କିଛି ଦିନ ହେଲା ମସଲା ଗୁଣ୍ଡକୁ ନେଇ ବିବାଦ ଦେଖାଦେଇଛି । ମସଲାରେ କୀଟନାଶକ ସହ ଅନ୍ୟ ଦୂଷିତ ଜିନିଷ ମିଶୁଥିବାର ଅଭିଯୋଗ ଆସୁଛି । ଏହା ଭିତରେ ଦିଲ୍ଲୀ ପୁଲିସ ଏକ କମ୍ପାନୀରୁ ୧୫ ଟନ୍ ବିଷାକ୍ତ ମସଲା ଗୁଣ୍ଡ ଜବତ କରିଛି । ଏହି ମସଲାରେ ଯେଉଁସବୁ ଜିନିଷ ମିଶା ଯାଉଥିଲା, ତାହା ଜାଣିବା ପରେ ଗ୍ରାହକ ଚକିତ ହୋଇଯାଇଛନ୍ତି ।

ଉତ୍ତରପୂର୍ବ ଦିଲ୍ଲୀର କରୱାଲ ନଗର ଅଞ୍ଚଳରେ ଥିବା ଦୁଇଟି କାରଖାନାରେ ଏହି ମସଲା ପ୍ରସ୍ତୁତ ହୋଇଛି। ପୁଲିସ ‌ଘଟଣାସ୍ଥଳରୁ ନକଲି ମସଲା ପ୍ରସ୍ତୁତି ପାଇଁ ବ୍ୟବହାର ହେଉଥିବା ପଚା ପତ୍ର, ଚାଉଳ, ନଷ୍ଟ ହୋଇଯାଇଥିବା ମାଣ୍ଡିଆ, କାଠ ଗୁଣ୍ଡ, ଲଙ୍କ‌ା ଡେମ୍ଫ, ଏସିଡ୍‌ ଏବଂ ଖାଦ୍ୟ ଅନୁପଯୋଗୀ ତେଲ ଆଦିକୁ ଜବତ କରିଛି ।

ସୂଚନା ପାଇବା ପରେ ଗତ ୧ ତାରିଖରେ ଚଢ଼ଉ କରାଯାଇଥିଲା। ଚଢ଼ଉ‌ବେଳେ ଅଭିଯୁକ୍ତମାନେ ବିଷାକ୍ତ ସାମଗ୍ରୀ ବ୍ୟବହାର କରି ନକଲି ମସଲା ପ୍ରସ୍ତୁତ କରୁଥିବା ଜଣାପଡ଼ିଛି। ଏହି ଘଟଣାରେ ୩ ଜଣଙ୍କୁ ଗିରଫ କରାଯାଇଛି। ଦିଲୀପ ସିଂହ , ସରଫରାଜ ଏବଂ ଖୁର୍ସିଦ ମଲିକ  ଗିରଫ ହୋଇଛନ୍ତି। ଦିଲୀପ ଓ ସରଫରାଜ କାରଖାନାର ମାଲିକ ବୋଲି ଜଣାଯାଇଛି।

ପ୍ରଥମେ ଗୋଟିଏ କାରଖାନାରେ ଚଢ଼ଉ କରାଯାଇ ଦିଲୀପ ସିଂହ ଏବଂ ସରଫରାଜକୁ ଗିରଫ କରାଯାଇଥିଲା। ଅଧିକ ତଦନ୍ତ କରିବା ପରେ ଆଉ ଏକ ନକଲି ମସଲା ନିର୍ମାଣ ୟୁନିଟ କରୱାଲ ନଗରରେ ମିଳିଥିଲା। ଅଭିଯୁକ୍ତମାନେ ଅପମିଶ୍ରିତ ମସଲାକୁ ସ୍ଥାନୀୟ ବଜାର ଏବଂ ଦିଲ୍ଲୀର ବିକ୍ରେତାମାନଙ୍କୁ ଅସଲି ମସଲା ମୂଲ୍ୟରେ ବିକ୍ରି କରୁଥିଲେ।

Powered by Froala Editor