ପ୍ରଥମ ଭାରତୀୟ ଏନ୍ଜିଓ ଭାବେ ‘ଏଜୁକେଟ୍ ଗାର୍ଲସ୍’କୁ ମାଗାସେସ୍ ପୁରସ୍କାର
୨୦୨୫ ରମଣ ମାଗ୍ସେସେ ପୁରସ୍କାର ଜିତି ଇତିହାସ ସୃଷ୍ଟି କରିଛି ଭାରତର ଅଗ୍ରଣୀ ସ୍ବେଚ୍ଛାସେବୀ ସଂଗଠନ ‘ଏଜୁକେଟ୍ ଗାର୍ଲସ୍ ଗ୍ଲୋବାଲି’। ରାଜସ୍ଥାନରୁ ଆରମ୍ଭ ହୋଇ ଦେଶର ଦୂରଦୂରାନ୍ତ ଗାଁରେ ଝିଅମାନଙ୍କୁ ଶିକ୍ଷା ପ୍ରଦାନ କରୁଥିବା ଏହି ସଂଗଠନର ଅବଦାନକୁ ଏବେ ଅନ୍ତର୍ଜାତୀୟସ୍ତରରେ ସମ୍ମାନିତ କରାଯାଇଛି। ପ୍ରଥମ ଭାରତୀୟ ଏନ୍ଜିଓ ଭାବେ ଏହି ସଂଗଠନ ଇତିହାସ ସୃଷ୍ଟି କରିଛି ।
‘ଏଜୁକେଟ୍ ଗାର୍ଲସ୍’ ରୁଢ଼ିବାଦୀ ଧାରଣାକୁ ଦୂର କରି ଝିଅମାନଙ୍କୁ ଶିକ୍ଷା ମାଧ୍ୟମରେ ସଶକ୍ତ କରିଛି। ୨୦୦୭ରେ ଲଣ୍ଡନ ସ୍କୁଲ ଅଫ୍ଇକୋନୋମିକ୍ସର ସ୍ନାତକ ସାଫିନା ହୁସେନଙ୍କ ଦ୍ୱାରା ପ୍ରତିଷ୍ଠିତ ଏହି ସଂଗଠନ ୧୧ ଲକ୍ଷରୁ ଅଧିକ ଝିଅଙ୍କୁ ଶିକ୍ଷା ପ୍ରଦାନ କରିଛି ଏବଂ ୧.୫୫ କୋଟିରୁ ଅଧିକ ଲୋକଙ୍କ ଜୀବନକୁ ପ୍ରଭାବିତ କରିଛି।
୨୦୨୫ର ଅନ୍ୟ ବିଜେତାମାନଙ୍କ ମଧ୍ୟରେ ମାଳଦ୍ୱୀପର ସାହିନା ଅଲୀ (ପରିବେଶ ସଂରକ୍ଷଣ) ଏବଂ ଫିଲିପାଇନ୍ସର ଫ୍ଲାଭିଆନୋ ଆଣ୍ଟୋନିଓ ଏଲ. ଭିଲାନୁଏଭା (ଗରିବଙ୍କ କଲ୍ୟାଣ) ସାମିଲ ଅଛନ୍ତି। ପୁରସ୍କାର ବିତରଣ ସମାରୋହ ଚଳିତ ବର୍ଷ ନଭେମ୍ବର ୭ ତାରିଖରେ ମାନିଲାର ମେଟ୍ରୋପଲିଟାନ୍ ଥିଏଟର୍ରେ ଅନୁଷ୍ଠିତ ହେବ। ସେଠାରେ ବିଜେତାମାନେ ମେଡାଲ, ପ୍ରମାଣପତ୍ର ଓ ନଗଦ ପୁରସ୍କାର ଗ୍ରହଣ କରିବେ।
Powered by Froala Editor
