୪୭ ବର୍ଷୀୟା ଘରୋଇ ସହାୟିକାଙ୍କୁ ଦୁଷ୍କର୍ମ ମାମଲାରେ ପୂର୍ବତନ ଏମ୍‌ପି ତଥା ପୂର୍ବତନ ପ୍ରଧାନମନ୍ତ୍ରୀ ଏଚ୍‌.ଡି. ଦେବଗୌଡାଙ୍କ ନାତି ପ୍ରଜ୍ୱଳ ରେବନ୍ନାଙ୍କୁ ବେଙ୍ଗାଲୁରୁର ସ୍ଵତନ୍ତ୍ର କୋର୍ଟ ଶନିବାର ଆଜୀବନ କାରା ଦଣ୍ଡାଦେଶରେ ଦଣ୍ଡିତ କରିଛନ୍ତି। ଗତ ଶୁକ୍ରବାର ଏହି ମାମଲାରେ କୋର୍ଟ ପ୍ରଜ୍ଜ୍ବଳଙ୍କୁ ଦୋଷୀ ସାବ୍ୟକ୍ତ କରି ରାୟ ସଂରକ୍ଷିତ ରଖିଥିଲେ। ବିଚାରପତି ଗଜାନନ ଭଟ୍ଟ ରେବନ୍ନାଙ୍କୁ ଆଜୀବନ କାରାଦଣ୍ଡ ସହିତ ୧୦ ଲକ୍ଷ ଟଙ୍କା ଜରିମାନା ମଧ୍ୟ ଲଗାଇଛନ୍ତି।

ଗତ ବର୍ଷ ଘରୋଇ ସହାୟିକା ପ୍ରଜ୍ୱଳ ରେବନ୍ନାଙ୍କ ବିରୁଦ୍ଧରେ ଚାରିଟି ମାମଲା ରୁଜୁ କରିଥିଲେ। ଶୁକ୍ରବାର ଅଦାଲତ ଏହି ଚାରି ମାମଲାରେ ରେବନ୍ନାଙ୍କୁ ଦୋଷୀ ଘୋଷଣା କରିଛନ୍ତି। ପୀଡିତାଙ୍କ ସମସ୍ତ ଅଭିଯୋଗ ଅଦାଲତରେ ସତ ପ୍ରମାଣିତ ହୋଇଥିଲା। ବିଚାରପତି ସନ୍ତୋଷ ଗଜାନନ ଭଟ୍ଟ ରେବନ୍ନାଙ୍କୁ ଦୋଷୀ ସାବ୍ୟସ୍ତ କରି ଦଣ୍ଡ ଘୋଷଣା କରିଛନ୍ତି।

ଅଭିଯୋଗକାରୀ ପକ୍ଷ ୧୬୩୨ ପୃଷ୍ଠାର ଚାର୍ଜସିଟ ଦାଖଲ କରିଥିଲେ, ଯେଉଁଥିରେ ଇଲେକ୍ଟ୍ରୋନିକ ଓ ଅଣ-ଇଲେକ୍ଟ୍ରୋନିକ ପ୍ରମାଣ ସହ ୧୮୩ଟି ଦଲିଲ ଉପସ୍ଥାପନ କରାଯାଇଥିଲା। ଏହା ସହିତ ପୀଡିତାଙ୍କ ପରିବାର ଓ ୨୬ ଜଣ ସାକ୍ଷୀଙ୍କଠାରୁ ପଚରାଉଚରା କରାଯାଇଥିଲା। ଅଦାଲତ ଏହି ମାମଲାରେ ୨ ମେ’ରୁ ନିରନ୍ତର ଶୁଣାଣି କରି ଶୀଘ୍ର ନିଷ୍ପତ୍ତି ନେବାକୁ ଚେଷ୍ଟା କରିଥିଲେ।

Powered by Froala Editor