ଭୁବନେଶ୍ବର: ଦଳୀୟ ଶୋଭାଯାତ୍ରାରୁ ଫେରିବା ସମୟରେ ଆକ୍ରମଣର ଶିକାର ହୋଇଛନ୍ତି ଜୟପୁର ବିଧାୟକ ତାରାପ୍ରସାଦ ବାହିନୀପତି । ପୂର୍ବ ବିବାଦକୁ କେନ୍ଦ୍ର କରି ବିଧାୟକଙ୍କୁ ମାଡ଼ ମାରିଛନ୍ତି କୋରାପୁଟ ଖଲାସି ସଂଘର ପୂର୍ବତନ ସଭାପତି କୃଷ୍ଣ କୁଲଦୀପ । ବିଧାୟକଙ୍କ ପିଏସ୍ ଏବଂ ସହଯୋଗୀଙ୍କ ପ୍ରତି ଆକ୍ରମଣରେ କୃଷ୍ଣ ମଧ୍ୟ ଆହତ ହୋଇଛନ୍ତି । କୃଷ୍ଣଙ୍କ ସ୍ବାସ୍ଥ୍ୟ ପରୀକ୍ଷା ପରେ ପୁଲିସ ଗିରଫ କରି କୋର୍ଟ ଚାଲାଣ କରିଛି । ଉଭୟ ପକ୍ଷରୁ ହୋଇଥିବା ଅଭିଯୋଗକୁ ନେଇ କୋରାପୁଟ ଟାଉନ୍ ଥାନା ପୁଲିସ ଦୁଇଟି ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । 

ଅଗଷ୍ଟ ୧୪ ତାରିଖ ସନ୍ଧ୍ୟାରେ କୋରାପୁଟ ଜିଲ୍ଲା ସଦର ମହକୁମାରେ ଜିଲ୍ଲା କଂଗ୍ରେସ ପକ୍ଷରୁ ‘ଭୋଟ ଚୋର, ଗାଦି ଛୋଡ୍’ ମଶାଲ ଶୋଭାଯାତ୍ରା ଅନୁଷ୍ଠିତ ହୋଇଥିଲା ।  ଶୋଭାଯାତ୍ରା ସରିବା ପରେ ବିଧାୟକ ବାହିନୀପତି ଦଳୀୟ କର୍ମକର୍ତ୍ତାଙ୍କ ସହ ଚାହା ପିଇବାକୁ ଯାଉଥିଲେ । ରାତି ସାଢ଼େ ୮ଟାରେ ବସଷ୍ଟାଣ୍ଡ ପରିସରରେ ଖଲାସି କୃଷ୍ଣ କୁଲଦୀପ ବିଧାୟକଙ୍କ ନିକଟକୁ ଆସି ନମସ୍କାର କରିବା ପରେ ପ୍ରତିକ୍ରିୟାଶୀଳ ହୋଇ ଚାପୁଡ଼ା ମାରିଥିଲେ । ଘଟଣା ପରେ ବିଧାୟକଙ୍କ ପିଏସ୍‌ ସମେତ ସହଯୋଗୀମାନେ କୃଷ୍ଣକୁ କାବୁ କରି କୋରାପୁଟ ଟାଉନ ଥାନା ଜିମା ଦେଇଥିଲେ । ବିଧାୟକଙ୍କ ପିଏସ୍‌ଓ ସୁବ୍ରତ ସାସମଲ କୋରାପୁଟ ଟାଉନ ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ କୃଷ୍ଣଙ୍କୁ ଅଟକ ରଖି ପଚରାଉଚରା କରିଥିଲା । ଅପରପକ୍ଷେ କୃଷ୍ଣ କୁଲଦୀପ ବିଧାୟକ ଏବଂ ତାଙ୍କ ଭାଇଙ୍କ ନାମରେ ପାଲଟା ଏତଲା ଦେଇଛନ୍ତି । 

Powered by Froala Editor