ଫ୍ରାନ୍ସର ପ୍ରସିଦ୍ଧ ଜ୍ୟୋତିର୍ବିଦ  ନୂଆ ନୋସ୍ତ୍ରାଦମସ୍‌ ଅନେକ ଭବିଷ୍ୟବାଣୀ କରିଥିଲେ । ତାଙ୍କର ଅଧିକାଂଶ ଭବିଷ୍ୟବାଣୀ ସତ ହୋଇଛି । ବ୍ରିଟେନ୍‌ ରାଣୀ ଏଲିଜାବେଥ୍‌ ଦ୍ୱିତୀୟଙ୍କ ମୃତ୍ୟୁକୁ ନେଇ ସେ କରିଥିବା ଭବିଷ୍ୟବାଣୀ ସତ ହୋଇଛି । ତେବେ ଜ୍ୟୋର୍ତିବିଦ୍‌ଙ୍କ ପ୍ରକୃତ ନାଁ କ୍ରେଗ୍‌ ହାମିଲ୍‌ଟନ୍‌ ପାର୍କର । ରାଣୀଙ୍କ ବିଷୟରେ କରିଥିବା ଭବିଷ୍ୟବାଣୀ ପରେ ତାଙ୍କୁ 'ନୂଆ ନୋସ୍ତ୍ରାଦମସ୍‌' ଭାବେ ପରିଚୟ ମିଳିଥିଲା । ହେଲେ ସେ ଏବେ ଯେଉଁ ନୂଆ ଭବିଷ୍ୟବାଣୀ କରିଛନ୍ତି ତାହା ଅତ୍ୟନ୍ତ ଚିନ୍ତାଜନକ । ଯଦି ଏହି ଭବିଷ୍ୟବାଣୀ ସତ ହୁଏ ତେବେ ବିଶ୍ୱ ଛାରଖାର ହୋଇଯିବ ।

କ୍ରେଗ୍‌ କରିଥିବା ଭବିଷ୍ୟବାଣୀ ମୁତାବକ, ୨୦୨୩ରେ ତୃତୀୟ ବିଶ୍ୱଯୁଦ୍ଧ ଆରମ୍ଭ ହୋଇପାରେ । ତାଇୱାନ୍‌ରେ ଏକ ଭୟାବହ ବିମାନ ଦୁର୍ଘଟଣା ହେବ । ଏହା ତୃତୀୟ ବିଶ୍ୱଯୁଦ୍ଧ ପାଇଁ କ୍ଷେତ୍ର ପ୍ରସ୍ତୁତ କରିବ । ବର୍ତ୍ତମାନ ଚୀନ୍‌ ଓ ତାଇୱାନ୍‌ ମଧ୍ୟରେ ବିବାଦ ଲାଗିରହିଛି । ତାଇୱାନ୍‌ ନିଜକୁ ସ୍ୱତନ୍ତ୍ର ରାଷ୍ଟ୍ର କହୁଥିବା ବେଳେ ଚୀନ୍‌ କିନ୍ତୁ ଏହାକୁ ନିଜର ଅଂଶ ବୋଲି ଦାବି କରିଆସୁଛି । ଆମେରିକା ବି ଏଥିରେ ହସ୍ତକ୍ଷେପ କରୁଛି । ଆମେରିକାର ବରିଷ୍ଠ ନେତାମାନେ ତାଇୱାନ୍‌ ଗସ୍ତ କରି ଏହାକୁ ସହଯୋଗ କରିବାକୁ ପ୍ରତିଶ୍ରୁତି ଦେବା ପରେ ସ୍ଥିତି ଜଟିଳ ହୋଇଥିଲା । ଏବେ ବି ଲାଗିରହିଛି ବିବାଦ ।

ଚୀନ୍‌ ଓ ତାଇୱାନ୍‌ ମଧ୍ୟରେ ହେବାକୁ ଥିବା ସଂଘର୍ଷ ରୁଷ୍‌-ୟୁକ୍ରେନ୍‌ଠାରୁ ଅଧିକ ଭୟଙ୍କର ହେବ । ଚୀନ୍‌ ଅନେକ ଭାଗରେ ଭାଙ୍ଗି ଖଣ୍ଡ ଖଣ୍ଡ ହୋଇଯିବ । ଅନ୍ୟପକ୍ଷରେ ରୁଷ୍‌-ୟୁକ୍ରେନ୍‌ ଯୁଦ୍ଧ ଚାଲିଥିବା ମଧ୍ୟରେ ଅନେକ ବାର ତୃତୀୟ ବିଶ୍ୱଯୁଦ୍ଧ କଥା ଉଠିଲାଣି । ଗୋଟିଏ ପଟେ ନାଟୋ, ଆମେରିକା ଓ ପାଶ୍ଚାତ୍ୟ ରାଷ୍ଟ୍ର ୟୁକ୍ରେନ୍‌ର ସାଥ୍‌ ଦେଉଛନ୍ତି । ସେପଟେ ରୁଷ୍‌କୁ ଏ ପର୍ଯ୍ୟନ୍ତ କୌଣସି ରାଷ୍ଟ୍ର ସିଧାସଳଖ ସହାୟତା ଯୋଗାଇ ନାହାନ୍ତି । ଏହି ବିବାଦ କ୍ରମେ ରାଷ୍ଟ୍ରଗୁଡ଼ିକୁ ଦୁଇଭାଗରେ ବାଣ୍ଟି ତୃତୀୟ ବିଶ୍ୱଯୁଦ୍ଧର କାରଣ ସାଜିବା ନେଇ ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି । ଏହି ଭବିଷ୍ୟବାଣୀକୁ ନେଇ ଏବେ ଚିନ୍ତା ଘାରିଛି ।

Powered by Froala Editor