ମହାରାଷ୍ଟ୍ରର ବୀଡ଼ ଜିଲ୍ଲାର ଗେବରାଇ ତହସିଲ ଅଞ୍ଚଳରେ ଅଭାବନୀୟ ଘଟଣା ଘଟିଛି। ବାଲି ଚୋରା ଚାଲାଣ କରୁଥିବା ଜଣେ ବ୍ୟକ୍ତି ଟ୍ରକ୍‌ ଚଢ଼ାଇ ଜଣେ ଜିଲ୍ଲାପାଳ ଓ ଅନ୍ୟ ଦୁଇ ସରକାରୀ କର୍ମଚାରୀଙ୍କୁ ହତ୍ୟା କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ପୁଲିସ ଉକ୍ତ ବ୍ୟକ୍ତିକୁ ଗିରଫ କରିବା ସହିତ ଟ୍ରକ୍‌ଟିକୁ ଜବତ କରିଛି। 

ସୂଚନାଯୋଗ୍ୟ, ବୀଡ଼ ଜିଲ୍ଲାପାଳ ଦୀପା ମୁଧୋଲ-ମୁଣ୍ଡେ ଔରାଙ୍ଗାବାଦରୁ ଫେରୁଥିବା ବେଳେ ରାସ୍ତାରେ ଏକ ନମ୍ବର ବିହୀନ ବାଲି ବୋଝେଇ ଟ୍ରକ୍‌କୁ ଦେଖିଥିଲେ । ଏହାପରେ ସେ ଟ୍ରକ୍‌ଟିକୁ ଅଟକାଇବାକୁ ନିଜ କାର ଡ୍ରାଇଭରଙ୍କୁ କହିଥିଲେ। ଜିଲ୍ଲାପାଳଙ୍କ ଡ୍ରାଇଭର ଟ୍ରକକୁ ଅଟକାଇବାକୁ ଚେଷ୍ଟା କରୁଥିବା ବେଳେ ଟ୍ରକ୍‌ ଡ୍ରାଇଭର କାରକୁ ଧକ୍କା ଦେଇ ଆଗକୁ ମାଡ଼ି ଯାଇଥିଲା।

ତେଣୁ କାରକୁ ଟ୍ରକ୍‌ ଆଗକୁ ନେବାକୁ ଡ୍ରାଇଭରଙ୍କୁ କହିଥିଲେ ଜିଲ୍ଲାପାଳ। ଜିଲ୍ଲାପାଳଙ୍କ କଥା ମାନି କାର ଡ୍ରାଇଭର ସେୟା କରିଥିଲେ। ତଥାପି ଟ୍ରକ୍‌ଟି ଅଟକି ନଥିଲା। ଓଲଟି ଟ୍ରକ୍‌ ଡ୍ରାଇଭର କାରକୁ ଧକ୍କା ଦେଇ ଚାଲି ଯିବାକୁ ଚେଷ୍ଟା କରିଥିଲା। ସେଥିପାଇଁ ଗାଡ଼ିର ଗତି ବଢ଼ାଇ ଦେଇଥିଲା। ଏହା ଦେଖି ଜିଲ୍ଲାପାଳଙ୍କ ଡ୍ରାଇଭର ସତର୍କ ହୋଇଯାଇଥିଲେ ଓ କାରକୁ ଦ୍ରୁତଗତି ନେଇ ରାସ୍ତାରୁ ତଳକୁ ଓହ୍ଲାଇ ଦେଇଥିଲେ।

ଏହାପରେ ଜିଲ୍ଲାପାଳ ଓ ତାଙ୍କ ଡ୍ରାଇଭର ଟ୍ରକର ପଛେପଛେ ଯାଇଥିଲେ। ଏହା ଦେଖି ଟ୍ରକ ଚାଳକ ରାସ୍ତା ମଝିରେ ବାଲି ଗଦା କରି ଦେଇଥି‌ଲା। ଫଳରେ ଜିଲ୍ଲାପାଳଙ୍କ ଗାଡ଼ି ଆଗକୁ ବଢ଼ି ପାରି ନଥିଲା।

ଜିଲ୍ଲାପାଳ ସଙ୍ଗେସଙ୍ଗେ ଏସ୍‌ପିଙ୍କୁ ଫୋନ୍ କରି ଘଟଣା ବିଷୟରେ ଜଣାଇଥିଲେ। ପୁଲିସ ତୁରନ୍ତ ତଦନ୍ତ ଆରମ୍ଭ କରି ଟ୍ରକ୍‌ର ଡ୍ରାଇଭରକୁ ଗିରଫ କରି ଟ୍ରକ୍‌ଟିକୁ ସିଜ୍ କରିଥିଲା। ଗିରଫ ଟ୍ରକ୍‌ର ଡ୍ରାଇଭରର ନାମ ପ୍ରକାଶ କୋକରେ ବୋଲି ଜଣାପଡ଼ିଛି।

Powered by Froala Editor