ଭୋପାଳ: ମଧ୍ୟପ୍ରଦେଶର ଅନୁପପୁର ଜିଲାର ସାକାରିଆ ଗାଁରେ ଏକ କୂଅରୁ ଜଣେ ବ୍ୟକ୍ତିଙ୍କ ମୃତଦେହ ବସ୍ତା ଓ କମ୍ବଳରେ ବନ୍ଧା ଅବସ୍ଥାରେ ମିଳିଛି। ପ୍ରଥମେ ଏକ ସାଧାରଣ ହତ୍ୟା ମାମଲା ପରି ଲାଗୁଥିବା ଏହି ଘଟଣା ପରେ ଏକ ବିଶ୍ୱାସଘାତକତା ଓ ଷଡଯନ୍ତ୍ରର କାହାଣୀ ଭାବେ ସାମ୍ନାକୁ ଆସିଛି।

ମୃତକ ଜଣଙ୍କ ହେଉଛନ୍ତି ୬୦ ବର୍ଷୀୟ ଭୟାଲାଲ ରାଜକ। ଭୟାଲାଲଙ୍କର ତିନିଥର ବିବାହ ହୋଇଥିଲା। ପ୍ରଥମ ପତ୍ନୀ ତାଙ୍କୁ ଛାଡ଼ି ଚାଲିଯାଇଥିଲେ। ଦ୍ୱିତୀୟ ପତ୍ନୀ ଗୁଡ଼ି ବାଈଙ୍କଠାରୁ କୌଣସି ସନ୍ତାନ ନ ଥିଲା। ସନ୍ତାନ ପାଇବା ପାଇଁ ଭୟାଲାଲ ଗୁଡ଼ିଙ୍କ ଛୋଟ ଭଉଣୀ ମୁନ୍ନୀ ଓରଫ ବିମଲାଙ୍କୁ ବିବାହ କରିଥିଲେ, ଯାହାଙ୍କଠାରୁ ତାଙ୍କର ଦୁଇ ସନ୍ତାନ ହୋଇଥିଲା। କିନ୍ତୁ ଏହି ସମ୍ପର୍କ ପଛରେ ଲୁକ୍କାୟିତ ଥିଲା ଏକ ବିପଜ୍ଜନକ ରହସ୍ୟ। ମୁନ୍ନୀଙ୍କର ସ୍ଥାନୀୟ ସମ୍ପତ୍ତି ବ୍ୟବସାୟୀ ନାରାୟଣ ଦାସ କୁଶୱାହା ଓରଫ ଲାଲୁ ସହ ଅବୈଧ ସମ୍ପର୍କ।

ପୋଲିସ ସୂଚନା ଅନୁଯାୟୀ, ମୁନ୍ନୀ ଓ ଲାଲୁଙ୍କ ସମ୍ପର୍କ ଏତେ ଗଭୀର ହୋଇପଡ଼ିଥିଲା ଯେ ସେମାନେ ଭୟାଲାଲଙ୍କୁ ହତ୍ୟା କରିବାକୁ ଯୋଜନା କରିଥିଲେ। ଲାଲୁ ଏହି ହତ୍ୟା ପାଇଁ ଧୀରଜ କୋଲଙ୍କୁ ନିୟୋଜିତ କରିଥିଲେ।

ଅଗଷ୍ଟ ୩୦ ରାତିରେ, ଭୟାଲାଲ ଖଟିଆରେ ଶୋଇଥିବା ବେଳେ ଅଭିଯୁକ୍ତମାନେ ଆକ୍ରମଣ କରିଥିଲେ। ରାତି ପ୍ରାୟ ୨ଟା ବେଳେ ଲାଲୁ ଓ ଧୀରଜ ଲୁଚି ଲୁଚି ଘର ଭିତରେ ପଶି ଲୁହା ରଡ଼ ଦ୍ୱାରା ଭୟାଲାଲଙ୍କ ମୁଣ୍ଡରେ ଆଘାତ କରି ତାଙ୍କୁ ହତ୍ୟା କରିଥିଲେ। ଏହାପରେ ତାଙ୍କ ମୃତଦେହକୁ ଗାଁର କୂଅରେ ଫୋପାଡ଼ି ଦେଇଥିଲେ।

କିନ୍ତୁ ପରଦିନ ସକାଳେ ଦ୍ୱିତୀୟ ପତ୍ନୀ ଗୁଡ଼ି ବାଈ କୂଅରେ କିଛି ଭାସୁଥିବା ଦେଖିଥିଲେ। ତେବେ ଏହା ଭୟାଲାଲଙ୍କ ବନ୍ଧା ମୃତଦେହ ଦେଖି ଗାଁରେ ଆତଙ୍କ ଖେଳିଯାଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି କୂଅରୁ ପାଣି ଖାଲି କରି ଭୟାଲାଲଙ୍କ ମୃତଦେହ ଉଦ୍ଧାର କରିଥିଲେ। ମୃତଦେହ ବ୍ୟବଛେଦରୁ ମୁଣ୍ଡରେ ଗଭୀର ଆଘାତ ଯୋଗୁଁ ମୃତ୍ୟୁ ହୋଇଥିବା ସ୍ପଷ୍ଟ ହୋଇଛି।

Powered by Froala Editor