ଶିବସେନା ନେତାଙ୍କୁ ରାସ୍ତାରେ ହାଣିଲେ ନିହାଙ୍ଗ ଶିଖ୍
![ଶିବସେନା ନେତାଙ୍କୁ ରାସ୍ତାରେ ହାଣିଲେ ନିହାଙ୍ଗ ଶିଖ୍](https://odishanewslens.com/news_gallery/31089_1720295736.jpg)
ପଞ୍ଜାବର ଲୁଧିଆନାରେ ଜଣେ ଶିବସେନା ତକସାଲି ନେତାଙ୍କ ଉପରେ ନିହାଙ୍ଗ ଶିଖ୍ ଆକ୍ରମଣ କରିଛନ୍ତି। ମଝି ରାସ୍ତାରେ ତକସାଲି ନେତାଙ୍କ ଉପରେ ନିହାଙ୍ଗ ଶିଖ୍ ଖଣ୍ଡାରେ ଅନେକ ଥର ଆକ୍ରମଣ କରିଥିଲେ। ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ଶିଖଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଥିବାରୁ ତାଙ୍କୁ ଆକ୍ରମଣ କରାଯାଇଥିବା ସୂଚନା ରହିଛି। ଏହି ମାମଲାରେ ପୁଲିସ ୨ ଜଣଙ୍କୁ ଗିରଫ କରିଛି। ପୁଲିସ ଆକ୍ରମଣକାରୀଙ୍କୁ ଫତେହଗଡ ସାହିବରୁ ଗିରଫ କରିଛି।
ସୂଚନାନୁଯାୟୀ, ଶିବସେନା ତକସାଲି ନେତା ସନ୍ଦିପ ଥାପର ଶୁକ୍ରବାର ସମ୍ବେଦନା ଟ୍ରଷ୍ଟର ଏକ କାର୍ଯ୍ୟକ୍ରମରେ ସାମିଲ ହେବାକୁ ଆସିଥିଲେ। ଏହି କାର୍ଯ୍ୟକ୍ରମରେ ଯୋଗଦେବା ପରେ ଯେତେବେଳେ ସେ ସିଭିଲ ହସ୍ପିଟାଲର ମୁଖ୍ୟ ଫାଟକ ନିକଟରେ ପହଞ୍ଚିଥିଲେ ସେତେବେଳେ ନିହାଙ୍ଗ ଶିଖ ବେଶରେ ଅଭିଯୁକ୍ତମାନେ ସେଠାରେ ଉପସ୍ଥିତ ଥିଲେ। କେହି କିଛି ବୁଝିବା ପୂର୍ବରୁ ସେମାନଙ୍କ ମଧ୍ୟରୁ ଜଣେ ତୀକ୍ଷ୍ଣ ଖଣ୍ଡା ଦ୍ୱାରା ସନ୍ଦୀପଙ୍କୁ ଆକ୍ରମଣ କରିଥିଲେ। ଏଥିରେ ସେ ଗୁରୁତର ଆହତ ହେବା ପରେ ତଳେ ପଡ଼ିଯାଇଥିଲେ। ଏହାପରେ ଉକ୍ତ ଶିଖ୍ମାନେ ସେଠାରୁ ଫେରାର ହୋଇଯାଇଥିଲେ।
ଘଟଣା ସମୟରେ ଆଖପାଖରେ ଅନେକ ଲୋକ ଉପସ୍ଥିତ ରହିଥିଲେ। ହେଲେ ଅଭିଯୁକ୍ତଙ୍କ ନିକଟକୁ ଯିବାକୁ ସାହସ ଜୁଟାଇ ପାରି ନ ଥିଲେ। ନିହାଙ୍ଗ ଶିଖ୍ ସେଠାରୁ ଚାଲିଯିବା ପରେ ସନ୍ଦିପଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଶିବସେନା ନେତାଙ୍କୁ ପୁଲିସ୍ ସୁରକ୍ଷା ଦେବାକୁ ଆସିବା ସତ୍ତ୍ୱେ ବି ଆକ୍ରମଣକାରୀମାନେ ଆକ୍ରମଣ କରିବାକୁ ପଛାଇ ନଥିଲେ। ଏହି ପୂରା ଘଟଣାର ଭିଡିଓ ସିସିଟିଭିରେ କଏଦ ହୋଇଛି।
Powered by Froala Editor