ଆଉ ପ୍ରସବ ଯନ୍ତ୍ରଣା ସହିହେଉନି । ୧୧ଟି ଛୁଆଙ୍କୁ ଜନ୍ମ କରି ସାରିଲେଣି । ଆଉ କେତେ ଦିନ ଏମିତି ଚାଲିଥାନ୍ତା । ଶେଷରେ ଅସ୍ତ୍ରୋପଚାର କରିଦେଲେ । ହେଲେ ପ୍ରସବ ଯନ୍ତ୍ରଣା ଠୁ ବଳି ଗଲା ସ୍ୱାମୀଙ୍କ ନିର୍ଯାତନା । ପିଲାଙ୍କୁ ଦରି ଘରୁ ବାହର କରିଦେଲେ । କୋଳରେ ମାସକର ଛୁଆ ଟିଏ ମଧ୍ୟ ଅଛି । ତା ମୁହଁକୁ ବି ଚାହିଁଲାନି ନିର୍ଦ୍ଦୟୀ ବାପା । ଏମିତି ନିର୍ଯାତନାର ଚିତ୍ର ଦେଖିବାକୁ ମିଳିଛି କେନ୍ଦୁଝର ଜିଲ୍ଲାର ତେଲକୋଇରେ।

ତେଲକୋଇ ବ୍ଲକ ସଲେଇକେନା ପଞ୍ଚାୟତ ଡ଼ିମିରିଆ ଗ୍ରାମର ରବି ଦେହୁରୀଙ୍କ ସ୍ତ୍ରୀ ଜାନକୀ ଦେହୁରୀଙ୍କର ଇତି ମଧ୍ୟରେ ୧୧ଟି ସନ୍ତାନ ହୋଇ ସାରିଲେଣି। ସେଥିମଧ୍ୟରୁ ଗୋଟିଏ ଛୁଆ ଜନ୍ମ ହେଉ ହେଉ ଆଖି ବୁଜିଥିବା ବେଳେ ଏବେ ତାଙ୍କ ପାଖରେ ୧୦ଟି ଛୁଆ ଅଛନ୍ତି। ଏତେ ଛୁଆଙ୍କ ମୁହଁରେ ଦାନା ଦେବା କାଠିକର ପାଠ ହେଉଥିବା ବେଳେ ଦିନକୁ ଦିନ ଦୁର୍ବଳ ହୋଇ ପଡ଼ୁଛନ୍ତି ଜାନକୀ। ରକ୍ତହୀନତାର ଶିକାର ହୋଇଥିବା ଜାନକୀ ସ୍ୱାମୀଙ୍କ ଅଗୋଚରରେ ଗତ ୧୪ ତାରିଖରେ ତେଲକୋଇରେ ପରିବାର ନିୟୋଜନ ଅସ୍ତ୍ରୋପଚାର କରାଇ ଦେଇଥିଲେ।

ତେବେ ସେ ଘରକୁ ଫେରିବା ପରେ ସ୍ୱାମୀ ଏହା ଜାଣି ପାରି ତାଙ୍କୁ ଘରୁ ତଡ଼ି ଦେଇଛନ୍ତି। ଅସ୍ତ୍ରୋପଚାର କରି ତୁ ଛୁଆଁ ହୋଇଗଲୁ, ତୋ ହାତରୁ ମୋ’ ପୂର୍ବ ପୁରୁଷ ପାଣି ପାଇବେନି। ତେଣୁ ତୁ ଘରେ ରହିବା ଆବଶ୍ୟକତା ନାହିଁ ବୋଲି କହି ଜାନକୀଙ୍କୁ ଘରୁ ତଡ଼ି ଦେଇଛନ୍ତି ରବି। ସ୍ବାମୀ ଘରେ ପୂରାଉ ନ ଥିବାରୁ ୩ ଦିନ ହେଲା ମାସକର ଛୁଆ ଧରି ଘର ବାହାରେ ଥିବା ଆମ୍ବଗଛ ମୂଳରେ ଭୋକଉପାସରେ ଆଶ୍ରୟ ନେଇଛନ୍ତି ଜାନକୀ।

ଏହି ସମ୍ପର୍କୀତ ଖବର ଗଣ ମାଧ୍ୟମରେ ପ୍ରକାଶ ପାଇବା ପରେ ପ୍ରଶାସନର ତପ୍ତରତା ପ୍ରକାଶ ପାଇଛି । ତେଲକୋଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଅଧିକାରୀ ଡାକ୍ତର ପ୍ରିତିଶ ଆଚାର୍ଯ୍ୟଙ୍କ ନିର୍ଦ୍ଦେଶ କ୍ରମେ ସ୍ଥାନୀୟ ସ୍ୱାସ୍ଥ୍ୟ କର୍ମୀ ଅମରଜିତ୍ ସାହୁ ଶ୍ରୀ ଦେହୁରୀ ଙ୍କ ଘରେ ପହଞ୍ଚି ବୁଝା ସୁଝା କରି ଶ୍ରୀମତୀ ଜାନକୀ ଓ ନବ ଜାତକ କୁ ସ୍ବାସ୍ଥ୍ୟ କେନ୍ଦ୍ରରେ ଆଣି ଭର୍ତି କରିଛନ୍ତି । ଉଭୟ କିଛି ଦିନ ଅବଜର ଭେସନ ରେ ରହିବେ ବୋଲି ଜଣା ପଡିଛି । ଅନ୍ୟପଟେ ବ୍ଲକ ପ୍ରଶାସନ ମଧ୍ୟ ଏହି ଘଟଣାର ହସ୍ତକ୍ଷେପ କରିବ ବୋଲି ଜଣା ପଡିଛି ।

Powered by Froala Editor