟୀ କର୍ତ୍ତୃପକ୍ଷ ପଦକ୍ଷେପ ନେବେ ବୋଲି ସ୍ପଷ୍ଟ କରାଯାଇଛି । ଉଲ୍ଲେଖଯୋଗ୍ୟ, ପୂର୍ବରୁ ସମସ୍ତ ସରକାରୀ ଅଫିସ ୫୦ ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରୁଥିଲା । କେବଳ ଜରୁରୀ ସେବା ପାଇଁ ଉଦ୍ଧିଷ୍ଟ କାର୍ଯ୍ୟାଳୟ ପୂର୍ଣ୍ଣ କ୍ଷମତାରେ କାର୍ଯ୍ୟ କରୁଥିଲା । ଏବେ ପରବର୍ତ୍ତୀ ଆଦେଶ ପର୍ଯ୍ୟନ୍ତ ଏହି ଆଦେଶନାମା ବଳବତ୍ତର ରହିବ । ଶନିବାର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବ ।

Powered by Froala Editor