ନୂଆଦିଲ୍ଲୀ: ହାତରେ ମାତ୍ର ଆଉ ୭ ଦିନ । ଅଯୋଧ୍ୟା ରାମ ମନ୍ଦିରରେ ରାମଲାଲାଙ୍କ ପ୍ରାଣ ପ୍ରତିଷ୍ଠା ସମାରୋହକୁ ନେଇ ଦିନକୁ ଦିନ ଉତ୍ସାହ ବଢିବାରେ ଲାଗିଛି । ଏହି ପ୍ରତିଷ୍ଠା ଉତ୍ସବରେ ଯୋଗ ଦେବା ପାଇଁ ଦେଶବ୍ୟାପୀ ସାଧୁସନ୍ଥକୁ ସାମିଲ ହେବାକୁ ନିମନ୍ତ୍ରିତ କରାଯାଇଛି । ହେଲେ ଏହି କାର୍ୟ୍ୟକ୍ରମରେ ଅଂଶଗ୍ରହଣ କରିବେନି ସନାତନ ଧର୍ମର ୪ ଆଦିପୀଠର ଶଙ୍କରାଚାର୍ୟ୍ୟ । ସେମାନେ ରାମଲାଲାଙ୍କ ପ୍ରାଣପ୍ରତିଷ୍ଠାରେ ଯୋଗ ନଦେବା ପାଇଁ ନିଷ୍ପତ୍ତି ନେଇଛନ୍ତି । ତେବେ ନିମନ୍ତ୍ରଣ ସତ୍ତ୍ବେ କାହିଁକି ଯୋଗଦେବେ ନାହିଁ ସେ ନେଇ ଆଜି ମୁହଁ ଖୋଲିଛନ୍ତି ପୁରୀ ଗୋବର୍ଦ୍ଧନ ମଠର ଶଙ୍କରାଚାର୍ୟ୍ୟ ଜଗଦଗୁରୁ ସ୍ବାମୀ ନିଶ୍ଚଳାନନ୍ଦ ସରସ୍ବତୀ । ପ୍ରାଣପ୍ରତିଷ୍ଠାକୁ ନେଇ ନୀତିର ଉଲ୍ଲଘଂନ କରାଯାଉଥିବାକୁ ଯୋଗଦେବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି ।
ନ୍ୟୁଜ ଏଜେନ୍ସି ଏଏନଆଇକୁ ପ୍ରତିକ୍ରିୟା ଦେଇ ପୁରୀର ଶଙ୍କରାଚାର୍ୟ୍ୟ କହିଛନ୍ତି, "ଶଙ୍କରାଚାର୍ୟ୍ୟଙ୍କର ନିଜସ୍ବ ସମ୍ମାନ ରହିଥାଏ । ଏହାକୁ ଇଗୋ(ଗାରିମା) କୁହାଯାଇ ପାରିବନାହିଁ । ଯେତେବେଳେ ପ୍ରଧାନମନ୍ତ୍ରୀ ବିଗ୍ରହ ସ୍ଥାପନ କରିବେ ଆମେ ବାହାରେ ବସି ତାଳି ମାରିବୁ ? କଣ ଏହା ଆମଠୁ ଆଶା କରାଯାଏ କି ? ଏକ ଧର୍ମନିରପେକ୍ଷ ସରକାରଙ୍କ ଉପସ୍ଥିତିର ଅର୍ଥ ପରମ୍ପରାର ବିନାଶ ନୁହେଁ ।" 
ଏହାପୂର୍ବରୁ ଶନିବାର ଦିନ ମଧ୍ୟ ପ୍ରଶ୍ନ ଉଠାଇଥିଲେ ନିଶ୍ଚଳାନନ୍ଦ । ରାମଲାଲା ଶାସ୍ତ୍ରୀୟ ବିଧି ଅନୁସାରେ ପ୍ରତିଷ୍ଠିତ ହେଉନାହାନ୍ତି, ତେଣୁ ରାମଲାଲାଙ୍କ ପ୍ରତିଷ୍ଠା ଉତ୍ସବରେ ଯୋଗଦେବା ଉଚିତ ନୁହେଁ । ଜଣେ ବ୍ୟକ୍ତିଙ୍କ ସହିତ ଉତ୍ସବକୁ ଆସିପାରିବେ ବୋଲି ନିମନ୍ତ୍ରଣ ଆସିଥିଲା । ଆମନ୍ତ୍ରଣ କିମ୍ବା କାର୍ୟ୍ୟକ୍ରମ ସହିତ ଆମେ ସହମତ ନୁହଁ ବୋଲି କହିଥିଲେ ଶଙ୍କରାଚାର୍ୟ୍ୟ । ସେ ଆହୁରି ମଧ୍ୟ କହିଛନ୍ତି, "ପ୍ରାଣପ୍ରତିଷ୍ଠା ପାଇଁ ଶୁଭ ସମୟକୁ ଧ୍ୟାନରେ ରଖିବା ଉଚିତ । କିଏ ମୂର୍ତ୍ତିକୁ ଛୁଇଁବା ଉଚିତ୍ କିଏ ନୁହେଁ, କିଏ ପ୍ରତିଷ୍ଠା କରିବା ଉଚିତ କିଏ ନୁହେଁ ? ସେ ବିଷୟରେ ପ୍ରଥମ୍ ଜ୍ଞାନ ରଖିବା ଉଚିତ । ସ୍କନ୍ଧ ପୁରାଣରେ ଲେଖା ହୋଇଛି, ଦେବୀଦେବତାମାନଙ୍କ ମୂର୍ତ୍ତିକୁ ଶ୍ରୀମଦ ଭାଗବତରେ ଅରସା ବିଗ୍ରହ କୁହାଯାଏ । ରୀତିନୀତି ଅନୁସାରେ ପ୍ରତିଷ୍ଠା କରାଇଲେ ହିଁ ମୂର୍ତ୍ତିରେ ପ୍ରାଣ ପ୍ରତିଷ୍ଠା ହୋଇଥାଏ । "

Powered by Froala Editor