କିଏ କହୁଛି ଛୋଟ ଛୋଟ ଚେଷ୍ଟା ବଡ ଫଳ ଦିଏନି ବୋଲି । ବୁନ୍ଦା ବୁନ୍ଦା ପାଣି ମିଶି ଯେମତି ସମୁଦ୍ର ହୁଏ ସେମିତି ଗୋଟିଏ ଗୋଟିଏ ଗଛ ଲଗାଇ ଲଣ୍ଡା ପାହାଡକୁ ସବୁଜିମା କରିଦେଇଛନ୍ତି ଅବସରପ୍ରାପ୍ତ ସେନା କର୍ମଚାରୀ କ୍ଷୀରୋଦ ଚନ୍ଦ୍ର ଜେନା । ଲଣ୍ଡା ଆଲମଗିରି ପାହାଡ଼ ଆଜି ସଂପୂର୍ଣ୍ଣ ସବୁଜିମାମୟ । ପାହାଡ଼ ସାରା ବିଭିନ୍ନ ଫୁଲ, ଫଳ ଗଛ ହସୁଛି । ନିଜସ୍ୱ ଉଦ୍ୟମରେ ୫ ହଜାରରୁ ଅଧିକ ବୃକ୍ଷରୋପଣ କରି ଏପରି ସବୁଜିମା ସୃଷ୍ଟି କରିଛନ୍ତି କ୍ଷୀରୋଦ । 

ଯାଜପୁର ଜିଲ୍ଲା ବଡ଼ଚଣା ବ୍ଲକ୍ ଗୋପାଳପୁର ପଂଚାୟତ କଳାଶ୍ରୀ ଗ୍ରାମର କ୍ଷୀରୋଦ ୧୮ ବର୍ଷ ତଳେ ସେନାରୁ ଅବସର ନେଇ ଘରକୁ ଫେରିଥିଲେ । କିନ୍ତୁ ଖଣି ଓ ମାଫିଆଙ୍କ ଦ୍ୱାରା ଲଣ୍ଡା ହୋଇଯାଇଥିବା ପାହାଡ ତାଙ୍କ ମନକୁ ଆନ୍ଦୋଳିତ କରୁଥିଲା । ତେଣୁ ଲଣ୍ଡା ପାହାଡକୁ ହରାଭରା କରିବା ପାଇଁ ସେ ଶପଥ ନେଇଥିଲେ । ପ୍ରଥମେ ପଟ୍ଟାମୁଣ୍ଡାଇ କେନାଲବନ୍ଧ ସମେତ ବିଭିନ୍ନ ସ୍ଥାନରେ ୨୦ ହଜାରରୁ ଅଧିକ ବୃକ୍ଷରୋପଣ କରିଥିଲେ । ସେଥିରେ ସଫଳ ହେବା ପରେ ବିଭିନ୍ନ ଜାଗାରେ ଗଛ ଲଗାଇଥିଲେ । ଆଲମଗିରି ପାହାଡ଼଼ରେ ପୂଜା ପାଉଥିବା ଷୋଳପୁଅ ମା ପୀଠରେ ଗଛଟିଏ ନଥିବାରୁ ଶ୍ରଦ୍ଧାଳୁମାନେ ଛାଇ ଟିକିଏ ପାଉନଥିଲେ । ଏହାଦେଖି ୩ ବର୍ଷ ତଳେ ସେ ସେଠାରେ ଗଛଲଗା ଆରମ୍ଭ କରିଥିଲେ । 

ଏଠାରେ ଅଁଳା, ଆମ୍ବ, ଜାମୁ, ଆମ୍ବଡ଼ା, ପଣସ ଓ ବେଲ ଆଦି ବୃକ୍ଷରୋପଣ କରାଯାଇଛି । ଗଛଗୁଡ଼ିକ ଭଲ ଭାବେ ବଢ଼଼ିଥିବାରୁ ପରିବେଶ ଅଧିକ ସୌନ୍ଦର୍ଯ୍ୟମୟ ହୋଇଛି । ଏଥିସହିତ ଜଙ୍ଗଲ ବିଭାଗ ପକ୍ଷରୁ ଲଗା ଯାଇଥିବା ବିଭିନ୍ନ ଚାରା ପାଣି ବିନା ନଷ୍ଟ ହେଉଥିଲା । କ୍ଷୀରୋଦ ଗଛରେ ପାଣି ଓ ସାର ଦେଇ ସେସବୁକୁ ବଂଚାଇ ରଖିଛନ୍ତି । କେବଳ ଏତିକି ନୁହେଁ, ପାହାଡ଼ ଉପରେ ପାଣି ସମସ୍ୟା ଥିବାରୁ ଶ୍ରୀ ଜେନା ଲକ୍ଷାଧିକ ଟଙ୍କା ବ୍ୟୟରେ ନିଜସ୍ୱ ଉଦ୍ୟମରେ ବୋରିଂ ଖୋଳିଛନ୍ତି । ସେ ତାଙ୍କ ପେନସନ ଟଙ୍କାରେ ଏହି କାର୍ଯ୍ୟ କରିଆସୁଛନ୍ତି । ସେ ବଂଚିଥିବା ପର୍ଯ୍ୟନ୍ତ ଗଛ ଲଗାଇବା ଜାରି ରଖିବେ ବୋଲି କହିଛନ୍ତି । 

Powered by Froala Editor