ସାର କମ୍ପାନୀ କାରଖାନାରୁ ‘ଆମୋନିଆ ଗ୍ୟାସ୍’ ଲିକ୍; ୧୨ ଅସୁସ୍ଥ
ଏନ୍ନୋର୍: ଗତରାତିରେ ତାମିଲ୍ନାଡୁର ଏନ୍ନୋର୍ସ୍ଥିତ ଏକ ଘରୋଇ ସାର କମ୍ପାନୀର କାରଖାନାରୁ ‘ଆମୋନିଆ’ ଗ୍ୟାସ୍ ଲିକ୍ ହେବାରୁ ଅସୁସ୍ଥ ହୋଇପଡ଼ିଥିବା ପ୍ରାୟ ୧୨ଜଣ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବା କଥା ପୁଲିସ କହିଛି।
ଘଟଣାଟି ସାର ଉତ୍ପାଦନକାରୀ କମ୍ପାନି ‘କରମଣ୍ଡଳ ଇଣ୍ଟର୍ନ୍ୟାସ୍ନାଲ୍ ଲିମିଟେଡ୍’ରେ ଘଟିଛି। ‘ଆମୋନିଆ’ ଗ୍ୟାସ୍କୁ ଉକ୍ତ କମ୍ପାନି କଞ୍ଚାମାଲ୍ ଭାବେ ବ୍ୟବହାର କରେ।ପାଇପ୍ରୁ ‘ଆମୋନିଆ’ ଗ୍ୟାସ୍ ଲିକ୍ ହେଉଥିବା ଖବର ରାତି ୧୨.୪୫ରେ କମ୍ପାନିରୁ ପାଇଥିବା କଥା ସରକାରୀ ଅଧିକାରୀମାନେ କହିଛନ୍ତି। ପାଇପ୍ଲାଇନ୍ ‘ପ୍ରି-କୁଲିଙ୍ଗ୍’ କରାଯାଉଥିବା ବେଳେ ଗ୍ୟାସ୍ ଲିକ୍ ହୋଇଥିବା ଜଣାପଡ଼ିଛି।
ଗ୍ୟାସ୍ ଲିକ୍ ଘଟଣା ପେରିୟାକୁପ୍ପମ୍ ଓ ଚିନ୍ନାକୁପ୍ପମ୍ ଗ୍ରାମ ସମେତ ସେ ଅଞ୍ଚଳର ବାସିନ୍ଦାଙ୍କୁ ଭୟଭୀତ କରି ପକାଇଥିଲା। ଉତ୍କଟ ଗନ୍ଧ ସେମାନଙ୍କ ନାକ ରୁନ୍ଧି ପକାଇବା ସହିତ ଶ୍ବାସକ୍ରିୟାରେ ବାଧା ସୃଷ୍ଟି କରିଥିଲା। କେତେକଙ୍କୁ ଭୀଷଣ ଅଶ୍ବସ୍ତି ମଧ୍ୟ ଲାଗିଥିଲା।ଅବିଳମ୍ବେ ପୁଲିସ ଓ ଜିଲ୍ଲା ପ୍ରଶାସନ ଆମ୍ବୁଲାନ୍ସ୍ ଓ ଅନ୍ୟା ଗାଡ଼ି ବ୍ୟବସ୍ଥା କରି ସ୍ଥାନୀୟ ବାସିନ୍ଦାମାନଙ୍କୁ କମ୍ୟୁନିଟି ହଲ୍ ଓ ଅନ୍ୟାନ୍ୟ ସ୍ଥାନକୁ ସ୍ଥାନାନ୍ତର କରିଥିଲେ।କମ୍ପାନି ଲୋକେ ରାତାରାତି ଗ୍ୟାସ୍ ଲିକ୍ ବନ୍ଦ କରି ପରିସ୍ଥିତିକୁ ଆୟତ୍ତ କରିଥିବା କଥା ପୁଲିସ କହିଛି।
Powered by Froala Editor
