ଟିଏମ୍ସି କାଉନସିଲର୍ଙ୍କୁ ଗୁଳି କରିବାକୁ ଆସିଥିଲେ, ଫୁଟିଲାନି ଗୁଳି
କୋଲକାତାର କସବା ଅଞ୍ଚଳରେ ତ୍ରୁଣମୂଳ କଂଗ୍ରେସ (ଟିଏମ୍ସି)ର ଜଣେ ନେତାଙ୍କୁ ଜଣେ ସୁଟର୍ ଗୁଳି ଚାଳନା କରିବାକୁ ଉଦ୍ୟମ କରି ବିଫଳ ହୋଇଛନ୍ତି। ଟିଏମ୍ସି ନେତା ଜଣକ ଅଳ୍ପକେ ବର୍ତ୍ତି ଯାଇଛନ୍ତି। ପରବର୍ତ୍ତୀ ସମୟରେ ଦୁର୍ବୃତ୍ତଙ୍କୁ କାବୁ କରିବାରେ ମଧ୍ୟ ସଫଳ ହୋଇଛନ୍ତି ନେତା। ଏହି ଘଟଣାର ପୂରା ଦୃଶ୍ୟ ସିସିଟିଭି ଫୁଟେଜରେ କଏଦ ହୋଇଛି।
ଘଟଣାଟି ଏପରି, କୋଲକାତା ମ୍ୟୁନିସିପାଲିଟି କର୍ପୋରେସନର ୱାର୍ଡ ୧୦୮ର କାଉନସିଲର ସୁଶାନ୍ତ ଘୋଷ ତାଙ୍କ ସ୍କୁଲ ସମ୍ମୁଖରେ ବସିଥିବା ବେଳେ ଦୁଇ ଜଣ ସ୍କୁଟରରେ ପହଞ୍ଚିଥିଲେ। ସେମାନଙ୍କ ମଧ୍ୟରୁ ଜଣେ ବନ୍ଧୁକ ବାହାର କରି ଦୁଇଥର ଗୁଳି ଚଳାଇବାକୁ ଚେଷ୍ଟା କରିଥିଲା। କିନ୍ତୁ ଠିକ୍ ସମୟରେ ବନ୍ଧୁକ କାମ କଲା ନାହିଁ। ବନ୍ଧୁକରୁ ଗୋଟାଏ ବି ଗୁଳି ବାହାରିଲା ନାହିଁ।
ତେବେ ଦୁର୍ବତ୍ତ ଜଣକ ଏହା ଜାଣିପାରି ଖସିଯିବାକୁ ଚେଷ୍ଟା କରିଥିଲେ। ମାତ୍ର କାଉନସିଲର ଘୋଷ ତାଙ୍କୁ ଗୋଡ଼ାଇ ଗୋଡ଼ାଇ ଧରିବାକୁ ଚେଷ୍ଟା କରିଥିଲେ। ସେ ଗାଡ଼ି ପାଖକୁ ଯାଉ ଯାଉ ତାଙ୍କ ଗୋଡ଼ ଖସିଗଲା। ତାଙ୍କୁ ଗାଡ଼ିରେ ଆଣିଥିବା ଯୁବକ ଜଣକ ଗାଡ଼ି ଚଳାଇ ପଳାଇଥିବା ବେଳେ ସେ ସ୍ଥାନୀୟ ଲୋକଙ୍କ ହାତରେ ଧରା ପଡ଼ିଥିଲେ।
ପୁଲିସ ତାଙ୍କୁ ଗିରଫ କରି ତଦନ୍ତ କରୁଛି। ପଚରାଉଚରା ବେଳେ ସେ ଘୋଷଙ୍କୁ ହତ୍ୟା କରିବା ପାଇଁ ମହମ୍ମଦ ଇକବଲ ନାମକ ଜଣେ ବ୍ୟକ୍ତିଙ୍କଠାରୁ ଟଙ୍କା ନେଇଥିବା ସ୍ୱୀକାର କରିଛି।
Powered by Froala Editor
