ସୁପ୍ରିମକୋର୍ଟରେ ଶୁକ୍ରବାର ଦୁଇଜଣ ବିଚାରପତି ଦାୟିତ୍ୱ ଗ୍ରହଣ କରିଛନ୍ତି। ମୁଖ୍ୟ ବିଚାରପତି ଭୂଷଣ ରାମକୃଷ୍ଣ ଗଭାଇ ଜଷ୍ଟିସ ଆଲୋକ ଆରାଧେ ଏବଂ ଜଷ୍ଟିସ ବିପୁଲ ମନୁଭାଇ ପାଞ୍ଚୋଲିଙ୍କୁ ଶପଥ ପାଠ କରାଇଛନ୍ତି। ଉକ୍ତ ୨ ନୂଆ ବିଚାରପତିଙ୍କ ଶପଥ ସହ ସୁପ୍ରିମକୋର୍ଟରେ ମୋଟ୍‌ ବିଚାରପତିଙ୍କ ସଂଖ୍ୟା ୩୪ରେ ପହଞ୍ଚିଛି। ଏପର୍ଯ୍ୟନ୍ତ ସୁପ୍ରିମକୋର୍ଟରେ ବିଚାରପତିଙ୍କ ପାଇଁ ଅନୁମୋଦିତ ୩୪ଟି ପଦବୀ ମଧ୍ୟରୁ ୨ଟି ଖାଲି ଥିଲା। ଏହି ନିଯୁକ୍ତି ପରେ ସମସ୍ତ ପଦବୀ ପୂରଣ କରାଯାଇଛି।

ବମ୍ବେ ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ ଆଲୋକ ଆରାଧେ ଏବଂ ପାଟନା ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ ବିପୁଲ ଏମ ପାଞ୍ଚୋଲିଙ୍କୁ ସୁପ୍ରିମକୋର୍ଟକୁ ପଦୋନ୍ନତି କରିବା ପାଇଁ ସୁପ୍ରିମକୋର୍ଟ କଲେଜିୟମ ଗତ ୨୫ ତାରିଖରେ ସୁପାରିସ କରିବାର ୪୮ ଘଣ୍ଟା ମଧ୍ୟରେ ଆଇନ ଏବଂ ନ୍ୟାୟ ମନ୍ତ୍ରାଳୟ ଏହି ସୁପାରିସକୁ ଅନୁମୋଦନ ପ୍ରଦାନ କରିଛନ୍ତି।  

ଉଲ୍ଳେଖଯୋଗ୍ୟ,  ଜଷ୍ଟିସ ପଞ୍ଚୋଲିଙ୍କ ନିଯୁକ୍ତି ବିବାଦୀୟ ହୋଇପଡ଼ିଥିଲା। ଜଷ୍ଟିସ ବି ଭି ନାଗରତ୍ନା ପଞ୍ଚୋଲିଙ୍କ ପଦୋନ୍ନତି ବିରୋଧରେ ଅସନ୍ତୋଷ ପ୍ରକାଶ କରି କହିଛନ୍ତି ଯେ ତାଙ୍କ ନିଯୁକ୍ତି ପ୍ରଶାସନ ପ୍ରତି ପ୍ରତିକୂଳ ଏବଂ ଏହା କଲେଜିୟମ ବ୍ୟବସ୍ଥାର ବିଶ୍ବସନୀୟତାକୁ ସଙ୍କଟରେ ପକାଇବ।

ଜଷ୍ଟିସ ଆଲୋକ ଆରାଧେ ଏପର୍ଯ୍ୟନ୍ତ ବମ୍ବେ ହାଇକୋର୍ଟର ମୁଖ୍ୟ ବିଚାରପତି ଥିଲେ। ସେ ମୂଳତଃ ମଧ୍ୟପ୍ରଦେଶ ହାଇକୋର୍ଟରୁ। ସେହି ସମୟରେ ଜଷ୍ଟିସ ବିପୁଲ ମନୁଭାଇ ପାଞ୍ଚୋଲି ପାଟନା ହାଇକୋର୍ଟର ମୁଖ୍ୟ ବିଚାରପତି ଥିଲେ। ତାଙ୍କ ମୂଳ ସ୍ଥାନ ଗୁଜରାଟ ହାଇକୋର୍ଟ। ଭବିଷ୍ୟତରେ ଜଷ୍ଟିସ ପାଞ୍ଚୋଲି ସୁପ୍ରିମକୋର୍ଟର ମୁଖ୍ୟ ବିଚାରପତି ହେବାର ସମ୍ଭାବନା ଅଛି।

Powered by Froala Editor