ମହାରାଷ୍ଟ୍ରରେ ଲୋକସଭା ନିର୍ବାଚନ ପାଇଁ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଅଜିତ ପାୱାର ଗୋଷ୍ଠୀ) ନିଜର ପ୍ରାର୍ଥୀଙ୍କ ନାମ ଘୋଷଣା କରିଛି। ଦଳ ସୁନୀଲ ତଟକରେଙ୍କୁ ରାୟଗଡ଼ ଲୋକସଭା ଆସନରୁ ପ୍ରାର୍ଥୀ କରିଛି। ଅଜିତ ପାୱାରଙ୍କ ପତ୍ନୀ ସୁନେତ୍ରା ପାୱାରଙ୍କୁ ବାରାମତିରୁ ଟିକେଟ ଦିଆଯାଇଛି । ସୁନେତ୍ରା ପ୍ରାର୍ଥୀ ହେବା ପରେ ବାରାମତିରେ ଏବେ ନଣନ୍ଦ-ଭାଉଜଙ୍କ ମଧ୍ୟରେ ଲଢ଼େଇ ହେବ। କାରଣ ସୁପ୍ରିୟା ହେଉଛନ୍ତି ଅଜିତ ପାୱାରଙ୍କ ସମ୍ପର୍କୀୟ ଭଉଣୀ ତଥା ଶରଦ ପାୱାରଙ୍କ ଝିଅ।

ସୁନେତ୍ରା ପାୱାର ହେଉଛନ୍ତି ମହାରାଷ୍ଟ୍ର ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ପତ୍ନୀ । ସେ ପ୍ରଥମ ଥର ପାଇଁ ନିର୍ବାଚନ ରଣାଙ୍ଗନରେ ପ୍ରବେଶ କରୁଛନ୍ତି। ସୁନେତ୍ରା ରାଜନୈତିକ ପରିବାରରୁ ଆସିଛନ୍ତି। ତାଙ୍କ ଭାଇ ପଦ୍ମସିଂହ ପାଟିଲ ମହାରାଷ୍ଟ୍ର ସରକାରରେ ମନ୍ତ୍ରୀ ଥିଲେ। ସୁନେତ୍ରାଙ୍କର ଦୁଇ ପୁଅ ଜୟ ଏବଂ ପାର୍ଥ ପାୱାର ଅଛନ୍ତି । ସୁନେତ୍ରା ପାୱାର ସର୍ବଦା ସାମାଜିକ କାର୍ଯ୍ୟରେ ସକ୍ରିୟ ଅଂଶଗ୍ରହଣ କରି ଆସୁଛନ୍ତି। ସେ ଭାରତୀୟ ପରିବେଶ ଫୋରମ ନାମରେ ଏକ ଏନଜିଓ ମଧ୍ୟ ଗଠନ କରିଛନ୍ତି ।

ଏହାପୂର୍ବରୁ ଶରଦ ପାୱାରଙ୍କ ଏନସିପି ମହାରାଷ୍ଟ୍ରର ୫ ଲୋକସଭା ଆସନ ପାଇଁ ପ୍ରାର୍ଥୀଙ୍କ ନାଁ ଘୋଷଣା କରିଥିଲା। ବାରାମତିରୁ ପୁଣିଥରେ ସୁପ୍ରିୟା ସୁଲେଙ୍କୁ ଟିକେଟ ମିଳିଛି। ବାରାମତୀ ଲୋକସଭା ଆସନରେ ଶରଦ ପାୱାରଙ୍କ ପ୍ରାଧାନ୍ୟ ରହିଆସିଛି। ଏହି ଆସନ  କଂଗ୍ରେସ ଓ ଏବେ ଏନସିପିର ଗଡ଼ ଭାବେ ଗଣାଯାଇଥାଏ । ଶରଦ ପାୱାର ନିଜେ ୪ ଥର ଏଠାରୁ ସାଂସଦ ହୋଇଛନ୍ତି। ତାଙ୍କ ପରେ ତାଙ୍କ ଝିଅ ସୁପ୍ରିୟା ସୁଲେ ଏଠାରୁ ସାଂସଦ ଅଛନ୍ତି ।

Powered by Froala Editor