ଭୁବନେଶ୍ଵର : ଧୋକା ଦେଲା ମୌସୁମୀ । ଏଯାଏ କେରଳ ଛୁଇଁଲାନି । ଓଡ଼ିଶାର ପ୍ରତୀକ୍ଷା ଢେର ଲମ୍ବିବ । ସ୍ଥିତି ଯାହା, ଆସନ୍ତା ୧୯ ତାରିଖ ପୂର୍ବରୁ ଓଡ଼ିଶା ମାଟି ମାଡ଼ିବନି ମୌସୁମୀ । ଅର୍ଥାତ୍‌ ରଜରେ ବି ବିଶେଷ ବର୍ଷା ନାହିଁ । ଖାଲି ସେତିକି ନୁହେଁ, ମୌସୁମୀ ଏ ବର୍ଷ ବିଳମ୍ବରେ ଆସିବ, ଅଳ୍ପ ବର୍ଷିବ । ନିଅଣ୍ଟିଆ ରହିବ ମୌସୁମୀ ବର୍ଷା । ଏଭଳି ଆକଳନ ଦର୍ଶାଇଛନ୍ତି କୃଷି ପାଣିପାଗ ବିଶେଷଜ୍ଞ ଡକ୍ଟର ସୁରେନ୍ଦ୍ରନାଥ ପଶୁପାଳକ ।

ସପ୍ତାହେ ବିଳମ୍ବରେ ଚାଲିଛି ମୌସୁମୀ । ଏଭଳି ସ୍ଥିତିରେ ଆରବ ସାଗରରେ ସୃଷ୍ଟି ହେଲାଣି ବାତ୍ୟା ‘ବିପର୍ୟ୍ୟୋୟ’, ଯାହାକି ଭୀଷଣ ରୂପ ନେଇପାରେ । ଏହା ପ୍ରଭାବରେ ୮/୯ ତାରିଖବେଳକୁ କେରଳରେ ପହଞ୍ଚିପାରେ ମୌସୁମୀ ବୋଲି କେତେକ ସଂସ୍ଥା ଅନୁମାନ କରିଛନ୍ତି । କୃଷି ପାଣିପାଗ ବିଶେଷଜ୍ଞ ଡକ୍ଟର ପଶୁପାଳକଙ୍କ କହିବାନୁସାରେ କେରଳରେ ଜୁନ୍‌ ପହିଲା ସୁଦ୍ଧା ମୌସୁମୀ ଆସିବାର ସ୍ୱାଭାବିକ ସମୟ । ଚଳିତ ବର୍ଷ ୯ ତାରିଖ ପୂର୍ବରୁ କେରଳକୁ ମୌସୁମୀ ଛୁଇଁବା ସମ୍ଭାବନା କମ୍‌ । ମୌସୁମୀ ଆଗମନ ହେଲେ ବି ବାତ୍ୟା ପ୍ରଭାବରେ ଆରମ୍ଭରେ ଏହା ଦୁର୍ବଳ ରହିପାରେ । ଏହାସହିତ ବଙ୍ଗୋପସାଗରୀୟ ଶାଖା ସକ୍ରିୟ ହେବାରେ ମଧ୍ୟ ବାତ୍ୟା ବାଧା ଦେଇପାରେ । ବର୍ତ୍ତମାନର ମୌସୁମୀରେ ୪ଟି ଗୁଣ ପରିଲକ୍ଷିତ ହେଉଛି-ମନ୍ଥର ଅଗ୍ରଗତି, ବିଳମ୍ବିତ ପ୍ରବେଶ, ଦୁର୍ବଳ ପ୍ରାରମ୍ଭ ଓ ନିଅଣ୍ଟିଆ ବର୍ଷା । ଅନୁମାନ କରାଯାଉଛି, ରଜ ସମୟରେ ରାଜ୍ୟରେ ବିକ୍ଷିପ୍ତ ହାଲୁକା ବର୍ଷା ଓ ରଜ ପରେ ଉପକୂଳରେ ବିଶେଷ କରି ଉତ୍ତର ଉପକୂଳରେ ସ୍ୱଳ୍ପରୁ ମଧ୍ୟମ ବର୍ଷା ସମ୍ଭାବନା ଅଛି । ଲଘୁଚାପ ସୃଷ୍ଟି ନ ହେଲେ ୧୯ ତାରିଖ ପୂର୍ବରୁ ଓଡ଼ିଶାକୁ ମୌସୁମୀ ଛୁଇଁବା ସମ୍ଭାବନା କମ୍‌ । ଅର୍ଥାତ୍‌ ମୌସୁମୀ ଆଗମନରେ ୯ ଦିନ ବିଳମ୍ବ ହୋଇପାରେ ।

Powered by Froala Editor