ନୂଆଦିଲ୍ଲୀ: କରୋନାର ଦ୍ୱିତୀୟ ଲହରରେ ଭାରତର ଗ୍ରାମାଞ୍ଚଳ ସବୁଠୁ ଅଧିକ ମାତ୍ରାରେ ପ୍ରଭାବିତ ହୋଇଛି । ଗ୍ରାମୀଣ ଜିଲ୍ଲାଗୁଡ଼ିକରେ ସଂକ୍ରମଣ ଅଧିକ ରହିବା କାରଣରୁ ମେ ମାସରେ ୬ ଦିନ ଭାରତର କରୋନା ସଂକ୍ରମଣ ବିଶ୍ୱର ଦୈନିକ ସଂକ୍ରମଣର ଅଧାରୁ ଅଧିକ ରହିଥିଲା । ସେଣ୍ଟର ଫର ସାଇନ୍ସ ଆଣ୍ଡ ଏନଭାର୍ଣ୍ଣମେଣ୍ଟ (ସିଏସଇ) ପକ୍ଷରୁ ପ୍ରକାଶିତ ରିପୋର୍ଟରେ ଏହା କୁହାଯାଇଛି । ବିଶ୍ୱ ପରିବେଶ ଦିବସ ପରିପ୍ରେକ୍ଷୀରେ ପ୍ରକାଶ ପାଇଥିବା ରିପୋର୍ଟରେ ଦର୍ଶାଯାଇଛି ଯେ ଦେଶରେ ଦେଖାଦେଇଥିବା ନୂଆ ସଂକ୍ରମଣ ମାମଲାର ୫୩ ପ୍ରତିଶତ ଏବଂ ମୃତୁ୍ୟ ମାମଲାର ୫୨ ପ୍ରତିଶତ ଗ୍ରାମୀଣ ଭାରତରେ ଦେଖିବାକୁ ମିଳିଛି । ଭାରତର ସ୍ୱାସ୍ଥ୍ୟସେବା ବ୍ୟବସ୍ଥାକୁ କରୋନା ପଦାରେ ପକାଇ ଦେଇଛି । ସହରାଞ୍ଚଳରେ କେତେ ନିମ୍ନଧରଣର ପ୍ରସ୍ତୁତି ରହିଥିଲା ତାହା ଲୋକଲୋଚନକୁ ଆସିଛି । ସେହିଭଳି ଗ୍ରାମାଞ୍ଚଳ ଜିଲ୍ଲାଗୁଡ଼ିକର ସାଂଘାତିକ ସଙ୍କଟ ସାମ୍ନାକୁ ଆସିଛି ବୋଲି ସିଏସଇ ପକ୍ଷରୁ ନୂଆ ପରିସଂଖ୍ୟାନ ରିପୋର୍ଟ-ଷ୍ଟେଟ୍ ଅଫ୍ ଇଣ୍ଡିଆସ ଏନଭାର୍ଣ୍ଣମେଣ୍ଟ ଇନ୍ ଫିଗର୍ସ ୨୦୨୧ରେ କୁହାଯାଇଛି । ଦେଶର ସ୍ୱାସ୍ଥ୍ୟ ଭିତ୍ତିଭୂମିରେ ଥିବା ଅଭାବ ସଂପର୍କରେ ଏଥିରେ ଉଲ୍ଲେଖ କରାଯାଇଛି । ଗ୍ରାମୀଣ ଭାରତରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଗୁଡ଼ିକରେ ଅଧିକ ୭୬ ପ୍ରତିଶତ ଡାକ୍ତର , ୫୬ ପ୍ରତିଶତରୁ ଅଧିକ ରେଡିଓଗ୍ରାଫର୍ସଙ୍କର ଏବଂ ୩୫ ପ୍ରତିଶତରୁ ଅଧିକ ଲାବ ଟେକ୍ସିସିଆନଙ୍କର ଜରୁରୀ ଆବଶ୍ୟକ ରହିଛି । ମେ ମାସର ପ୍ରଥମ ୨୬ ଦିନରେ ବିଶ୍ୱରେ ପ୍ରତି ଦୁଇଟି ମାମଲାରୁ ଗୋଟିଏ ଭାରତରେ ଦେଖିବାକୁ ମିଳିଥିଲା । ସେହିଭଳି ବିଶ୍ୱର ପ୍ରତି ୩ଟି ମୃତୁ୍ୟରୁ ଗୋଟିଏ ମୃତୁ୍ୟ ଭାରତରେ ହୋଇଥିଲା । ଗତମାସରେ ବିଶ୍ୱରେ ଦେଖାଦେଇଥିବା ପ୍ରତି ୪ଟି ମାମଲାରୁ ଗୋଟିଏ ମାମଲା ଗ୍ରାମୀଣ ଭାରତରୁ ରିପୋର୍ଟ ହୋଇଥିଲା ।

Powered by Froala Editor