ଓମିକ୍ରନର ସବଭାରିଆଣ୍ଟ JN.1କୁ ନେଇ ଚିନ୍ତା
![ଓମିକ୍ରନର ସବଭାରିଆଣ୍ଟ JN.1କୁ ନେଇ ଚିନ୍ତା](https://odishanewslens.com/news_gallery/26744_1703190177.jpg)
ଓମିକ୍ରନର ସବଭାରିଆଣ୍ଟ JN.1କୁ ନେଇ ଲୋକଙ୍କ ମନରେ ଭୟ ସୃଷ୍ଟି କରିଛି। JN.1 ସବ୍-ଭାରିଆଣ୍ଟ ହେଉଛି ଓମିକ୍ରନ BA.2.86(ପିରୋଲା)ର ନୂତନ ପ୍ରକାର। ସେପଟେ ଦେଶରେ ଗତ ୨ ସପ୍ତାହରେ ୨୩ ସଂକ୍ରମିତଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ନିକଟରେ, କେରଳର ଜଣେ 78 ବର୍ଷୀୟା ମହିଳା ପ୍ରଥମେ JN.1 ସବ୍-ଭାରିଆଣ୍ଟରେ ଚିହ୍ନଟ ହୋଇଥିଲେ। ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ବିଶ୍ୱ ସ୍ୱାସ୍ଥ୍ୟ ସଂଗଠନ(WHO) ସମସ୍ତ ଦେଶକୁ ସତର୍କ ରହିବାକୁ ପରାମର୍ଶ ଦେଇଛି।
ଭାରତୀୟ ମେଡିକାଲ ଆସୋସିଏସନ କୋଭିଡ ଟାସ୍କଫୋର୍ସର ଉପାଧ୍ଯକ୍ଷ ଡାକ୍ତର ରାଜୀବ ଜୟଦେବନ କହିଛନ୍ତି- ଇନଫ୍ଲୁଏଞ୍ଜା ପରି ଲକ୍ଷଣ ଥିବା ସମସ୍ତ ରୋଗୀଙ୍କ ମଧ୍ୟରୁ ୩୦ ପ୍ରତିଶତ ରୋଗୀ ହେଉଛନ୍ତି କୋଭିଡ ପଜିଟିଭ। କେରଳର କୋଚି ଅଞ୍ଚଳରେ ଠାବ ହୋଇଥବା ସଂକ୍ରମିତଙ୍କ ପରୀକ୍ଷାରୁ ଏହି ସୂଚନା ମିଳିଛି । ଏହାର ଗୋଷ୍ଠୀଭିତ୍ତିକ ସଂକ୍ରମଣ ହେଉଛି । ବର୍ତ୍ତମାନ ସୁଦ୍ଧା ଯେତିକି କୋଭିଡ ଭାରିଆଣ୍ଟ ଚିହ୍ନଟ ହେଲେଣି ସେମାନଙ୍କ ମଧ୍ଯରୁ JN.1 ସବୁଠାରୁ ଅଧିକ ସଂକ୍ରମଣଶୀଳ ବୋଲି କହିଛନ୍ତି ଡାକ୍ତର ଜୟଦେବନ ।
କେରଳ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ କହିଛନ୍ତି ଯେ, ନୂଆ ଭାରିଆଣ୍ଟକୁ ନେଇ ବିଶେଷ ଚିନ୍ତା କରିବାର କୌଣସି ଆବଶ୍ୟକତା ନାହିଁ। ଏହା ଏକ ସବଫର୍ମ। କିଛି ମାସ ପୂର୍ବେ, ସିଙ୍ଗାପୁର ବିମାନବନ୍ଦରରେ ସ୍କ୍ରିନିଂ ସମୟରେ କିଛି ଭାରତୀୟଙ୍କ ମଧ୍ୟରେ ଏହି ପ୍ରକାର ଦେଖିବାକୁ ମିଳିଥିଲା। ଜିନମ ସିକ୍ୱେଏନ୍ସିଂ ପରେ କେରଳରେ ପ୍ରଥମ ମାମଲା ଚିହ୍ନଟ ହୋଇଥିଲା। ସ୍ୱାସ୍ଥ୍ୟ ବ୍ୟବସ୍ଥା ଉପରେ ତୀକ୍ଷ୍ଣ ନଜର ରଖାଯାଇଛି।
ସେହିପରି ବିଶ୍ବ ସ୍ବାସ୍ଥ୍ୟ ସଂଗଠନର ପୂର୍ବତନ ମୁଖ୍ଯ ବୈଜ୍ଞାନିକ ଡାକ୍ତର ସୌମ୍ୟା ସ୍ବାମୀନାଥନ କହିଛନ୍ତି- କୋଭିଡ ସଂକ୍ରମଣକୁ ଏକ ମାମୁଲି ଥଣ୍ଡା ରୋଗ ଭାବେ ଗ୍ରହଣ କରିବା ଅନୁଚିତ । ଏହି ରୋଗରେ ପଡୁଥିବା ଲୋକମାନଙ୍କ କ୍ଷେତ୍ରରେ ଦୀର୍ଘକାଳ ଲାଗି ପ୍ରଭାବ ପଡିଥାଏ ।
Powered by Froala Editor