୩ ଦିନ ଧରି ଲାଗି ରହିଥିବା ଟ୍ରକ୍‌ ଚାଳକଙ୍କ ଆନ୍ଦୋଳନ ହେତୁ ଦେଶର ବିଭିନ୍ନ ସ୍ଥାନରେ ତେଲ ଟାଙ୍କି ସମ୍ମୁଖରେ ଲାଗି ରହିଥିଲା ଅସମ୍ଭବ ଭିଡ଼ । ଧର୍ମଘଟ ଯୋଗୁଁ ଦେଶର ଅନେକ ସ୍ଥାନରେ ପେଟ୍ରୋଲ ଏବଂ ଡିଜେଲ ପରିବହନ ହୋଇପାରି ନ ଥିଲା। ଏପରିକି ବହୁ ସ୍ଥାନରେ ଘଣ୍ଟା ଘଣ୍ଟା ଛିଡ଼ା ହେବା ପରେ ବି ଲୋକେ ଖାଲି ହାତରେ ଫେରୁଥିଲେ। ଏହି ସମୟରେ ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ଜୋମାଟୋ ଡେଲିଭରି ବୟ ବାଇକ ବଦଳରେ ଘୋଡା ଚଢ଼ି ଲୋକଙ୍କ ଘରେ ଖାଦ୍ୟ ଯୋଗାଉଛନ୍ତି। ଏହି ଭିଡିଓ ଯେତିକି ମଜାଦାର, ସେଥିରେ ଥିବା ୟୁଜରଙ୍କ ମନ୍ତବ୍ୟଗୁଡିକ ମଧ୍ୟ ମଜାଳିଆ ରହିଛି ।

ଏପରି ଏକ ଘଟଣା ହାଇଦ୍ରାବାଦରେ ଦେଖିବାକୁ ମିଳିଛି। ଭିଡିଓରେ ଜୋମାଟୋ ଡେଲିଭରି ବୟ କାନ୍ଧରେ ବ୍ୟାଗ ଧରି ରାସ୍ତାରେ ଘୋଡା ଚଢ଼ି ଯାଉଥିବାର ନଜର ଆସିଛନ୍ତି। ଜୋମାଟୋ ବୟ ରାସ୍ତାରେ ଘୋଡା ଚଢ଼ି ଯାଉଥିବା ଦେଖି ହଠାତ ଲୋକମାନେ ଆଶ୍ଚର୍ଯ୍ୟ ହୋଇ ଯାଇଥିଲେ। ଏହି ଲୋକମାନଙ୍କ ମଧ୍ୟରୁ ଜଣେ ଏହି ଘଟଣାର ଏକ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ପୋଷ୍ଟ କରିଥିଲେ। ଏହା ପରେ ଭିଡିଓଟି ଶୀଘ୍ର ଇଣ୍ଟରନେଟରେ ଭାଇରାଲ ହୋଇଥିଲା।

ଏ ନେଇ ସମ୍ପୃକ୍ତ ଜୋମାଟୋ ବୟଙ୍କୁ ଜଣେ ପଥଚାରୀ ପଚାରିବାରୁ ଖାଦ୍ୟ ଅର୍ଡର ଧରି ବାହାରିବାର ୩ ଘଣ୍ଟା ପର୍ଯ୍ୟନ୍ତ ପେଟ୍ରୋଲ ପମ୍ପ ସମ୍ମୁଖରେ ଛିଡ଼ା ହେଲି। ମାତ୍ର ପେଟ୍ରୋଲ ପାଇଲି ନାହିଁ। ଏହାପରେ ଘୋଡ଼ା ଧରି ଅର୍ଡର ଡେଲିଭରି କରିବାକୁ ବାହାରିଥିବା ସେ କହିଛନ୍ତି।

ଜଣେ ୟୁଜର ଭିଡିଓ କମେଣ୍ଟରେ ଲେଖିଛନ୍ତି, ଏଭଳି ଚମତ୍କାର ଲୋକ କେବଳ ଭାରତରେ ଦେଖିବାକୁ ମିଳନ୍ତି। ଅନ୍ୟ ଜଣେ ୟୁଜର ଲେଖିଛନ୍ତି ମୋ ଦେଶ ବଦଳୁଛି। କିଛି ୟୁଜର ଏହି ଘଟଣାକୁ ଏକ ଶୋ ଗେମ ବୋଲି କହିଛନ୍ତି। କିଛି ଲୋକ ଏପରିକି କହିଛନ୍ତି ଜୋମାଟୋ ବୟ ପ୍ରସିଦ୍ଧ ହେବା ପାଇଁ ଏସବୁ କରୁଛନ୍ତି।’

Powered by Froala Editor