ପୂର୍ବତନ ଭାରତୀୟ କ୍ରିକେଟ ଅଧିନାୟକ ସୌରଭ ଗାଙ୍ଗୁଲିଙ୍କ ଜୀବନୀ ଉପରେ ନିର୍ମିତ ଏକ ବାୟୋପିକରେ ଅଭିନୟ କରିବେ ଜାତୀୟ ପୁରସ୍କାର ବିଜେତା ଅଭିନେତା ରାଜକୁମାର ରାଓ । ଏକ ସାକ୍ଷାତକାରରେ ରାଜକୁମାର ଏହି ଖବରକୁ ନିଶ୍ଚିତ କରିଛନ୍ତି।

ଭାରତର ସଫଳ କ୍ରିକେଟ ଅଧିନାୟକମାନଙ୍କ ମଧ୍ୟରୁ ଜଣେ ସୌରଭ ଗାଙ୍ଗୁଲି । ସେ ନିକଟରେ ରାଜକୁମାରଙ୍କ ଚୟନକୁ ସମର୍ଥନ କରିଛନ୍ତି। “ମୁଁ ଭାବୁଛି ସଠିକ୍‌ ବ୍ୟକ୍ତି ଏହା କରୁଛନ୍ତି… ମୁଁ ତାଙ୍କୁ ସବୁ କ୍ଷେତ୍ରରେ ସାହାଯ୍ୟ କରିବି,” ଗାଙ୍ଗୁଲି କହିଛନ୍ତି। ୧୯୯୨ରୁ ୨୦୦୮ ମଧ୍ୟରେ ଭାରତ ପାଇଁ ଖେଳିଥିବା ଏହି ପୂର୍ବତନ ଅଧିନାୟକ ପ୍ରକାଶ କରିଛନ୍ତି ଯେ ଚଳଚ୍ଚିତ୍ରଟି ୨୦୨୬ ଜାନୁଆରୀରେ ଶୁଟିଂ ଆରମ୍ଭ କରିବ ଏବଂ ଡିସେମ୍ବର ୨୦୨୬ରେ ଥିଏଟରରେ ମୁକ୍ତିଲାଭ କରିବ।

ଗାଙ୍ଗୁଲି ଆହୁରି କହିଛନ୍ତି, “ରାଜକୁମାରଙ୍କୁ ଚଳଚ୍ଚିତ୍ର ପାଇଁ ଚୂଡ଼ାନ୍ତ କରାଯାଇଛି। ମୋ ଭୂମିକା ପାଇଁ ତାଙ୍କ ଠାରୁ ଉତ୍ତମ ଆଉ କେହି ନାହାନ୍ତି।” ଏହି ଚଳଚ୍ଚିତ୍ର, ଯାହାର ନାମ ଏପର୍ଯ୍ୟନ୍ତ ଘୋଷଣା ହୋଇନାହିଁ, ଏହାର ନିର୍ଦ୍ଦେଶନା ଦେବେ ବିକ୍ରମାଦିତ୍ୟ ମୋଟଓ୍ୱାନେ।

ଅନ୍ୟପକ୍ଷରେ ରାଜକୁମାର ଏହି ଭୂମିକା ପାଇଁ ଅତ୍ୟନ୍ତ ନର୍ଭସ ଥିବା ସ୍ୱୀକାର କରିଛନ୍ତି। ସାକ୍ଷାତକାର ସମୟରେ ରାଜକୁମାର ତାଙ୍କ ବଙ୍ଗଳା ଭାଷା ଦକ୍ଷତା ପ୍ରଦର୍ଶନ କରି ପ୍ରଶଂସକମାନଙ୍କୁ ଖୁସି କରିଛନ୍ତି। ତାଙ୍କ ପତ୍ନୀ ଅଭିନେତ୍ରୀ ପତ୍ରଲେଖା, ଯିଏ ବଙ୍ଗଳୀ, ତାଙ୍କ ଠାରୁ ସେ ଏହି ଭାଷା ଶିଖିଛନ୍ତି ବୋଲି ମଧ୍ୟ କହିଛନ୍ତି।

Powered by Froala Editor