୮ରୁ ଅଲ ଓଡ଼ିଶା ନାଲକୋ କପ୍ ଟେନିସ୍ ଟୁର୍ଣ୍ଣାମେଣ୍ଟ , ଭାଗ ନେବେ ୩୦୦ରୁ ଊଦ୍ଧ୍ୱର୍ ପ୍ରତିଯୋଗୀ
ଭୁବନେଶ୍ୱର,୩ା୧୨: ୩ ବର୍ଷର ବ୍ୟବଧାନ ପରେ ପୁଣି ଆରମ୍ଭ ହେବାକୁ ଯାଉଛି ଅଲ ଓଡ଼ିଶା ନାଲକୋ କପ୍ ଟେନିସ୍ ଟୁର୍ଣ୍ଣାମେଣ୍ଟର ୨୨ତମ ସଂସ୍କରଣ । ଭୁବନେଶ୍ୱର ଡିଷ୍ଟ୍ରିକଫ ଟେନିସ୍ ଆସୋସିଏସନ୍ ଆନୁକୂଲ୍ୟରେ ରାଜ୍ୟର ଏହି ଅଣ ରେଟେଡ୍ ଟୁର୍ଣ୍ଣାମେଣ୍ଟ ଆଗାମୀ ୮ରୁ ୧୦ତାରିଖ ପର୍ଯ୍ୟନ୍ତ କଳିଙ୍ଗ ଷ୍ଟାଡିୟମର ଟେନିସ୍ ସେଣ୍ଟରରେ ଖେଳାଯିବ । ଏଥର ୯ଟିବର୍ଗରେ ପ୍ରତିଯୋଗିତା ହେବ । ୧୪ ବର୍ଷରୁ କମ୍ ବାଳକ-ବାଳିକା, ୧୮ ବର୍ଷରୁ କମ ବାଳକ, ମହିଳା ଓପନ୍, ପୁରୁଷ ଓପନ୍, ପୁରୁଷ ଡବଲ୍ସ, ପୁରୁଷ ଭେଟେରାନ(୪୦ ବର୍ଷରୁ ଉଦ୍ଧ୍ୱର୍) ଡବଲ୍ସ, ପୁରୁଷ ଭେଟେରାନ(୫୦ ବର୍ଷରୁ ଉଦ୍ଧ୍ୱର୍) ଏବଂ ପୁରୁଷ ଭେଟେରାନ୍ (୬୦ ବର୍ଷରୁ ଉଦ୍ଧ୍ୱର୍) ଆଦି ବର୍ଗରେ ୩୦୦ରୁ ଅଧିକ ପ୍ରତିଯୋଗୀ ଏହି ମର୍ଯ୍ୟାଦାଜନକ ପ୍ରତିଯୋଗିତାରେ ଅଂଶଗ୍ରହଣ କରିବେ । ପ୍ରତିଯୋଗୀଙ୍କ ନିମନ୍ତେ ପ୍ରବେଶିକା ଦେୟ ମଧ୍ୟ ଧାର୍ଯ୍ୟ କରାଯାଇଛି । ସିଙ୍ଗଲ୍ସ ବୟସ ବର୍ଗ ନିମନ୍ତେ ୨୦୦ ଟଙ୍କା, ପୁରୁଷ ଓ ମହିଳା ବର୍ଗର ଓପନ୍ ନିମନ୍ତେ ୩୦୦ ଟଙ୍କା ଏବଂ ଭେଟେରାନ ଡବଲ୍ସ ନିମନ୍ତେ ୫୦୦ ଟଙ୍କା ପ୍ରବେଶିକା ଫି ଦେଇ ନାମ ପଞ୍ଜିକରଣ କରିପାରିବେ ।
