ଅଯୋଧ୍ୟାରେ ପହଞ୍ଚିଲା ଶାଳଗ୍ରାମ ଶିଳା
ରାମନଗରୀ ଅଯୋଧ୍ୟାରେ ଦେବ ଶିଳାର ସତ୍କାର ଓ ସମର୍ପଣ କାର୍ଯ୍ୟକ୍ରମ ହେବ। ଏହି ଅବସରରେ ନେପାଳରୁ ଦୁଇଟି ପୁରାତନ ବିରଳ ପଥର ବୁଧବାର ଅଯୋଧ୍ୟାରେ ପହଞ୍ଚିଛି। ୬୦ ନିୟୁତ ବର୍ଷର ପୁରୁଣା ଏହି ଦୁଇଟି ଶାଳଗ୍ରାମ ଶିଳାକୁ ନେପାଳର ଗଣ୍ଡକୀ ନଦୀରୁ ବାହାର କରାଯାଇଥିଲା। ଲମ୍ବା ଯାତ୍ରା ପରେ ବୁଧବାର ରାତିରେ ଅଯୋଧ୍ୟ ପହଞ୍ଚିଛି। ଏହି ବିରଳ ପଥରରେ ଭଗବାନ ରାମଙ୍କ ମୂର୍ତ୍ତି ଖୋଦିତ ହୋଇ ଏଠାରେ ଖଞ୍ଜାଯିବ।
ନେପାଳରୁ ରାମ ନଗରୀ ପର୍ଯ୍ୟନ୍ତ ଯାତ୍ରାରେ ଶିଳା ଯେଉଁ ବାଟ ଦେଇ ଯାଇଛି ଲୋକଙ୍କର ଭିଡ ଦେଖିବାକୁ ମିଳିଛି। ନେପାଳର ଗଣ୍ଡକୀ ନଦୀରୁ ବାହାର କରାଯାଇଥିବା ଏହି ଦିବ୍ୟ ଶିଳାକୁ ଜାନକୀ ମନ୍ଦିରରେ ପୂଜା କରାଯାଇଛି। ଏହାପରେ ତାକୁ ଭାରତ ଅଭିମୁଖେ ଅଣାଯାଇଥିଲା। ଭାରତ-ନେପାଳ ସୀମାରେ ଏହାକୁ ଦର୍ଶନ ପାଇଁ ଖୁବ୍ ଭିଡ ଦେଖିବାକୁ ମିଳିଥିଲା।
ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ଦାୟିତ୍ୱରେ ଥିବା ପ୍ରକାଶ ଗୁପ୍ତା କହିଛନ୍ତି ଯେ, ଏହି ଦୁଇ ବିରାଟ ପଥରରେ ଶ୍ରୀରାମଙ୍କ ଶିଶୁ ରୂପର ମୂର୍ତ୍ତି ଖୋଦେଇ ହେବ। ଏହି ପଥରରୁ ଖୋଦିତ ତାଙ୍କ ଶିଶୁ ରୂପରେ ପ୍ରଭୁ ରାମଙ୍କ ପ୍ରତିମା ଆସନ୍ତା ବର୍ଷ ଜାନୁଆରୀ ମକର ସଙ୍କ୍ରାନ୍ତି ପର୍ବରେ ପ୍ରସ୍ତୁତ ହେବାର ଆଶା କରାଯାଉଛି।
Powered by Froala Editor
