ଏସିଆ କପ୍ ଜିତିଲା ‘ଟିମ୍ ଇଣ୍ଡିଆ’ : ମାତ୍ର ୫୦ ରନ୍ରେ ହାରିଲା ଶ୍ରୀଲଙ୍କା
ଆର୍ ପ୍ରେମଦାସା ଷ୍ଟାଡିମୟରେ ଖେଳାଯାଉଥିବା ଏସିଆ କପ୍ ଫାଇନାଲ୍ ମ୍ୟାଚରେ ଚାମ୍ପିୟନ ହୋଇଛି ଟିମ୍ ଇଣ୍ଡିଆ । ଆଜିର ବିଜୟକୁ ମିଶାଇ ଭାରତ ମୋଟ ୮ଥର ଚାମ୍ପିଅନ ହୋଇଛି । ୫୧ ରନର ବିଜୟ ଲକ୍ଷ୍ୟକୁ ୬.୧ ଓଭରରେ ହାସଲ କରିନେଇଛି ଭାରତ । ଇଶାନ କିଶନ ଏବଂ ଶୁବମନ୍ ଗିଲ୍ ଅପରାଜିତ ରହି ବିଜୟ ଲକ୍ଷ୍ୟକୁ ହାସଲ କରିଛନ୍ତି । ଇଶାନ କିଶନ ବ୍ୟକ୍ତିଗତ ଭାବେ ୨୩ ରନ୍ କରିଥିବାବେଳେ ଶୁବମନ ୨୭ ରନ୍ କରିଛନ୍ତି । ବିନା ୱିକେଟ୍ ହରାଇ ଭାରତ ବିଜୟୀ ହୋଇଛି ।
ଟସ ଜିତି ଶ୍ରୀଲଙ୍କା ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । କିନ୍ତୁ ପ୍ରଥମ ଓଭରରେ ହିଁ ଯଶପ୍ରୀତ ବୁମରା ଶ୍ରୀଲଙ୍କାର କୁଶଲ ପରେରାଙ୍କୁ ଆଉଟ କରିଦେଇଥିଲେ । ଏହା ପରେ ଆରମ୍ଭ ହୋଇଥିଲା ମହମ୍ମଦ ସିରାଜଙ୍କ ଅଗ୍ନିବର୍ଷୀ ବୋଲିଂ । ସିରାଜଙ୍କ ପରେ ଆରମ୍ଭ ହୋଇଥିଲା ହାର୍ଦ୍ଦିକ ପାଣ୍ଡ୍ୟାଙ୍କ ବୋଲିଂ । ହାର୍ଦ୍ଦିକ ପାଣ୍ଡ୍ୟା ୨.୨ ଓଭର ବୋଲିଂ କରି ୩ ରନ୍ ଦେଇ ୩ଟି ୱିକେଟ ହାସଲ କରିଛନ୍ତି। ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ତିଷ୍ଟି ପାରିନଥିଲେ ଶ୍ରୀଲଙ୍କା ବ୍ୟାଟର । ଦିନିକିଆର ୫୦ ଓଭର ବିଶିଷ୍ଟ ମ୍ୟାଚରେ ମାତ୍ର ୧୫ ଓଭର ୨ବଲ୍ରେ ଶ୍ରୀଲଙ୍କାର ଖେଳ ସରିଯାଇଥିଲା।
ଭାରତର ଏହି ରେକର୍ଡ ବ୍ରେକିଂ ବିଜୟର ନାୟକ ହେଉଛନ୍ତି ଦ୍ରୁତ ବୋଲର ମହମ୍ମଦ ସିରାଜ। ସେ ୨୧ ରନରେ ୬ ୱିକେଟ ଦଖଲ କରିଛନ୍ତି। ହାର୍ଦ୍ଦିକ ପାଣ୍ଡ୍ୟା ୩ଟି ଓ ଯଶପ୍ରୀତ ବୁମ୍ରା ଗୋଟିଏ ସଫଳତା ପାଇଛନ୍ତି। ସିରାଜ ଏସିଆ କପରେ ୬ ୱିକେଟ ନେଇଥିବା ଅଜନ୍ତା ମେଣ୍ଡିସଙ୍କ ରେକର୍ଡର ସମକକ୍ଷ ମଧ୍ୟ ହୋଇଛନ୍ତି। ସେ ମାତ୍ର ୧୬ଟି ବଲରେ ୫ ୱିକେଟ ଦଖଲ କରିବାର କୀର୍ତ୍ତିମାନ ହାସଲ କରିଛନ୍ତି। ଶ୍ରୀଲଙ୍କାର ଚାମିଣ୍ଡା ଭାସ୍ ମଧ୍ୟ ସମାନ ୧୬ ବଲରେ ୫ ୱିକେଟ ନେଇଥିଲେ। ଏହାବାଦ ଗୋଟିଏ ଓଭର୍ରେ ସର୍ବାଧିକ ୱିକେଟ ନେବାର ରେକର୍ଡ ସିରାଜଙ୍କ ନାଁରେ ଯୋଡ଼ି ହୋଇ ଯାଇଛି। ସେ ଶ୍ରୀଲଙ୍କା ଇନିଂସର ୪ର୍ଥ ଓଭର୍ରେ ୪ଟି ୱିକେଟ ନେଇଥିଲେ।
ସୂଚନାଯୋଗ୍ୟ ଯେ, ଭାରତ ୨୦୧୮ରେ ଏସିଆ କପ୍ ଜିତିଥିଲା । ୧୯୮୪, ୧୯୮୮, ୧୯୯୧, ୧୯୯୫, ୨୦୧୦, ୨୦୧୬ ଓ ୨୦୧୮ରେ ଏସିଆ କପ୍ ଚାମ୍ପିଅନ ହୋଇଥିଲା । ଏବଂ ଦଳ ୫ ବର୍ଷ ପରେ ଅଷ୍ଟମଥର ଟାଇଟଲ ପୁଣିଥରେ ଜିତି ନେଇଛି।
Powered by Froala Editor
