ଥମୁନି ଝାଡ଼ାବାନ୍ତି, କଲ୍ୟାଣସିଂହପୁରରେ ୪ ମୃତ
ରାୟଗଡ଼ାର କାଶୀପୁର, ମୁନିଗୁଡ଼ାରେ ଝାଡାବାନ୍ତି ଅଣାୟତ ସ୍ଥିତି ସୃଷ୍ଟି କରିଛି । ପୁଣି କଲ୍ୟାଣସିଂହପୁରରେ ସଂକ୍ରମଣ ବ୍ୟାପିଛି ବୋଲି ସୂଚନା ଆସିଛି । କାରଣ କଲ୍ୟାଣସିଂହପୁରରେ ଝାଡାବାନ୍ତିରେ ସପ୍ତାହକରେ ୪ ଜଣଙ୍କ ମୃତ୍ୟୁ ଘଟିସାରିଲାଣି । ୩୦ରୁ ଅଧିକ ଆକ୍ରାନ୍ତଙ୍କ ଚିକିତ୍ସା ଡିଏଚଏଚ୍, କଲ୍ୟାଣସିଂହପୁର ଡାକ୍ତରଖାନା ସହ ପ୍ରଭାବିତ ଲାମ୍ବେରି ଗାଁରେ ଚାଲିଛି ।
ଗତ ୧୦ ତାରିଖରେ ଲାମ୍ବେରିରେ ଝାଡ଼ାବାନ୍ତି ବ୍ୟାପିଥିବା ଜଣାପଡିଥିଲା । ୭ ଦିନରେ ମୋଟ ୪ ଜଣଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ୩୦ରୁ ଅଧିକ ଗୁରୁତର ରହିଛନ୍ତି । ଘଟଣା ସମ୍ପର୍କରେ ବିଳମ୍ବରେ ଜଣାପଡିବା ପରେ ପହଞ୍ଚିଥିଲା ଡାକ୍ତରୀ ଟିମ୍ । ଟିମ୍ ଦ୍ୱାରା ରକ୍ତ ନମୁନା ସଂଗ୍ରହ କରାଯାଇଛି । ଝାଡ଼ାବାନ୍ତି କାହିଁକି ବ୍ୟାପିଛି ତାହା ସ୍ପଷ୍ଟ ହୋଇନି । ତଥାପି ଦୂଷିତ ପାଣି ଯୋଗୁ ଏହା ବ୍ୟାପିଥିବା କୁହାଯାଉଛି । ନମୁନା ପରୀକ୍ଷଣ ପରେ ପ୍ରକୃତ କାରଣ ଜଣାପଡ଼ିବ ବୋଲି ଡାକ୍ତରୀ ଟିମ୍ କହିଛି ।
ଏଏନଏମ୍, ଅଙ୍ଗନବାଡି ଏବଂ ଆଶାକର୍ମୀ ରକ୍ତ ନମୁନା ସଂଗ୍ରହ କରିଛନ୍ତି । ଗୁରୁତରଙ୍କ ମଧ୍ୟରୁ କଲ୍ୟାଣସିଂହପୁର ସିଏଚ୍ସିକୁ ୪, ଡିଏଚଏଚ୍କୁ ୩ ଜଣଙ୍କୁ ସ୍ଥାନାନ୍ତର କରାଯାଇଛି । ଅନ୍ୟମାନଙ୍କ ଚିକିତ୍ସା ଘରମାନଙ୍କରେ କରାଯାଉଛି ।
Powered by Froala Editor
