ନୂଆଦିଲ୍ଲୀ: କେନ୍ଦ୍ର ସରକାର ମହାନଦୀ ଟ୍ରିବୁନାଲର କାର୍ୟ୍ୟକାଳ ୨ବର୍ଷ ବୃଦ୍ଧି କରିବା ପରେ ଆଜି ଏହାର ଖାନୱିଲକରଙ୍କ ଅଧ୍ୟକ୍ଷତାରେ ଗଠିତ ୩ ଜଣିଆ ଖଣ୍ଡପୀଠ ମହାନଦୀ ଜଳବିବାଦ ଟ୍ରିବ୍ୟୁନାଲ୍‌ ଆଜି ୨୧ତମ ଶୁଣାଣି କରିବେ। ଏଥିପୂର୍ବରୁ କ‌ରୋନାର ଦ୍ବିତୀୟ ଲହର ଯୋଗୁଁ ଏପ୍ରିଲ୍‌ ୧୦ ଓ ‌ମେ ୮ ତାରିଖର ଶୁଣାଣିକୁ ସ୍ଥଗିତ ରଖାଯାଇଥିଲା। ଏବେ ବି କ‌ରୋନା କଟକଣା ଜାରି ରହିଥିବାରୁ ଟ୍ରିବ୍ୟୁନାଲ୍‌ ଆଜି ଭର୍ଚୁଆଲ୍‌ରେ ଶୁଣାଣି କରିବେ। ଶୁଣାଣି ପୂର୍ବରୁ ଜୁନ୍‌ ୨୪ରେ ଛତିଶଗଡ଼ ସରକାରଙ୍କ ପକ୍ଷରୁ ପୁଣିଥରେ ମହାନଦୀ ଜଳପ୍ରବାହ ସଂପର୍କିତ ଅଧିକ ତଥ୍ୟ ଲୋଡ଼ାଯାଇଛି। ଆଜିର ଶୁଣାଣି ପରେ ଛତିଶଗ‌ଡ଼ ଦ୍ବାରା ଲେଖାଯାଇଥିବା ପତ୍ରର ରାଜ୍ୟ ସରକାର ଉତ୍ତର ଦେଇପାରନ୍ତି। ଚଳିତ ୨୦୨୦-୨୧ ଅଣମୌସୁମୀ ସମୟରେ ଅର୍ଥାତ (ନଭେମ୍ବରରୁ ମେ) ମାସ ମଧ୍ୟରେ ଓଡିଶାକୁ ୧.୧୮ଏମ୍‌ଏଏଫ୍‌ ଜଳ ଆସିଛି। ପୂର୍ବ ବର୍ଷ ତୁଳନାରେ ଏଥର ଏହାର ପରିମାଣ ହ୍ରାସ ପାଇଛି। ଗତବର୍ଷ ଉକ୍ତ ଋତୁରେ ୧.୭୪ ଏମ୍‌ଏଏଫ୍‌ରୁ ଅଧିକ ପାଣି ମିଳିଥିଲା। ଅଣମୌସୁମୀ ଋତୁରେ ଓଡିଶାକୁ ୧.୭୪ ଏମ୍‌ଏଏଫ୍‌ ଜଳ ଉପଲବ୍ଧ କରିବା ପାଇଁ ମଧ୍ୟବର୍ତ୍ତିକାଳୀନ ଆବେଦନ ରେ ଓଡିଶା ଦାବି କରିଥିଲା । ଚଳିତବର୍ଷ ଜଳ କମି ଥିବାରୁ ଏହି କଥା ରାଜ୍ୟ ପୁଣିଥରେ ଦାବି କରିପାରେ। ଏ ପର୍ୟ୍ୟନ୍ତ ଟ୍ରିବୁନାଲ ଏହାର ରାୟ ଦେଇ ନାହାନ୍ତି। ଅଣମୌସୁମୀ ସମୟରେ ଜଳର ଦାବିନେଇ ଟ୍ରିବ୍ୟୁନାଲ୍‌ ଦୁଇ ରାଜ୍ୟକୁ ଅନେକଥର ସୁଯୋଗ ଦେଇଥିଲେ ମଧ୍ୟ ବର୍ତ୍ତମାନ ସୁଦ୍ଧା କୌଣସି ନିଷ୍କର୍ଷ ବ‌ାହାରିପାରି ନାହିଁ। ୨୦୧୮ ମାର୍ଚ୍ଚ ୧୨ରୁ ଗଠିତ ଟ୍ରିବ୍ୟୁନାଲ୍‌ର ପ୍ରଥମ ୩ବର୍ଷର ଅବଧି ଶେଷ ହୋଇଥିଲେ ମଧ୍ୟ ମୂଳ ମାମଲାର ଶୁଣାଣି ଏ ପର୍ୟ୍ୟନ୍ତ ହୋଇନାହିଁ।

Powered by Froala Editor