ରାଜଧାନୀ ଦିଲ୍ଲୀରେ ପୁଣି ହଇଚଇ ସୃଷ୍ଟି କରିଛି ଆଉ ଏକ ଲିଭ୍ ଇନ ପାର୍ଟନର ମର୍ଡର କେସ୍ । ଜଣେ ଯୁବତୀଙ୍କୁ ହତ୍ୟା କରିବା ପରେ ତାର ଶବକୁ ଫ୍ରିଜରେ ଲୁଚାଇ ରଖିଥିଲା ହତ୍ୟାକାରୀ ପ୍ରେମିକ । ଦିଲ୍ଲୀ ପୋଲିସର କହିବା ଅନୁସାରେ, ଉତ୍ତମ ନଗରର ଜଣେ ମହିଳାଙ୍କ ଶବ ନଜଫଗଢ଼ର ମିତ୍ରାଉ ଗାଁର ବାହାରେ ଥିବା ଏକ ଢାବାର ଫ୍ରିଜରୁ ମିଳିଛି । ହତ୍ୟା କରିଥିବା ଯୁବକର ନାଁ ହେଉଛି ସାହିଲ ଗେହଲଟ । ପୋଲିସ ସାହିଲକୁ ଗିରଫ କରିନେଇଛି ।

ସୂଚନାନୁସାରେ, ମୃତ ଯୁବତୀ ଜଣଙ୍କ ହେଲେ ୨୨ ବର୍ଷୀୟ ନିକ୍କି ଯାଦବ। ତାଙ୍କୁ ୨୪ ବର୍ଷୀୟ ସାହିଲ ଗେହଲଟ କଶ୍ମୀର ଗେଟ୍‌ ଆଇଏସବିଟି ନିକଟରେ ତଣ୍ଟି ଚିପି ପ୍ରଥମେ ହତ୍ୟା କରିଥିଲେ। ଫେବୃଆରୀ ୯ ଓ ୧୦ ତାରିଖରେ ହତ୍ୟାକାଣ୍ଡ ଘଟିଥିଲା। ସାହିଲ କାରରେ ଥିବା ମୋବାଇଲ ଡାଟା କେବୁଲକୁ ବ୍ୟବହାର କରି ନିକ୍କିଙ୍କୁ ହତ୍ୟା କରିଥିଲେ।

ହତ୍ୟା କରିବା ପରେ ସେ ନିକ୍କିଙ୍କ ମୃତଦେହକୁ କାର୍‌ ଯୋଗେ ମିତ୍ରାଓଁ ଗାଁ ନିକଟରେ ଥିବା ତାଙ୍କ ଢାବା ନିକଟକୁ ନେଇ ଯାଇଥିଲେ। ସେଠାରେ ଥିବା ଫ୍ରିଜରେ ଏହାକୁ ଲୁଚାଇ ଦେଇଥିଲେ। ଏଥିସହ ଆଉ ଜଣେ ମହିଳାଙ୍କୁ ବିବାହ ମଧ୍ୟ କରି ନେଇଥିଲେ। ତେବେ ନିକ୍କି ନିଖୋଜ ହୋଇଯିବା ଓ ସାହିଲ ଆଉ ଜଣଙ୍କୁ ବିବାହ କରିବା ଘଟଣାକୁ ସ୍ଥାନୀୟ ଅଞ୍ଚଳର ଜଣେ ବ୍ୟକ୍ତି ସହଜରେ ହଜମ କରି ପାରି ନଥିଲେ। ଏଥିପାଇଁ ସେ ପୁଲିସ୍‌କୁ ଖବର ଦେଇଥିଲେ। ପୁଲିସ୍‌ ସାହିଲଙ୍କୁ ଉଠାଇ ଆଣି ଜେରା କରିବାରୁ ସେ ସବୁ ସତ କଥା ମାନି ଯାଇଥିଲେ। ଶେଷରେ ପୁଲିସ ଢାବାର ଫ୍ରିଜ୍‌ରୁ ନିକ୍କିଙ୍କ ମୃତଦେହ ଜବତ କରିବା ସହ ସାହିଲଙ୍କୁ ଗିରଫ କରିଛି।

Powered by Froala Editor