ମୁଁ ବିଜେପିର ଜଣେ କର୍ମୀ, ମୁଖ୍ୟମନ୍ତ୍ରୀ ପଦ ପାଇଁ କେବେ ଦାବିଦାର ନଥିଲି : ଶିବରାଜ
ମଧ୍ୟପ୍ରଦେଶରେ ବିଜେପିର ବଡ଼ ବିଜୟ ପରେ ମୁଖ୍ୟମନ୍ତ୍ରୀ ମୁହଁକୁ ନେଇ ଚର୍ଚ୍ଚା ଚାଲିଛି। ଏହାରି ଭିତରେ ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଦେଇଛନ୍ତି ଏକ ବଡ଼ ବୟାନ। ସେ କେବେହେଲେ ମୁଖ୍ୟମନ୍ତ୍ରୀ ପଦ ଲାଗି ଦାବିଦାର ନା ଥିଲେ ନା ଅଛନ୍ତି ବୋଲି କହିଛନ୍ତି। ଏହାଛଡ଼ା ସେ କେବଳ ବିଜେପିର ଜଣେ କର୍ମୀ। ଏଣୁ ଦଳ ତାଙ୍କୁ ଯେଉଁ କାମ ଦେବ ତାହାକୁ ସେ ବେଶ ସଚ୍ଚୋଟତାର ସହ ପୂରଣ କରିବେ ବୋଲି କହିଛନ୍ତି। ଏଭଳି ସମୟରେ ବର୍ତ୍ତମାନର ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହ୍ବାନ ବଡ଼ ବୟାନ ଦେଇ ସମସ୍ତଙ୍କୁ ଚମକାଇଛନ୍ତି।
ଭିଡିଓ ବାର୍ତ୍ତାରେ ଶିବରାଜ କହିଛନ୍ତି, 'ମୋଦିଜୀ ଆମର ନେତା। ତାଙ୍କ ସହ କାମ କରି ମୁଁ ସର୍ବଦା ଗର୍ବ ଓ ଆନନ୍ଦ ଅନୁଭବ କରିଛି। ରାଜ୍ୟବାସୀଙ୍କୁ ମୁଁ ପୁଣିଥରେ ଧନ୍ୟବାଦ ଜଣାଉଛି।'
ମଧ୍ୟପ୍ରଦେଶ ବିଧାନସଭା ନିର୍ବାଚନରେ ଭାଜପା ୨୩୦ ଆସନରୁ ୧୬୩ରେ ବିଜୟ ଲାଭ କରିଥିଲା। ହେଲେ କଂଗ୍ରେସ ମାତ୍ର ୬୬ ଆସନ ହାତେଇବାରେ ସଫଳ ହୋଇଥିଲା। ସେବେଠାରୁ ପୁଣିଥରେ ଶିବରାଜଙ୍କୁ ଦଳ ସୁଯୋଗ ଦେଇପାରେ ବୋଲି ଚର୍ଚ୍ଚା ହେଉଥିବା ବେଳେ ଶିବରାଜଙ୍କ ଏଭଳି ବାର୍ତ୍ତା ସାମ୍ନାକୁ ଆସିଛି।
Powered by Froala Editor
