ପୁରୀ : ପର୍ଯ୍ୟଟନ ବିକାଶରେ ଶିଖର ଛୁଇଁବ ଓଡ଼ିଶା। ସବୁଠୁ ସଶକ୍ତ ପରିଚୟ ସୃଷ୍ଟି କରିବ। ଏଥିପାଇଁ ଓଡ଼ିଶାରେ ପର୍ଯ୍ୟାପ୍ତ ସୁଯୋଗ ରହିଛି ବୋଲି କେନ୍ଦ୍ର ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ କହିଛନ୍ତି। ଶୁକ୍ରବାର ପୁରୀର ସ୍ବସ୍ତି ବିଚ୍ ରିସର୍ଟରେ ୪୦ତମ ଜାତୀୟ ଟୁର୍ ଅପରେଟର ସମ୍ମିଳନୀ ଉଦଘାଟନ କରି ସେ କହିଲେ ଓଡ଼ିଶା ସମେତ ୨୮ ରାଜ୍ୟରେ ପର୍ଯ୍ୟଟନ ଉଦ୍ୟୋଗକୁ ଶିଳ୍ପର ମାନ୍ୟତା ମିଳିଛି।
ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି, ଅଧିକ ବିଦେଶୀଙ୍କୁ ଆକୃଷ୍ଟ କରିବା ପାଇଁ ପରିବେଶ ପର୍ଯ୍ୟଟନ ଓ ଐତିହ୍ୟ ପର୍ଯ୍ୟଟନକୁ ପ୍ରାଥମିକତା ଦିଆଯାଉଛି। କୌଣସି ବିଦେଶୀ ଭାରତ କଥା ଚିନ୍ତାକଲେ ପ୍ରଥମେ ଓଡ଼ିଶା ଆସିବ। ରାଜ୍ୟରେ ୨୫ ହଜାର ହୋଟେଲ ନିର୍ମାଣ ଲକ୍ଷ୍ୟ ରହିଛି। ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦର ସମ୍ପ୍ରସାରଣ କରାଯିବ। ପୁରୀରେ ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନ ବନ୍ଦର ନିର୍ମାଣ କରାଗଲେ ପର୍ଯ୍ୟଟନର ଦ୍ରୁତ ଅଭିବୃଦ୍ଧି ହେବ।
ଭାରତୀୟ ଟୁର୍ ଅପରେଟର ସଂଘ ସଭାପତି ରବି ଗୋସାଇଁ ସମ୍ମିଳନୀରେ ଅଧ୍ୟକ୍ଷତା କରିଥିଲେ। ପୂର୍ବାଞ୍ଚଳ ଅଧ୍ୟକ୍ଷ ଜିତେନ୍ଦ୍ର କୁମାର ମହାନ୍ତି ସ୍ବାଗତ ଭାଷଣ ଏବଂ ରାଜ୍ୟ ଶାଖା ସଭାପତି ଗଗନ ଷଡ଼ଙ୍ଗୀ ଧନ୍ୟବାଦ ଅର୍ପଣ କରିଥିଲେ। ରାଜ୍ୟ ପର୍ଯ୍ୟଟନ ସଚିବ ବଲୱନ୍ତ ସିଂହ, ଛତିଶଗଡ଼ ପର୍ଯ୍ୟଟନ ଉନ୍ନୟନ ନିଗମ ଅଧ୍ୟକ୍ଷ ନିଲୁ ଶର୍ମା, ସମ୍ମିଳନୀ କମିଟି ଅଧ୍ୟକ୍ଷ ସଞ୍ଜୟ ରାଜନ୍ ଆଲୋଚନାରେ ଅଂଶଗ୍ରହଣ କରିଥିଲେ।

Powered by Froala Editor