କେନ୍ଦୁଝର : ରବିବାର ଗଞ୍ଜାମ ଜିଲ୍ଲା ଦିଗପହଣ୍ଡି ନିକଟସ୍ଥ ମୌଳାଭଞ୍ଜାର ମର୍ମନ୍ତୁଦ ଦୁର୍ଘଟଣା ସ୍ମୃତିରେ ସତେଜ ଥିବାବେଳେ ୪୮ ଘଣ୍ଟା ମଧ୍ୟରେ କେନ୍ଦୁଝର ଜିଲ୍ଲା ୨୦ ନମ୍ବର ଜାତୀୟ ରାଜପଥର ଜୁଡିଆ ଘାଟି ଷଠୀଘର ନିକଟରେ ଆଉ ଏକ ଦୁର୍ଘଟଣା ସ୍ତବ୍ଧ କରିଦେଇଛି । ମଙ୍ଗଳବାର ରାତି ୨ଟା । କେନ୍ଦୁଝର ଟାଉନ୍‌ ଥାନା ଅନ୍ତର୍ଗତ ଷଠୀଘର ସାହି ନିକଟରେ ବିବାହ ଶୋଭାଯାତ୍ରା ଚାଲିଥିଲା । ହରିଚନ୍ଦନପୁର ବ୍ଲକ୍‌ ଜଙ୍ଘିରା ନିକଟସ୍ଥ ମାନପୁର ଗ୍ରାମରୁ ଏକ ବରଯାତ୍ରୀ ଦଳ କେନ୍ଦୁଝର ଆସିଥିଲେ । ଷଠୀଘର ସାହିରେ କନ୍ୟାଘର ସମ୍ମୁଖରେ ବରଯାତ୍ରୀ ଦଳ ପହଞ୍ଚିଥିଲେ । ଡିଜେର ତାଳେ ତାଳେ ମସଗୁଲ୍‌ ବରଯାତ୍ରୀମାନେ ନାଚୁଥିଲେ । ଏହି ସମୟରେ ଶୁଆକାଟୀ ପଟୁ ହଠାତ୍‌ ଏକ ଟ୍ରକ୍‌ ଦ୍ରୁତବେଗରେ ଆସି ବରଯାତ୍ରୀଙ୍କ ଉପରେ ମାଡ଼ିଯାଇଥିଲା । ଫଳରେ ୫ ଜଣ ଦୁର୍ଘଟଣାସ୍ଥଳରେ ପ୍ରାଣ ହରାଇବା ସହ ଅନ୍ୟ ୯ ଜଣ ଗୁରୁତର ଆହତ ହୋଇଥିଲେ ।

ମୃତକଙ୍କ ମଧ୍ୟରେ ୩ ଜଣ କନ୍ୟାଘରର ବୋଲି ଜଣାପଡ଼ିଛି । ମୃତକମାନେ ମାନପୁର ଗ୍ରାମର ଜିତ୍‌ ପାତ୍ର, କାଳିଆ ମହାନ୍ତ, ଲକ୍ଷ୍ମୀପାଦର ରତି ମୁଣ୍ଡା, ଷଠୀଘରର ଅମିତ୍‌ ପାତ୍ର ଏବଂ କେଉଟସାହିର ବାପୁନ୍‌ ଦେହୁରୀ ବୋଲି ଜଣାପଡ଼ିଛି । ଦୁର୍ଘଟଣା ପରେ ବର ଓ କନ୍ୟାଙ୍କ ପରିବାର ସମେତ ସମଗ୍ର ଗାଁ କାନ୍ଦବୋବାଳିରେ ଫାଟି ପଡ଼ିଥିଲା । ବାହାଘର ବନ୍ଦ ରହିଛି । ସେପଟେ ଦୁର୍ଘଟଣା ପରେ ଟ୍ରକ୍‌ ଫେରାର୍‌ ହୋଇଯାଇଥିଲା । ପ୍ରାୟ ୩ କିଲୋମିଟର ପରେ ପୁଲିସ୍‌ ତାକୁ ଜବତ କରିଛି । ଆହତମାନଙ୍କ ପରିଚୟ ଜଣାପଡ଼ିନାହିଁ ।

Powered by Froala Editor