କରୋନା ମହାମାରୀ ନିମନ୍ତେ ଗତ ୨୦୨୦, ୨୦୨୧ ଓ ୨୦୨୨ ସଂସ୍କରଣ ବନ୍ଦ ରହିଥିଲା। ପୁଣି ଥରେ ୨୦୨୩ରୁ ଅଲ ଓଡ଼ିଶା ନାଲକୋ କପ୍ ଟେନିସ୍ ଟୁର୍ଣ୍ଣାମେଣ୍ଟ ସ୍ୱାଭାବିକ ହେବାକୁ ଯାଉଛି । ନାଲକୋ ଏହି ଟୁର୍ଣ୍ଣାମେଣ୍ଟର ମୁଖ୍ୟ ପ୍ରାୟୋଜକ । ତେଣୁ ଅଲ ଓଡ଼ିଶା ଟେନିସ୍ ଟୁର୍ଣ୍ଣାମେଣ୍ଟ ସହ ନାଲକୋକୁ ଯୋଡା ଯାଇଛି । ଭୁବନେଶ୍ୱର ଡିଷ୍ଟ୍ରିକଫ ଟେନିସ୍ ଆସୋସିଏସନ ସହ ନାଲକୋ ୫ ବର୍ଷ ପାଇଁ ପ୍ରାୟୋଜକ ଚୂକ୍ତି ସ୍ୱାକ୍ଷର କରିଛି। ଏହି ଟେନିସ୍ ଟୁର୍ଣ୍ଣାମେଣ୍ଟର ସଫଳ ରୂପାୟନ ନିମନ୍ତେ ଓଡ଼ିଶା ମାଇନିଂ କର୍ପୋରେସନ୍(ଓଏମସି) ଏବଂ ଟାଟା ସହଯୋଗିତାର ହାତ ବଢ଼ାଇଛନ୍ତି । ଏଥର ୯ଟି ବର୍ଗରେ ମୋଟ୍ ୪,୩୨୦୦୦ ଟଙ୍କା ପୁରସ୍କାର ରାଶି ପ୍ରଦାନ କରାଯିବ । ଗତ ସଂସ୍କରଣରେ ୨,୮୯୦୦୦ ଟଙ୍କା ପୁରସ୍କାର ଦିଆଯାଇଥିଲା। ଅର୍ଥାତ୍ ଏଥର ପୁରସ୍କାର ରାଶି ୨୫% ବଢ଼ିଛି। ନାମ ପଞ୍ଜିକରଣ ନିମନ୍ତେ ପ୍ରବୀଣ କୁମାର ନାୟକ(୯୪୩୯୫୫୨୫୩୬)ଙ୍କ ସହ ଯୋଗାଯୋଗ କରିବାକୁ ଆୟେଜକ ସୂଚନା ଦେଇଛନ୍ତି । ଉଦଘାଟନୀ ଉତ୍ସବରେ ରାଜ୍ୟ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା ମୁଖ୍ୟ ଅତିଥି ଭାବେ ଯୋଗ ଦେବାର କାର୍ଯ୍ୟକ୍ରମ ରହିଛି।
ରବିବାର କଳିଙ୍ଗ ଷ୍ଟାଡିୟମ ସ୍ଥିତ ଟେନିସ୍ ସେଣ୍ଟରରେ ଆୟୋଜିତ ସାମ୍ବାଦିକ ସମ୍ମିଳନୀରେ ଭୁବନେଶ୍ୱର ଡିଷ୍ଟ୍ରିକଫ ଟେନିସ୍ ଆସୋସିଏସନର ସମ୍ପାଦକ ଶାଶ୍ୱତ ମିଶ୍ର, କୋଷାଧ୍ୟକ୍ଷ ଅଜୟ ସାହୁ, ଦେବୀ ବିଶ୍ୱାଳ ଏବଂ ସରୋଜ ସାହୁ ପ୍ରମୁଖ ଉପସ୍ଥିତ ରହି ପ୍ରତିଯୋଗିତା ସମ୍ପର୍କରେ ବିସ୍ତୁତ ସୂଚନା ଦେଇଥିଲେ।
Powered by Froala Editor
