ନୂଆଦିଲ୍ଲୀ:କିଛି ସମୟର ପ୍ରତୀକ୍ଷା । ଆସିବ କେନ୍ଦ୍ରୀୟ ବଜେଟ ୨୦୨୩ । ମୋଦୀ ସରକାରଙ୍କ ଦ୍ୱିତୀୟ ପାଳିର ଶେଷ ପୂର୍ଣ୍ଣାଙ୍ଗ ବଜେଟ ଆସିବ ।  ୨୦୨୪ ସାଧାରଣ ନିର୍ବାଚନ ଥିବାରୁ ଏହା ଶେଷ ପୂର୍ଣ୍ଣାଙ୍ଗ ବଜେଟ । ତେବେ ଏହା ପୂର୍ବରୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ରାଷ୍ଟ୍ରପତି ଭବନରେ ପହଞ୍ଚିଥିଲେ ।  ସେଠାରେ ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଥିଲେ । ବଜେଟକୁ ରାଷ୍ଟ୍ରପତି ମଞ୍ଜୁରୀ ଦେଇଛନ୍ତି । ଆଉ ତା’ପରେ  ଅର୍ଥମନ୍ତ୍ରୀ ନିର୍ମଳା ସୀତାରମଣ ସଂସଦରେ ପହଞ୍ଚିଥିବା ଜଣାଯାଇଛି ।   ଦିନ ୧୧ଟାରେ ସଂସଦରେ ଅର୍ଥମନ୍ତ୍ରୀ ସାଧାରଣ ବଜେଟ ଉପସ୍ଥାପନ କରିବେ । 

ଏହି ବଜେଟରେ କେନ୍ଦ୍ର ସରକାର ସବୁ ବର୍ଗର ବ୍ୟକ୍ତିଙ୍କୁ ଖୁସି କରିବାକୁ ଚେଷ୍ଟା କରିପାରନ୍ତି ।  ମଧ୍ୟବିତ୍ତ ଶ୍ରେଣୀର ଲୋକଙ୍କ ପାଇଁ ଟିକସ ରିହାତି ସମ୍ଭାବନା ରହିଛି ।  ଗ୍ରାମୀଣ ନିଯୁକ୍ତି ଓ ଗୃହ ନିର୍ମାଣ ଆଦିକୁ ପ୍ରାଧାନ୍ୟ ମିଳିପାରେ ବୋଲି କୁହାଯାଉଛି । 

ଅନ୍ୟପକ୍ଷରେ ବଜେଟ ପୂର୍ବରୁ ଷ୍ଟକ ମାର୍କେଟରେ ଉତ୍ସାହ ଦେଖିବାକୁ ମିଳିଛି । ସେନସେକ୍ସ ୪୦୦ ପଏଣ୍ଟରୁ ଅଧିକ ବଢିଛି ।  ସେହିପରି ଏନଏସଇ ନିଫ୍ଟି ୧୦୬ ପଏଣ୍ଟ ବଡି ୧୭, ୭୬୮ରେ ପହଞ୍ଚିଛି । 

ଚଳିତ ବର୍ଷର ବଜେଟ୍ ଅଧିବେଶନ ଗତକାଲିଠୁ ଆରମ୍ଭ ହୋଇଥିବା ବେଳେ ଏପ୍ରିଲ୍ ୬ ପର୍ୟ୍ୟନ୍ତ ୨୭ଟି ବୈଠକ ଅନୁଷ୍ଠିତ ହେବ । । ଯେଉଁଥିରେ ବଜେଟ୍ କାଗଜପତ୍ର ଯାଞ୍ଚ ପାଇଁ ଏକ ମାସର ବିରତି ରହିବ। ଅଧିବେଶନର ପ୍ରଥମ ଭାଗ ଫେବୃଆରୀ ୧୩ ରେ ଶେଷ ହେବ । ବଜେଟ୍ ଅଧିବେଶନର ଦ୍ୱିତୀୟ ଭାଗ ମାର୍ଚ୍ଚ ୧୨ରୁ ଆରମ୍ଭ ହୋଇ ଏପ୍ରିଲ୍ ୬ରେ ଶେଷ ହେବ।

Powered by Froala Editor