ନୂଆଦିଲ୍ଲୀ: ହିମାଳୟରେ ବର୍ଷକୁ ଅନ୍ୟୂନ ୨୦୦ ଥର ଭୂକମ୍ପ ହେଉଛି। ସେଥିରୁ କେତେକ ଅନୁଭୂତ ହେଉଥିବାବେଳେ ଆଉ କେତେକ ଜଣାପଡ଼ୁନାହିଁ; କିନ୍ତୁ ହିମାଳୟ ଏଥିରେ ଦୋହଲିଯାଉଥିବା ଗବେଷଣାରୁ ଜଣାପଡ଼ିଛି। ବିଶେଷକରି ଧରଚୁଲା, ଚାମୋଲି, କାପକଟ, ମୁନ୍‌ସିଆରୀ ଓ ରୁଦ୍ରପ୍ରୟାଗ ଅଞ୍ଚଳରେ ସର୍ବାଧିକ କମ୍ପନ ହେଉଛି। ଏହି ସବୁ ଅଞ୍ଚଳ ନେପାଳର ପଶ୍ଚିମାଞ୍ଚଳ ସଂଲଗ୍ନ ଓ ହିମାଳୟର ଉତ୍ତର ଭାଗ ଏବଂ ଭୂକମ୍ପ ଜୋନ୍‌ ଅନ୍ତର୍ଭୁକ୍ତ। ଗତ ୨୭ ବର୍ଷ ଧରି ଶତାଧିକ କମ୍ପନ ହୋଇଆସୁଥିବା କୁମାଉନ୍‌ ବିଶ୍ବବିଦ୍ୟାଳୟ ପକ୍ଷରୁ ଅନୁଷ୍ଠିତ ଗବେଷଣାରୁ ଜଣାପଡ଼ିଛି।
ବିଶ୍ବବିଦ୍ୟାଳୟର ଭୂତତ୍ତ୍ବ ବିଭାଗ ମୁଖ୍ୟ ଡ. ସନ୍ତୋଷ ଜୋଷୀଙ୍କ ନେତୃତ୍ବରେ ପ୍ରସ୍ତୁତ ରିପୋର୍ଟ ଅନୁସାରେ, ପ୍ରତି ବର୍ଷ ହେଉଥିବା କମ୍ପନ ମଧ୍ୟରୁ ଅନ୍ୟୂନ ୩ଟି ବଡ଼ ଧରଣର ଓ ଅନ୍ୟଗୁଡ଼ିକ ସାଧାରଣ। ଏହି କମ୍ପନରେ ଉତ୍ତରାଖଣ୍ଡର ପିଥୋରଗଡ଼ ଅଞ୍ଚଳ ସର୍ବାଧିକ ପ୍ରଭାବିତ ହୋଇଥାଏ। କେନ୍ଦ୍ର ସରକାରଙ୍କ ଭୂ-ବିଜ୍ଞାନ ସଂସ୍ଥାନ ଦ୍ବାରା ହିମାଳୟର ଘରୱାଲ-କୁମାଉନ୍‌ ଅଞ୍ଚଳରେ ୧୯୯୧ରୁ ୨୦୧୮ ମଧ୍ୟରେ ଅନୁଷ୍ଠିତ କମ୍ପନର ତଥ୍ୟ ଅନୁଶୀଳନରୁ ଜଣାପଡ଼ିଛି ଯେ ଗତ ୨୭ ବର୍ଷ ମଧ୍ୟରେ ୪୨୦୦ ଥର ଭୂକମ୍ପ ହୋଇଛି। ଏହା ୨ରୁ ୪ ମାଗ୍‌ନିଚ୍ୟୁଡ୍‌ ମଧ୍ୟରେ ବୋଲି କୁହାଯାଇଛି। ସମ୍ପୃକ୍ତ ଅଞ୍ଚଳରେ ଅତ୍ୟଧିକ ଯାନବାହନ ଚଳାଚଳ ଓ ଶବ୍ଦ ପ୍ରଦୂଷଣ ଯୋଗୁଁ ହିମାଳୟର ପ୍ରାକୃତିକ ପରିବେଶ ନଷ୍ଟ ହେଉଛି ଏବଂ ଏହା ଭୂକମ୍ପ ପାଇଁ ଅଧିକ ପରିମାଣରେ ଦାୟୀ ବୋଲି ଗବେଷକମାନେ ମତ ଦେଇଛନ୍ତି।

Powered by Froala Editor