କର୍ଣ୍ଣାଟକ ମହିଶୂରର ଅରୁଣ ଯୋଗୀରାଜଙ୍କ ହାତ ତିଆରି ମୂର୍ତ୍ତି ଶ୍ରୀରାମଙ୍କ ମନ୍ଦିରର ଗର୍ଭ ଗୃହରେ ସ୍ଥାପନ କରାଯାଇ ପ୍ରାଣପ୍ରତିଷ୍ଠା ହୋଇଛି। ପ୍ରଭୁଙ୍କ ମୁଖ ଯିଏ ଦେଖୁଛି, ସିଏ କହୁଛି 'ଆହା କି ମନୋରମ।' ଏହି ପାବନ ଉତ୍ସବ ମଧ୍ୟରେ ନିଜକୁ ଧନ୍ୟ ମଣିଛନ୍ତି ମୂର୍ତ୍ତି କାରିଗର ଅରୁଣ। 'ମୁଁ ଦୁନିଆର ସବୁଠୁ ଭାଗ୍ୟବାନ' ବୋଲି ମୂର୍ତ୍ତି କାରିଗର ଜଣକ କହିଛନ୍ତି। ମୋର ପୂର୍ବଜ, ପରିବାର ସଦସ୍ୟ ଏବଂ ପ୍ରଭୁ ରାମଙ୍କ ଆଶୀର୍ବାଦ ସର୍ବଦା ମୋ ପାଖରେ ଅଛି। ବେଳେବେଳେ ମୋତେ ଲାଗୁଛି, ମୁଁ ଯେମିତି ଏକ ସ୍ୱପ୍ନ ରାଇଜରେ ଅଛି।"

ଅଯୋଧ୍ୟା ରାମ ମନ୍ଦିରର 'ପ୍ରାଣ ପ୍ରତିଷ୍ଠା' ବା ସମର୍ପଣ ସମାରୋହ ଶେଷ ହୋଇଛି। ୩ଟି ୫ ବର୍ଷୀୟ ବାଳୁତ ରାମଲାଲାଙ୍କ ଶୈଶବାବସ୍ଥାର ରୂପକୁ ଆଧାର କରି ବିଗ୍ରହ ତିଆରି ହୋଇଥିଲା। ଏହି ତିନିଟି ମୂର୍ତ୍ତି ମଧ୍ୟରୁ  ଅରୁଣ ଯୋଗୀରାଜଙ୍କ ଦ୍ବାରା ନିର୍ମିତ ମୂର୍ତ୍ତି ଗର୍ଭଗୃହରେ ସ୍ଥାପନ ପାଇଁ ଚୟନ ହୋଇଥିବା ‌ବେଳେ  ବାକି ଦୁଇଟିକୁ ମନ୍ଦିରର ଅନ୍ୟ ଯାଗାରେ ସ୍ଥାପନ କରାଯାଇଛି। 

ନବ ନିର୍ମିତ ରାମଙ୍କ ମୂର୍ତ୍ତି ମୁଗୁନି ପଥରରେ ନିର୍ମାଣ କରାଯାଇଛି। ଅତ୍ୟନ୍ତ ମନଲୋଭ ହୋଇଛି ପ୍ରଭୁଙ୍କ ଏହି ବାଲ୍ୟ ରୂପ। ଏକ ପଦ୍ମ ଫୁଲ ମଧ୍ୟରେ ବିରାଜିଛନ୍ତି ପ୍ରଭୁ ଶ୍ରୀରାମ। ଏହି ମୂର୍ତ୍ତିର ଉଚ୍ଚତା ୫୧ ଇଞ୍ଚ ହୋଇଛି। ଏଥିରେ ରାମଙ୍କ ବାଲ୍ୟରୂପ ସମେତ ପ୍ରଭୁ ନାରାୟଣଙ୍କ ଦଶଅବତାର ମଧ୍ୟ ବର୍ଣ୍ଣିତ ହୋଇଛି। ପ୍ରଭୁ ବାମ ହାତରେ ଧନୁ ଏବଂ ଡାହାଣ ହାତରେ ତୀର ଧାରଣ କରିଛନ୍ତି।

Powered by Froala Editor