କଂଗ୍ରେସର ଜାତୀୟ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା ତାଙ୍କ ଭାଇ ରାହୁଲ ଗାନ୍ଧୀଙ୍କୁ ‘ରାଜକୁମାର’ ବୋଲି କହି ଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଡ଼ା ସମାଲୋଚନା କରିଛନ୍ତି। ଏ ସମ୍ପର୍କରେ ରାହୁଲ ଗାନ୍ଧି କିଛି କହୁ ନଥିବା ବେଳେ ଭଉଣୀ ପ୍ରିୟଙ୍କା ଗାନ୍ଧି ଭଦ୍ରା ଏହାର ଜବାବ ଦେଇଛନ୍ତି। ସେ ମୋଦିଙ୍କୁ ଶେହନଶାହ ବା ସମ୍ରାଟ କହିବା ସହ ରାଜମହଲରେ ରହୁଥିବା ଲୋକ କେବେ ହେଲେ ସାଧାରଣ ଲୋକଙ୍କ ପୀଡ଼ାକୁ ବୁଝି ପାରିବେ ନାହିଁ ବୋଲି କହିଛନ୍ତି।

ଗୁଜୁରାଟର ବନାସକାଣ୍ଠାରେ ଏକ ରାଲିରେ ଯୋଗ ଦେଇ ପ୍ରିୟଙ୍କା ଗାନ୍ଧୀ ଅଭିଯୋଗ କରିଛନ୍ତି ଯେ ରାହୁଲ ଗାନ୍ଧୀ ୪ ହଜାର କିଲୋମିଟର ଚାଲିଥିବାବେଳେ ପ୍ରଧାନମନ୍ତ୍ରୀ ମୋଦୀ ତାଙ୍କ ମହଲରେ ବସି ଚାଷୀଙ୍କ ଅସୁବିଧା ବୁଝି ପାରିବେ ନାହିଁ। ପ୍ରିୟଙ୍କା କହିଛନ୍ତି, “ସେ(ପ୍ରଧାନମନ୍ତ୍ରୀ ମୋଦି) ମୋ ଭାଇଙ୍କୁ ଜଣେ ଶେହଜାଦା ବୋଲି କହୁଛନ୍ତି। କିନ୍ତୁ ମୁଁ ତାଙ୍କୁ କହିବାକୁ ଚାହେଁ ଯେ ସେହି ଶେହଜାଦା କନ୍ୟାକୁମାରୀ ଠାରୁ କଶ୍ମୀର ଦୀର୍ଘ ୪ ହଜାର କିମି ରାସ୍ତା ଚାଲିଛନ୍ତି।

ସେ ଲୋକଙ୍କ ସମସ୍ୟା ଶୁଣିବା ପାଇଁ ଚାଲିଥିଲେ। ସେ ଚାଷୀଙ୍କ ଠାରୁ ଆରମ୍ଭ କରି ଶ୍ରମିକମାନଙ୍କୁ ଭେଟି ସେମାନଙ୍କ ସମସ୍ୟା ସମ୍ପର୍କରେ ପଚାରି ବୁଝିଛନ୍ତି। ଏହାର ସମାଧାନ ପାଇଁ କ’ଣ କରାଯାଇ ପାରିବ, ସେକଥା ପଚାରିଛନ୍ତି।

ହେଲେ ଅନ୍ୟପଟେ ରହିଛନ୍ତି ଶେହନଶାହ ନରେନ୍ଦ୍ର ମୋଦି। ସେ ରାଜ ମହଲରେ ରହୁଛନ୍ତି। ଆପଣମାନେ ତାଙ୍କୁ କେବେ ଟିଭିରେ ଦେଖିଛନ୍ତି? ତାଙ୍କ ମୁହଁ ସବୁବେଳେ ଚିକ୍କଣ। ତାଙ୍କର ଦଳା କୁର୍ତ୍ତାରେ ଗୋଟିଏ ହେଲେ ଦାଗ ପାଇବେ ନାହିଁ। ସେଭଳି ଲୋକ କେମିତି ଆପଣଙ୍କ କଷ୍ଟ ଓ କାମକୁ ବୁଝିବେ? ପେଟ୍ରୋଲ ଓ ଡିଜେଲ କେତେ ମହଙ୍ଗା ହେଲାଣି କିମ୍ବା ଚାଷ କାମ କରିବା କେତେ କଷ୍ଟ ହେଲାଣି, ସେ କେମିତି ବୁଝିବେ? ପ୍ରତିଟି ଜିନିଷରେ ଜିଏସ୍‌ଟି ଲାଗୁ କରାଯାଇଛି। ଏବେ ସବୁ କିଛି ମହଙ୍ଗା ହୋଇଗଲାଣି। ଏସବୁ କିଛି ବି ମୋଦିଜୀ ବୁଝିପାରିବେ ନାହିଁ। ସେ ତାଙ୍କ ରାଜ ମହଲରେ ରହୁଛନ୍ତି।

Powered by Froala Editor