ବଲାଙ୍ଗିର/ପାଟଣାଗଡ଼ : ବଲାଙ୍ଗିର ଜିଲା ପାଟଣାଗଡ଼ର ପାର୍ସଲ ବୋମା ବିସ୍ଫୋରଣ ମାମଲାରେ ପାଟଣାଗଡ଼ ଅତିରିକ୍ତ ଜିଲା ଦୌରାଜଜ୍‌ଙ୍କ ଅଦାଲତରେ ତତ୍କାଳୀନ କ୍ରାଇମ୍‌ବ୍ରାଞ୍ଚ ଆଇଜି ଅରୁଣ ବୋଥ୍ରାଙ୍କ ଦ୍ବିତୀୟ ଥର ସାକ୍ଷ୍ୟ ଗ୍ରହଣ କରାଯାଇଛି। ଶ୍ରୀ ବୋଥ୍ରା ଘଟଣାର ତଦନ୍ତ କରିଥିଲେ। ଅଭିଯୁକ୍ତ ପୁଞ୍ଜିଲାଲ ୟୁଟ୍ୟୁବ ଦେଖି କିପରି ବୋମା ତିଆରି କରିଥିଲେ ତାହାର ଭିଡିଓ ଚିତ୍ର ଅଦାଲତ ଆଜି ଦେଖିଛନ୍ତି। ଏଡିଜି ବୋଥ୍ରା ହେଉଛନ୍ତି ପାର୍ସଲ ବୋମା ବିସ୍ଫୋରଣ ମାମଲାର ୬୦ ନମ୍ବର ସାକ୍ଷୀ। ଅଭିଯୁକ୍ତ ଇଂରାଜୀ ଅଧ୍ୟାପକ ପୁଞ୍ଜିଲାଲ ମେହେର ୟୁଟ୍ୟୁବରୁ ଦେଖି କିପରି ବୋମା ତିଆରି କରିଥିଲେ ତଦନ୍ତ ସମୟରେ ତାହା ବତାଇ ଥିଲେ। ସେ ସମୟର ଭିଡିଓଗ୍ରାଫି କରାଯାଇଥିଲା। ସେହି ଭିଡିଓକୁ ଅଦାଲତରେ ପ୍ରଦର୍ଶନ କରିବାକୁ କ୍ରାଇମବ୍ରାଞ୍ଚ ଓକିଲ ଅନୁମତି ମାଗିଥିଲେ। ଆଜି ଶ୍ରୀ ବୋଥ୍ରା ସାକ୍ଷ୍ୟ ଦେବାକୁ ଆସି ଏହା ଦେଖାଇଥିଲେ। ଏ ସମ୍ପର୍କରେ କ୍ରାଇମବ୍ରାଞ୍ଚ ଓକିଲ ଚିତ୍ତରଞ୍ଜନ କାନୁନଗୋ କହିଛନ୍ତି ଯେ, ଆଜି ଅଦାଲତରେ ସେହି ଭିଡିଓ ଚିତ୍ର ପ୍ରଦର୍ଶନ କରାଯାଇଛି। ଏହା ପରେ ଶ୍ରୀ ବୋଥ୍ରା ସାକ୍ଷ୍ୟ ପ୍ରଦାନ କରିଥିଲେ। ମାମଲାରେ ଆଉ ମାତ୍ର ୨/୩ ଜଣଙ୍କ ସାକ୍ଷ୍ୟ ନିଆଯିବ। ଅନ୍ୟପକ୍ଷରେ ଅଭିଯୁକ୍ତ ପୁଞ୍ଜିଲାଲ ମେହେରଙ୍କ ଓକିଲ ପ୍ରମୋଦ ମିଶ୍ର କହିଛନ୍ତି ଯେ, ତଦନ୍ତ ସମୟର ତଦନ୍ତକାରୀ ଅଧିକାରୀ ଓ ଅଭିଯୁକ୍ତ ମଧ୍ୟରେ ହୋଇଥିବା କଥାବାର୍ତ୍ତାର ଭିଡିଓ ପ୍ରଦର୍ଶନ ପରେ ସାକ୍ଷ୍ୟ ଗ୍ରହଣ କରାଯାଇଛି; କିନ୍ତୁ ମାମଲା ବିଚାରାଧୀନ ଥିବାରୁ ସେ ବାବଦରେ ବିସ୍ତୃତ ସୂଚନା ଦେବା ଉଚିତ ହେବନାହିଁ । ୨୦୧୮ ଫେବ୍ରୁଆରୀ ୨୨ରେ ପାଟଣାଗଡ଼ ସହରର ବ୍ରହ୍ମପୁରାସ୍ଥିତ ଏକ ଘରେ ପ୍ରଚଣ୍ଡ ବିସ୍ଫୋରଣ ହୋଇଥିଲା। ସଦ୍ୟ ବିବାହିତ ଇଂ.ସୌମ୍ୟଶେଖର ସାହୁ, ତାଙ୍କ ପତ୍ନୀ ରୀମା ଓ ସଂପର୍କୀୟ ଆଈ ଜେମାମଣି ଏଥିରେ ଗୁରୁତର ଆହତ ହୋଇଥିଲେ। ଦୀର୍ଘ ଦିନର ଚିକିତ୍ସା ପରେ ରୀମା ସୁସ୍ଥ ହୋଇଥିଲେ। ବାହାଘରେ ଉପହାର ମିଳିଥିବା ପାର୍ସଲ ଖୋଲିବା ସମୟରେ ହୋଇଥିବା ଏହି ବୋମା ବିସ୍ଫୋରଣରେ ସୌମ୍ୟ ଓ ଆଈ ଜେମାମଣିଙ୍କ ମୃତ୍ୟୁ ହୋଇଥିବା ବେଳେ ନବବଧୂ ରୀମା ଗୁରୁତର ଆହତ ହୋଇଥିଲେ। ପାଟଣାଗଡ଼ ପାଖରେ ଥିବା ଭଇଁଷା କଲେଜ ଅଧ୍ୟକ୍ଷ ପଦକୁ ନେଇ ଅଧ୍ୟାପକ ପୁଞ୍ଜିଲାଲ ଓ ଅଧ୍ୟକ୍ଷା ଦାୟିତ୍ବରେ ଥିବା ସୌମ୍ୟଙ୍କ ମା’ଙ୍କ ମଧ୍ୟରେ ଥିବା ତିକ୍ତତାକୁ ନେଇ ପାର୍ସଲ ବୋମା ବିସ୍ଫୋରଣ ପାଇଁ ପୁଞ୍ଜିଲାଲ ଷଡ଼ଯନ୍ତ୍ର ରଚିଥିଲେ ବୋଲି କ୍ରାଇମବ୍ରାଞ୍ଚ ତଦନ୍ତରୁ ଜଣାପଡ଼ିଥିଲା।

Powered by Froala Editor