ଭୁବନେଶ୍ବର : ସରକାରୀ ଚାକିରି ପାଇଁ ହେଉଥିବା ନିଯୁକ୍ତି ପରୀକ୍ଷାରେ ସ୍ବଚ୍ଛତା ଆଣିବା ସକାଶେ ରାଜ୍ୟ ସରକାର ଓଡ଼ିଶା ସାର୍ବଜନୀନ ପରୀକ୍ଷା ଆଇନ-୨୦୨୪ ଆଣିବେ। ଆଗାମୀ ବିଧାନସଭା ଅଧିବେଶନ କାଳରେ ଏହା ଆଗତ କରିବାକୁ ସରକାର ନିଷ୍ପତ୍ତି ନେଇଛନ୍ତି। ବୁଧବାର ଅପରାହ୍ଣରେ ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ଏଥିସମେତ ୮ଟି ପ୍ରସ୍ତାବକୁ ମଞ୍ଜୁରୀ ମିଳିଛି। ମତ୍ସ୍ୟ ଓ ପଶୁସମ୍ପଦ ବିଭାଗର ୫ଟି, ସାଧାରଣ ପ୍ରଶାସନ ବିଭାଗ ଓ ଜଳସମ୍ପଦ ବିଭାଗର ଗୋଟିଏ ଲେଖାଏଁ ପ୍ରସ୍ତାବକୁ କ୍ୟାବିନେଟ୍ ବୈଠକରେ ଅନୁମୋଦନ ମିଳିଥିବା ମୁଖ୍ୟ ଶାସନ ସଚିବ ମନୋଜ ଆହୁଜା ଗଣମାଧ୍ୟମକୁ ସୂଚନା ଦେଇଛନ୍ତି। ପ୍ରାଣୀସମ୍ପଦ ସମୃଦ୍ଧି ଯୋଜନା ଅନ୍ତର୍ଗତ କୁକୁଟ୍ଟ ଉପଯୋଜନା, ମତ୍ସ୍ୟ ଓ ପଶୁସମ୍ପଦ ବିଭାଗ ଅନ୍ତର୍ଗତ ଭିତ୍ତିଭୂମି ବିକାଶ ପାଇଁ ୬୯୬.୨୧କୋଟି ଟଙ୍କା ଖର୍ଚ୍ଚ, ଗୋମାତା ଯୋଜନା, କୁକୁଟ୍ଟ ଉନ୍ନୟନ ଉପଯୋଜନା, ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନା, ଜଳକ୍ଷେତ୍ର ଭିତ୍ତିଭୂମି ଉନ୍ନୟନ କାର୍ଯ୍ୟକ୍ରମକୁ କ୍ୟାବିନେଟ ମଞ୍ଜୁରୀ ଦେଇଥିବା ଶ୍ରୀ ଆହୁଜା କହିଛନ୍ତି।
ବିଭିନ୍ନ ପ୍ରତିଯୋଗିତା ମୂଳକ ପରୀକ୍ଷାରେ ଅନିୟମିତତା ରୋକିବା ପାଇଁ ଓଡ଼ିଶା ସାର୍ବଜନୀନ ପରୀକ୍ଷା ଆଇନ-୨୦୨୪ ବଳରେ ଅଭିଯୁକ୍ତଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ନିଯୁକ୍ତି ପରୀକ୍ଷାରେ ଅନିୟମିତତା କଲେ ଅଭିଯୁକ୍ତଙ୍କୁ ୩ରୁ ୫ବର୍ଷ କାରାଦଣ୍ଡ ସହିତ ୧୦ଲକ୍ଷ ଟଙ୍କା ଜୋରିମାନା ଦେବାକୁ ହେବ। ସେବା ପ୍ରଦାନକାରୀ ସଂସ୍ଥାକୁ ମଧ୍ୟ ଏକ କୋଟି ପର୍ଯ୍ୟନ୍ତ ଟଙ୍କା ଜୋରିମାନା ସହ ଦଣ୍ଡିତ କରାଯିବା ନେଇ ନୂଆ ଆଇନରେ ପ୍ରାବଧାନ ରହିଛି। ସେବା ପ୍ରଦାନକାରୀ ସଂସ୍ଥାଠାରୁ ଆନୁପାତିକ ପରୀକ୍ଷା ଖର୍ଚ୍ଚ ମଧ୍ୟ ଆଦାୟ କରାଯିବ। ଜୋରିମାନା ପୈଠରେ ବିଫଳ ହେଲେ ଭାରତୀୟ ନ୍ୟାୟ ସଂହିତା-୨୦୨୩ର ବ୍ୟବସ୍ଥା ଅନୁସାରେ ଅତିରିକ୍ତ ଜେଲ୍ ଦଣ୍ଡ ବ୍ୟବସ୍ଥା ରହିଛି। ବିଭିନ୍ନ ସରକାରୀ ବିଭାଗରେ ଖାଲି ପଡିଥିବା ପଦ ପାଇଁ ହେଉଥିବା ନିଯୁକ୍ତି ପରୀକ୍ଷାରେ ଅନିୟମିତତା ରୋକିବା ପାଇଁ ଏଭଳି ବ୍ୟବସ୍ଥା ଥିବା ଓଡ଼ିଶା ସାର୍ବଜନୀନ ପରୀକ୍ଷା(ଅନୁଚିତ୍ ସାଧନ ନିବାରଣ) ଆଇନ-୨୦୨୪କୁ କ୍ୟାବିନେଟ୍ ଅନୁମୋଦନ କରିଛି। ଓଡ଼ିଶା ଲୋକସେବା ଆୟୋଗ(ଓପିଏସସି), ଓଡ଼ିଶା କର୍ମଚାରୀ ମନୋନୟନ ଆୟୋଗ(ଓଏସଏସସି), ଓଡ଼ିଶା ଅଧସ୍ତନ କର୍ମଚାରୀ ମନୋନୟନ ଆୟୋଗ(ଓଏସଏସଏସସି), ସେବା ମନୋନୟନ ବୋର୍ଡ(ସର୍ଭିସ ସିଲେକ୍ସନ ବୋର୍ଡ), ଓଡ଼ିଶା ପୁଲିସ ସିଲେକ୍ସନ ବୋର୍ଡ, ଓଡ଼ିଶା ଶିକ୍ଷା(ରାଜ୍ୟ ପାଇଁ ସିଲେକ୍ସନ ବୋର୍ଡ) ରୁଲସ-୧୯୯୨, ଓଡ଼ିଶା ଜେଇଇ ସମେତ ରାଜ୍ୟ ସରକାରଙ୍କ ଦ୍ୱାରା ନିୟୋଜିତ କିମ୍ବା ଗଠିତ ମନୋନୟନ କମିଟି/ଏଜେନ୍ସି ଏବଂ ରାଜ୍ୟ ସରକାରଙ୍କ ଦ୍ୱାରା ନିଯୁକ୍ତି ଏଜେନ୍ସି ଦ୍ୱାରା ପରିଚାଳିତ ସମସ୍ତ ସରକାରୀ ନିଯୁକ୍ତି ପରୀକ୍ଷା ପ୍ରକ୍ରିୟାକୁ ଅଧିକ ସ୍ୱଚ୍ଛ ଓ ପାରଦର୍ଶୀ କରିବାକୁ ଏହି ନୂଆ ଆଇନ ଅଣାଯାଇଛି। ‘ଓଡ଼ିଶା ପବ୍ଲିକ ଏକ୍ସଜାମିନେସନ (ପ୍ରିଭେନ୍ସନ୍ ଅଫ ଅନଫେୟାର