ଭୁବନେଶ୍ୱର :ସତ୍ୟନଗର ପିପୁଲ୍ସ ଫୋରମ ପକ୍ଷରୁ ଗତ 14 ତାରିଖରୁ ଆରମ୍ଭ ହୋଇଥିବା ତିନି ଦିନିଆ ରଜ ମହୋତ୍ସବ 2024 ଆଜି ବେଶ ଆଡ଼ମ୍ବର ସହକାରେ ଉଦଯାପିତ ହୋଇଯାଇଛି। ସତ୍ୟନଗର ଅଞ୍ଚଳର ଛୋଟ ଛୋଟ ପିଲାମାନଙ୍କ ଉଦ୍ୟମରେ ଆରମ୍ଭ ହୋଇଥିବା ଏହି ଫୋରମ ପକ୍ଷରୁ ଓଡ଼ିଶାର ଗଣପର୍ବ ରଜ ଉତ୍ସବ କୁ ପହିଲି ରଜ ଠାରୁ ବେଶ ଧୂମଧାମ ସହକାରେ ପାଳନ କରାଯାଇଥିଲା। ପ୍ରଥମ ଦିନରେ ରଜ ଦୋଳି ଖେଳିବା ପାଇଁ ଆଖପାଖର ଜନସାଧାରଣ ବେଶ ଉତ୍ସାହର ସହ ସାମିଲ ହୋଇଥିବା ବେଳେ ସନ୍ଧ୍ୟାବେଳେ ଅନୁଷ୍ଠାନ ପକ୍ଷରୁ ବିଭିନ୍ନ ପ୍ରକାର ଖେଳ ଓ ନାଚର ଆୟୋଜନ କରାଯାଇଥିଲା। ସେହିପରି ରଜ ସଂକ୍ରାନ୍ତି ଓ ଶେଷ ରଜରେ ମଧ୍ୟ ଜନସାଧାରଣ ଉତ୍ସାହର ସହ ଭାଗ ନେଇଥିବା ବେଳେ ବିଭିନ୍ନ ପ୍ରତିଯୋଗିତାରେ ଅଂଶ ଗ୍ରହଣ କରି ଉତ୍ସବକୁ ସାଫଲ୍ୟ ମଣ୍ଡିତ କରିଥିଲେ। ଶେଷ ସନ୍ଧ୍ୟାରେ ବିଶିଷ୍ଟ ସମାଜସେବି ତଥା ଜୟ ଓଡ଼ିଶା ଅଧକ୍ଷ ରୁଦ୍ର ସାମାନ୍ତରାୟ ମୁଖ୍ୟ ଅତିଥିଭାବେ ଯୋଗଦେଇ ବିଭିନ୍ନ ପ୍ରତିଯୋଗିତାରେ ବିଜୟୀ ହୋଇଥିବା ପ୍ରତିଭା ମାନଙ୍କୁ ସମ୍ବର୍ଦ୍ଧିତ କରିଥିଲେ। ଏଥି ସହିତ ସତ୍ୟନଗର ପିପୁଲ୍ସ ଫୋରମ ର ଏଭଳି ଉଚ୍ଚାଭିଳାଷୀ କାର୍ଯ୍ୟକୁ ପ୍ରଶଂସା କରିବା ସହ ଭବିଷ୍ୟତରେ ସେମାନେ ଆହୁରି ଆଗକୁ ଯିବାକୁ ଶୁଭେଚ୍ଛା ଜଣାଇଥିଲେ। ଏହି କାର୍ଯ୍ୟକ୍ରମ ରେ ଅଞ୍ଚଳର ପିଲାମାନେ ସୁନ୍ଦର ସାଂସ୍କୃତିକ କାର୍ଯ୍ୟକ୍ରମମାନ ପରିବେଷଣ କରିଥିଲେ।

Powered by Froala Editor