ରାଜଭବନ ସମ୍ମୁଖରେ ମୁହଁ କଳା କରିବେ କଂଗ୍ରେସ ନେତା
ମଧ୍ୟ ପ୍ରଦେଶ ବିଧାନସଭା ନିର୍ବାଚନରେ ବିଜେପି ୫୦ରୁ ଅଧିକ ଆସନ ଜିତିଲେ ନିଜ ମୁହଁ କଳା କରିବେ ବୋଲି କହିଥିଲେ କଂଗ୍ରେସ ନେତା ଫୁଲ୍ ସିଂହ ବରେୟା। ଏବେ ସେ ସେହି ପ୍ରତିଜ୍ଞା ପାଳନ କରିବେ ବୋଲି କହିଛନ୍ତି। ଦତ୍ତିଆ ଜିଲାର ଭନ୍ଦର ବିଧାନସଭା ଆସନରୁ କଂଗ୍ରେସ ଟିକେଟରେ ନିର୍ବାଚିତ ହୋଇଥିବା ଫୁଲ ସିଂ ଡିସେମ୍ବର ୭ ଅପରାହ୍ନ ୨ଟାରେ ରାଜଭବନ ସମ୍ମୁଖରେ ମୁହଁ କଳା କରିବେ ବୋଲି ସ୍ପଷ୍ଟ କରିଛନ୍ତି। ସେ ଯାହା କହନ୍ତି, ତାହା କରନ୍ତି ବୋଲି କହିଛନ୍ତି।
କଂଗ୍ରେସ ବିଧାୟକ କହିଛନ୍ତି, ‘ମୁଁ ମୋର ପ୍ରତିଜ୍ଞାରେ ଅଟଳ। ତଥାପି ମୁଁ ଏହା ସ୍ପଷ୍ଟ କରିଦେବାକୁ ଚାହେଁ ଯେ ଯଦି ନିର୍ବାଚନ ଆୟୋଗ ନିରପେକ୍ଷ ଭାବେ ନିର୍ବାଚନ କରାନ୍ତି ତେବେ ଲିଖିତ ଭାବେ କହିପାରେ ଯେ ରାଜ୍ୟରେ ବିଜେପି ପାଖରେ ୫୦ ବିଧାୟକଙ୍କୁ ଜିତାଇବା ଲାଗି ପର୍ଯ୍ୟାପ୍ତ ଭୋଟ୍ ନାହିଁ। ଯଦି ଦେଶ, ଗଣତନ୍ତ୍ର ଏବଂ ସମ୍ବିଧାନକୁ ବଞ୍ଚାଇବା ଲାଗି ରକ୍ତ ଝରାଇ ମୁହଁକୁ ଲାଲ କରିବାକୁ ପଡେ ତେବେ ଆମେ କରିବୁ। ମୁଁ ଡିସେମ୍ବର ୭ରେ ପ୍ରତିଶ୍ରୁତି ପୂରଣ କରିବି।’
କଂଗ୍ରେସ ଏଥର ନିଶ୍ଚିତ ଜିତିବ ବୋଲି ଆଶା କରିଥିଲେ ଫୁଲ୍ ସିଂହ ବରେୟା। କିନ୍ତୁ ଦଳ ମାତ୍ର ୬୬ଟି ଆସନ ଜିତିବାକୁ ସକ୍ଷମ ହୋଇଛି।
Powered by Froala Editor