ରାଜ୍ୟରେ ବିଜେପି ସରକାର ଲୋକଙ୍କ ପାଇଁ ନୂଆ ନୂଆ ଘୋଷଣା କରୁଛନ୍ତି । ତେବେ ଏହା ମଧ୍ୟରେ ମହିଳା କର୍ମଚାରୀଙ୍କ ପାଇଁ ମୁଖ୍ୟମନ୍ତ୍ରୀ ଏକ ବଡ଼ ନିଷ୍ପତ୍ତି ଗ୍ରହଣ କରିଛନ୍ତି । ଏଣିକି ରାଜ୍ୟର ମହିଳା କର୍ମଚାରୀମାନେ ପୂର୍ବାପେକ୍ଷା ଅଧିକ ଛୁଟି ପାଇବେ ।

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି ସୂଚନା ଅନୁସାରେ, ରାଜ୍ୟ ସରକାରଙ୍କ ମହିଳା କର୍ମଚାରୀମାନଙ୍କ ଅତିରିକ୍ତ ସାମୟିକ ଛୁଟି(ଆଡସିନାଲ କାଜୁଆଲ ଲିଭ୍‌) ୧୨ଦିନକୁ ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ମହିଳାମାନେ ଏହି ଅତିରିକ୍ତ ଛୁଟି ପ୍ରଚଳିତ ୧୦ଦିନ ସାମୟିକ ଛୁଟି(କାଜୁଆଲ ଲିଭ) ଓ ୫ଦିନ ସ୍ୱତନ୍ତ୍ର ସାମୟିକ ଛୁଟି(ସ୍ପେଶାଲ ଲିଭ୍‌) ସହ ପାଇପାରିବେ ।

ଏହି ୧୨ ଦିନର ଛୁଟି ସେମାନେ ପ୍ରତି ମାସରେ ଗୋଟିଏ ଦିନ ପାଇ ପାରିବେ । ମହିଳାମାନଙ୍କର ମାସିକ ଧର୍ମ ଜନିତ କାରଣରୁ ଏହି ଅତିରିକ୍ତ ଛୁଟି ପ୍ରଦାନ କରାଯାଇଛି । ପୂର୍ବରୁ ମହିଳା କର୍ମଚାରୀଙ୍କ ପାଇଁ ୧୦ ଦିନ ଅତିରିକ୍ତ ସାମୟିକ ଛୁଟି ରହିଥିଲା । ମୁଖ୍ୟମନ୍ତ୍ରୀଙ୍କ ଏହି ଘୋଷଣା ଫଳରେ ରାଜ୍ୟରେ ଅନେକ ମହିଳା କର୍ମଚାରୀ ବିଶେଷ ଭାବେ ଉପକୃତ ହେବେ ।

ସୂଚନାଯୋଗ୍ୟ, ରାଜ୍ୟର ପୂର୍ବ ବିଜେଡି ସରକାର ମହିଳାମାନଙ୍କୁ ସେମାନଙ୍କ ମାସିକ ଧର୍ମ ପାଇଁ ଅତିରିକ୍ତ ୧୦ଦିନ ସାମୟିକ ଛୁଟି ଦେବାକୁ ନିଷ୍ପତ୍ତି ନେଇଥିଲେ ଓ ୨୦୨୪ ମାର୍ଚ୍ଚ ୧୨ତାରିଖରେ ଅର୍ଥ ବିଭାଗ ଏନେଇ ବିଧିବଦ୍ଧ ବିଜ୍ଞପ୍ତିି ଜାରି କରିଥିଲା । ଅର୍ଥାତ୍ ମହିଳାମାନେ ବର୍ଷକୁ ୨୫ଦିନ ଛୁଟି ପାଇପାରୁଥିଲେ । ତେବେ ଗତ ଅଗଷ୍ଟ ୧୫ତାରିଖରେ ବର୍ତ୍ତମାନର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ରାଜ୍ୟର ଉଭୟ ସରକାର ଓ ବେସରକାରୀ ମହିଳା କର୍ମଚାରୀମାନଙ୍କୁ ମାସିକ ଧର୍ମ ସମୟରେ ଗୋଟିଏ ଦିନ ସବୈତନିକ ଛୁଟି ମିଳିବ ବୋଲି ଘୋଷଣା କରିଥିଲେ ।

Powered by Froala Editor