ରାଜସ୍ଥାନର କୋଟାରେ ଜଣେ ବ୍ୟକ୍ତି ନିଜ ପତ୍ନୀଙ୍କ ଯତ୍ନ ନେବା ପାଇଁ ସ୍ୱେଚ୍ଛାକୃତ ଅବସର ନେଉଥିଲେ । କିନ୍ତୁ ଯେଉଁ ଦିନ ସେ ଅବସର ନେଲେ, ସେହିଦିନ ତାଙ୍କ ପତ୍ନୀଙ୍କର ମୃତ୍ୟୁ ହେଲା । ସ୍ୱାମୀଙ୍କ ବିଦାୟୀ କାଳୀନ ସମ୍ବର୍ଦ୍ଧନା କାର୍ଯ୍ୟକ୍ରମ ପାଇଁ ତାଙ୍କ ଚାରି ପାଖର ପରିବେଶ ବେଶ ଉତ୍ସବ ମୁଖର ଥିଲା। ସମସ୍ତେ ଖୁସି ହୋଇ କାର୍ଯ୍ୟକ୍ରମର ମଜା ନେଉଥିଲେ। କିନ୍ତୁ ଏହି ବିଦାୟକାଳୀନ କାର୍ଯ୍ୟକ୍ରମରେ ହଠାତ ପତ୍ନୀ ଏକ ଚେୟାରରେ ବସିପଡି ଚେତାଶୂନ୍ୟ ହୋଇଯାଇଥିଲେ | ଏହା ପରେ ସେଠାରେ ଉପସ୍ଥିତ ଥିବା ଲୋକମାନେ ତାଙ୍କୁ ଡାକ୍ତରଖାନା ନେଇଥିଲେ। ହେଲେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

ସୂଚନା ମୁତାବକ, ଏହି ଘଟଣା କୋଟାର ଦାଦାବାଡ଼ି ଅଞ୍ଚଳରେ ଘଟିଛି। ଏଠାରେ ରହୁଥିବା ଦେବେନ୍ଦ୍ର କୁମାର ଏକ କମ୍ପାନିରେ ମ୍ୟାନେଜର ଭାବରେ କାମ କରୁଥିଲେ। ତାଙ୍କ ପତ୍ନୀ ଟିନାଙ୍କର ହୃଦ ସମସ୍ୟା ଥିବାରୁ ଦୀର୍ଘ ଦିନ ଧରି ସେ ଏହି ରୋଗ ସହ ସଂଘର୍ଷ କରୁଥିଲେ। ଦେବେନ୍ଦ୍ରଙ୍କୁ ୩ବର୍ଷ ପରେ ଅବସର ନେବାର ଥିଲା। କିନ୍ତୁ ତାଙ୍କ ପତ୍ନୀଙ୍କ ଯତ୍ନ ନେବାକୁ ଦେବେନ୍ଦ୍ର ୩ବର୍ଷ ପୂର୍ବରୁ ସ୍ୱେଚ୍ଛାକୃତ ଅବସର ନେଇଥିଲେ। ଏହି ଅବସରରେ ଦେବେନ୍ଦ୍ରଙ୍କ ବନ୍ଧୁ ଓ ସମ୍ପର୍କୀୟମାନେ ଏକ ଛୋଟ ପାର୍ଟିର ଆୟୋଜନ କରିଥିଲେ । ହେଲେ ପାର୍ଟିରେ ସ୍ୱାମୀଙ୍କ ସହ ଛିଡା ହୋଇ ତାଙ୍କ ସହକର୍ମୀଙ୍କ ସହ ଖୁସି ମନାଉଥିବା ବେଳେ ହଠାତ ଟିନା ମୁଣ୍ଡ ବୁଲାଇ ଦେଉଛି ବୋଲି କହି ଚେୟାରରେ ଆଉଜି ବସି ଯାଇଥିଲେ। ସ୍ୱାମୀ ତାଙ୍କ ପିଠି ଆଉଁସି ଦେବା ସହ କେହି ଟିକିଏ ପାଣି ଆଣି ଦିଅ ବୋଲି କହିଥିଲେ। ଏହି ସମୟରେ ଟିନାଙ୍କୁ କେହି କ୍ୟାମେରାକୁ ଚାହିଁ ସ୍ମିତ ହାସ୍ୟ ଦେବାକୁ କହିଥିଲେ। ସେ ମଧ୍ୟ ସ୍ମିତହାସ୍ୟ ଦେଇ ସାମ୍ନାରେ ରହିଥିବା ଟେବୁଲ ଉପରେ ମୁହଁ ମାଡ଼ି ପଡ଼ି ଯାଇଥିଲେ। ଏହା ପରେ ଟିନାଙ୍କୁ ଡାକ୍ତରଖାନା ନିଆଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ  ।

Powered by Froala Editor