ମିନସ) ଆକ୍ଟ-୨୦୨୪’ କାର୍ଯ୍ୟକାରୀ ହେଲେ ସରକାରୀ ଚାକିରି ପାଇଁ ମନୋନୟନ ପରୀକ୍ଷାରେ ମିଥ୍ୟା ପରିଚୟ ପ୍ରଦାନ, ନିର୍ଦ୍ଧାରିତ ସମୟ ପୂର୍ବରୁ ପରୀକ୍ଷା ସଂକ୍ରାନ୍ତ ସୂଚନା ପ୍ରଘଟ, ପରୀକ୍ଷା ହଲ୍ ଭିତରକୁ ଅନଧିକୃତ ଲୋକଙ୍କ ପ୍ରବେଶ ନିଷେଧ ତଥା ବ୍ୟାଘାତ ସୃଷ୍ଟିକୁ ରୋକାଯିବା ସହ ପରୀକ୍ଷାର ଅଖଣ୍ଡତା ବଜାୟ ରଖିବା ପାଇଁ ଏହି ବିଲ୍ ଅଣାଯାଇଥିବା ସରକାରଙ୍କ ପକ୍ଷରୁ କୁହାଯାଇଛି।

‘ଗୋମାତା ଯୋଜନା’କୁ ମଧ୍ୟ କ୍ୟାବିନେଟ ମଞ୍ଜୁରୀ ଦେଇଛି। ଏହି ଯୋଜନାରେ ଗୋରୁଙ୍କଠାରେ ଦେଖାଦେଉଥିବା ବିଭିନ୍ନ ରୋଗ ପାଇଁ ଟିକା ଉତ୍ପାଦନ, ଭ୍ରାମ୍ୟମାଣ ଚିକିତ୍ସା ସେବା ଯୋଗାଇ ଦିଆଯିବ। ଏଥିପାଇଁ ସରକାର ୩ବର୍ଷରେ ପ୍ରାୟ ୩୪୨କୋଟି ଟଙ୍କା ଖର୍ଚ୍ଚ କରିବେ ବୋଲି ଶ୍ରୀ ଆହୁଜା କହିଥିଲେ।
ପ୍ରାଣୀସମ୍ପଦ ସମୃଦ୍ଧି ଯୋଜନା ଅନ୍ତର୍ଗତ କୁକୁଟ୍ଟ ଉନ୍ନୟନ ଉପଯୋଜନାରେ ୫ବର୍ଷରେ ସରକାର ମୋଟ ୧୦୩୧.୧୯କୋଟି ଟଙ୍କା ଖର୍ଚ୍ଚ କରିବେ। ଏହି ଯୋଜନା କାର୍ଯ୍ୟକାରୀ ହେଲେ ୩,୭୩,୯୨୮ଜଣ ଚାଷୀ ଓ ମହିଳା ସ୍ବୟଂ ସହାୟକ ଗୋଷ୍ଠୀ ଉପକୃତ ହୋଇପାରିବେ। ଏଥିସହିତ ବର୍ଷକୁ ୯୫.୫୮ ମେଟ୍ରିକ ଟନ କୁକୁଡା ମାଂସ ଓ ୫.୫ଲକ୍ଷ ଅଣ୍ଡା ଉତ୍ପାଦନ କରିବାକୁ ଲକ୍ଷ୍ୟ ରଖାଯାଇଛି। ମତ୍ସ୍ୟ ଓ ପଶୁପାଳନ ବିଭାଗର ଭିତ୍ତିଭୂମି ବିକାଶ, ଅଫିସ ଗୃହ ନିର୍ମାଣ, ରକ୍ଷଣାବେକ୍ଷଣ ଓ ମରାମତି ବାବଦରେ ୩ବର୍ଷରେ ୬୯୬, ୨୧କୋଟି ଟଙ୍କା ଖର୍ଚ୍ଚ କରାଯିବ। ଉକ୍ତ ଅର୍ଥରେ ଆଗାମୀ ୩ବର୍ଷରେ ବିଭାଗ ପକ୍ଷରୁ ମୋଟ ୬୧୯ଟି ପ୍ରକଳ୍ପ କାର୍ଯ୍ୟକାରୀ କରାଯିବାକୁ ଲକ୍ଷ୍ୟ ରଖାଯାଇଛି। ସେଥିରୁ ୩୧ଟି ମାଛ ବଜାର, ୫୮ଟି ମାଛ ବନ୍ଦର/ମାଛ ଅବତରଣ କେନ୍ଦ୍ର ଓ ଜେଟି ନିର୍ମାଣ, ୧୪୨ଟି ମାଛ ଫାର୍ମ, ୨୬୬ଟି ଅଫିସ ଗୃହ ଓ ୧୧୨ଟି ସ୍ଥାନରେ ଭିତ୍ତିଭୂମି ବିକାଶ କରାଯିବ।
ସେହିପରି ‘ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନା’ରେ ଆସନ୍ତା ୫ବର୍ଷରେ ୬,୬୭,୫୦୦ ମତ୍ସ୍ୟଜୀବୀ ଓ ୭,୩୨,୫୦୦ ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ସହିତ ପ୍ରାୟ ୧୪ଲକ୍ଷ ମତ୍ସ୍ୟଜୀବୀ ଉପକୃତ ହେବେ। ଏହି ଯୋଜନାରେ ସରକାର ମୋଟ ୨୨୩୯କୋଟି ଟଙ୍କା ଖର୍ଚ୍ଚ କରିବେ। ସେଥିରୁ ମାଛ ଚାଷ ପାଇଁ ନୂଆ ପୋଖରୀ ଖୋଳା, ଯାଆଁଳ ଉତ୍ପାଦନ, ଜଳଭଣ୍ଡାରରେ ମତ୍ସ୍ୟ ଉତ୍ପାଦନ ସକାଶେ ପ୍ରୋତ୍ସାହନ,ମତ୍ସ୍ୟ ସମବାୟ ସମିତିଗୁଡିକର ପୁନଃକାର୍ଯ୍ୟକ୍ଷମ, ଖାର ଜଳରେ ନୂତନ ଟାଙ୍କି ଖନନ ସମେତ ୧୭ଟି ଉପଯୋଜନା ଅନ୍ତର୍ଭୁକ୍ତ ରହିଛି। ନୂତନ ଜଳସେଚନ ଭିତ୍ତିଭୂମି ସ୍ଥାପନ ମାଧ୍ୟମରେ ଜଳସେଚନ ସୁବିଧା ପାଇଁ ସର୍ଭେ ଓ ଅନୁସନ୍ଧାନ, ନିର୍ମାଣାଧୀନ ପ୍ରକଳ୍ପଗୁଡିକୁ ନିର୍ଦିଷ୍ଟ ସମୟ ଅବଧି ମଧ୍ୟରେ ଶେଷ କରିବା ଲକ୍ଷ୍ୟରେ ସରକାର ଜଳକ୍ଷେତ୍ର ଭିତ୍ତିଭୂମି ଉନ୍ନୟନ କାର୍ଯ୍ୟକ୍ରମ କରିବେ। ଏହି ଯୋଜନାରେ ଆସନ୍ତା ୫ବର୍ଷରେ ମୋଟ ୯୬୫୨.୨୪କୋଟି ଟଙ୍କା ଖର୍ଚ୍ଚ କରାଯିବ। ଏହି ଯୋଜନା ଦ୍ବାରା ୬୪୩୫ହେକ୍ଟର ସେଚାଞ୍ଚଳର ସୁଦୃଢ଼ କରାଯିବା ସହିତ ରାଜ୍ୟରେ ଜଳସେଚନ ବ୍ୟବସ୍ଥାକୁ ବ୍ୟାପକ କରାଯିବ ବୋଲି ମୁଖ୍ୟ ସଚିବ ସୂଚନା ଦେଇଛନ୍ତି।

Powered by Froala Editor