ନୂଆଦିଲ୍ଲୀ: ପରିବର୍ତ୍ତିତ ଜୀବନଶୈଳୀ  ଯୋଗୁ ଘରେ ଘରେ ଏବେ ମଧୁମେହ ରୋଗୀ । ଅଧିକାଂଶ ପରିବାରରେ ଏହି ରୋଗ ଏବେ ଦେଖିବାକୁ ମିଳୁଛି । ଏଥିପାଇଁ ଲୋକେ ଅଧିକ ଚିନ୍ତାଗ୍ରସ୍ତ ହୋଇ ଯାଉଛନ୍ତି । ବିଶେଷକରି ଘରଣୀମାନେ ଚିନ୍ତାରେ ପଡ଼ୁଛନ୍ତି । କ’ଣ ରାନ୍ଧିବେ, ତରକାରୀ କିଭଳି କରିବେ ତାହା ବଡ଼ ସମସ୍ୟା ଦେଖା ଦେଇଛି । ଡାକ୍ତର ଓ ବିଶେଷଜ୍ଞମାନେ ମଧ୍ୟ ଏହାକୁ ନେଇ ବିଭିନ୍ନ ଗବେଷଣା ଜାରି ରଖିଛନ୍ତି । ଇତିମଧ୍ୟରେ ଏବେ ସାମ୍ନାକୁ ଆସିଛି ଏକ ନୂଆ ତଥ୍ୟ । କଞ୍ଚା କଦଳୀ ଖାଇଲେ ମଧୁମେହ ରୋଗୀଙ୍କ ପାଇଁ ବେଶ ଲାଭ ଦାୟକ ବୋଲି ଗବେଷଣାରୁ ଜଣାପଡ଼ିଛି । ଏହା ଖାଇଲେ ମଧୁମେହ ରୋଗୀଙ୍କ ଶରୀରରେ କୌଣସି ନକାରାତ୍ମକ ପ୍ରଭାବ ପକାଇ ନଥାଏ । ବ୍ଲଡ୍ ସୁଗାର ମଧ୍ୟ ନିୟନ୍ତ୍ରିତ ରହିବାରେ ଏହା ସହାୟକ ହୋଇଥାଏ ବୋଲି ଡାକ୍ତରମାନେ ଦାବି କରିଛନ୍ତି । ତେଣୁ ପ୍ରତ୍ୟେକ ଦିନ ଖାଇବା ରୁଟିନ୍‌ରେ ଏହା ସାମିଲ କରାଯାଇ ପାରିବ ବୋଲି କୁହାଯାଇଛି । ଏବେ ଆସନ୍ତୁ ଜାଣିବା ଏହା ଖାଇବା ଦ୍ୱାରା କ’ଣ ଲାଭ ମିଳିଥାଏ... 

କଞ୍ଚା କଦଳୀରେ ବହୁମାତ୍ରାରେ ଷ୍ଟାର୍ଚ ରହିଥାଏ । ଯେତେବେଳେ କଦଳୀ ପାଚି ଯାଇଥାଏ ସେତେବେଳେ କଦଳୀରେ ଥିବା ଏହି ଷ୍ଟାର୍ଚ ମିଠାରେ ପରିଣତ ହୋଇଯାଏ । କଞ୍ଚା କଦଳୀରେ ପୋଷକ ତତ୍ତ୍ୱ ଭରପୂର ରହିଥାଏ । ଏଥିରେ ଅନେକ ଫାଇବର, ପୋଟାସିୟମ୍‌, ଭିଟାମିନ୍‌, ମ୍ୟାଗ୍ନେସିୟମ୍‌, କପର ତତ୍ତ୍ୱ ଥାଏ । ଏହାକୁ ଖାଇବା ପରେ ଦୀର୍ଘ ସମୟ ପର୍ଯ୍ୟନ୍ତ କ୍ଷୁଧା ଅନୁଭବ ହୁଏ ନାହିଁ । କାରଣ ଏଥିରେ ପ୍ରଚୁର ଫାଇବର ଥାଏ । ଏହାସହିତ ଯଦି କେହି ମେଦବହୁଳତାର ଶିକାର ହେଉଛନ୍ତି, ତେବେ କଞ୍ଚା କଦଳୀ ଖାଇବା ଲାଭଦାୟକ ହୋଇପାରେ ।

କଞ୍ଚା କଦଳୀରେ ଥିବା ପୁଷ୍ଟିକର ଖାଦ୍ୟର ମଧ୍ୟ ପ୍ରାଇବୋଟିକ୍ ପ୍ରଭାବ ରହିଛି ।  ଏହାର ବ୍ୟବହାର ଫୁସଫୁସରେ ଭଲ ଜୀବାଣୁ ବୃଦ୍ଧି କରେ । କେବଳ ସେତିକି ନୁହେଁ, ଏହା ଖାଇବା ଦ୍ୱାରା ସର୍ଟ ଚେନ୍ ଫ୍ୟାଟି ଏସିଡ୍ ଉତ୍ପାଦନ ବୃଦ୍ଧି ପାଇପାରେ । ଯାହା ହଜମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । କୋଷ୍ଠକାଠିନ୍ୟ ସମସ୍ୟା ମଧ୍ୟ ଦୂର ହୋଇଥାଏ । ରୋଗ ପ୍ରତିରୋଧକ ଶକ୍ତି ବି ବଢ଼େ । ତେଣୁ ପ୍ରତ୍ୟେକ ବ୍ୟକ୍ତି ଏହାକୁ ଖାଇବା ଉଚିତ୍ ବୋଲି ଡାକ୍ତରମାନେ ମତବ୍ୟକ୍ତ କରିଛନ୍ତି । ଏପରିକି ପ୍ରତ୍ୟେକ ଦିନ ଏହାକୁ ଖାଇବାକୁ ପରାମର୍ଶ ଦିଆଯାଇଛି ।

Powered by Froala Editor