ମାଉ ସଦର ବିଧାନସଭା ଆସନର ବିଧାୟକ ଅବ୍ବାସ ଅନସାରୀକୁ କୋର୍ଟରୁ ବଡ଼ ଝଟକା ଲାଗିଛି। ଉତ୍ତେଜନାପୂର୍ଣ୍ଣ ଭାଷଣ ଦେଇ ପଦବୀ ହରାଇଛନ୍ତି ବିଧାୟକ ଅବ୍ବାସ। ମାଉର ଏମପି-ଏମଏଲଏ କୋର୍ଟରେ ଅବ୍ବାସ ଅନସାରୀର ଘୃଣ୍ୟ ଭାଷଣ ବା ହେଟ୍ ସ୍ପିଚ ମାମଲାରେ ଶୁଣାଣି ହୋଇଥିଲା। ଶୁଣାଣି ସମୟରେ କୋର୍ଟ ଅବ୍ବାସ ଅନସାରୀ, ତା ଭାଇ ମନସୁର ଅନସାରୀକୁ ଦୋଷୀ ଘୋଷଣା କରିଛନ୍ତି। ଅବ୍ବାସକୁ ଦୁଇ ବର୍ଷ ଜେଲଦଣ୍ଡ ଏବଂ ୨୦୦୦ ଟଙ୍କା ଜରିମାନା କରାଯାଇଛି।

ସୁପ୍ରିମକୋର୍ଟଙ୍କ ନିର୍ଦେଶାବଳୀ ଅନୁସାରେ ଯଦି କୌଣସି ବିଧାୟକ କିମ୍ବା ସାଂସଦ କୌଣସି ମାମଲାରେ ୨ ବର୍ଷ କିମ୍ବା ତା’ଠାରୁ ଅଧିକ କାଳ ପର୍ଯ୍ୟନ୍ତ ଦଣ୍ଡାଦେଶ ପାଉଛନ୍ତି, ତେବେ ସେମାନଙ୍କ ବିଧାୟକ ଓ ସାଂସଦ ପଦବୀ ରଦ୍ଦ ହୋଇଯିବ। ସେହି ଅନୁସାରେ ଅବ୍ବାସଙ୍କ ସଭ୍ୟପଦ ରଦ୍ଦ ହେବା ନିଶ୍ଚିତ ହୋଇଛି। ବିଧାନସଭା ପକ୍ଷରୁ କେବଳ ବିଜ୍ଞପ୍ତି ପ୍ରକାଶ ବାକି ରହିଛି। ଅନ୍ୟପଟେ ଅବ୍ବାସ ଯଦି ତଳ କୋର୍ଟ ଆଦେଶ ବିରୋଧରେ ସୁପ୍ରିମକୋର୍ଟ ଯିବେ ଏବଂ ସର୍ବୋଚ୍ଚ ଅଦାଲତ ତାଙ୍କ ସପକ୍ଷରେ ରାୟ ଶୁଣାଇବେ ତେବେ ସେ ତାଙ୍କ ସଭ୍ୟ ପଦ ଆପେ ଆପେ ଫେରିପାଇବେ।

କହି ରଖୁଛୁ ଯେ ୨୦୨୨ ୟୁପି ବିଧାନସଭା ନିର୍ବାଚନରେ, ସପା ଏବଂ ସୁହେଲଦେବ ଭାରତୀୟ ସମାଜ ପାର୍ଟି ଏକ ମେଣ୍ଟ କରି ଏକାଠି ନିର୍ବାଚନ ଲଢ଼ିଥିଲେ। ଏହି ମେଣ୍ଟରେ ସୁହେଲଦେବ ଭାରତୀୟ ସମାଜ ପାର୍ଟି ଅବ୍ବାସକୁ ମାଉ ସହରରୁ ଟିକେଟ ଦେଇଥିଲା, ଯେଉଁଥିରେ ସେ ବିଜୟୀ ହୋଇଥିଲା ।

Powered by Froala Editor