ଭାରତ ଯାଡ଼ୋ ଯାତ୍ରାର ଶେଷ ଦିନରେ ଶ୍ରୀନଗରରେ ପ୍ରବଳ ତୁଷାରପାତ ହୋଇଛି। ଏହି ସମୟରେ ଏକ ସୁନ୍ଦର ଦୃଶ୍ୟ ଦେଖିବାକୁ ମିଳିଥିଲା। ରାହୁଲ ଗାନ୍ଧି ତାଙ୍କ ଭଉଣୀ ପ୍ରିୟଙ୍କା ଗାନ୍ଧିଙ୍କ ସହିତ ବରଫରେ ଖେଳୁଥିବା ନଜର ଆସିଛନ୍ତି। ଏଥିସହିତ ପ୍ରିୟଙ୍କା ବି ତୁଷାରପାତର ଖୁବ ମଜା ଉଠାଇଛନ୍ତି। ସେମାନେ ପରସ୍ପର ଉପରକୁ ବରଫ ଫିଙ୍ଗି ବେଶ୍‌ ମଜା ଉଠାଇଛନ୍ତି। ଏହା ବ୍ୟତୀତ ଅନ୍ୟ ପଥଚାରୀମାନେ ମଧ୍ୟ ତୁଷାରପାତକୁ ଉପଭୋଗ କରିଥିଲେ।

ତାମିଲନାଡ଼ୁର କନ୍ୟାକୁମାରୀରେ ଆରମ୍ଭ ହୋଇଥିବା ଯାତ୍ରା ୧୪୫ଦିନରେ ୧୨ଟି ରାଜ୍ୟ ଓ ଦୁଇଟି କେନ୍ଦ୍ରଶାସିତ ଅଞ୍ଚଳ ଦେଇ ପାଖାପାଖି ୪୦୮୦କିଲୋମିଟର ପରିକ୍ରମା କରି ଜମ୍ମୁ-କଶ୍ମୀରର ରାଜଧାନୀ ଶ୍ରୀନଗରରେ ପହଞ୍ଚିଥିଲା। ଏଠାରେ ରାହୁଲ ଗାନ୍ଧି ଐତିହାସିକ ଲାଲ ଚୌକ ଯାଇ ତ୍ରିରଙ୍ଗା ଉଡ଼ାଇଥିଲେ। ଆଉ କହିଥିଲେ ଭାରତକୁ ଦେଇଥିବା ପ୍ରତିଶ୍ରୃତି ପୂରା ହୋଇଯାଇଛି। ଏହି ଯାତ୍ରାକୁ ସେ ତାଙ୍କ ଜୀବନର ସବୁଠାରୁ ଗଭୀର ଓ ସୁନ୍ଦର ଅନୁଭବ ବୋଲି କହିଛନ୍ତି।

ପତାକା ଉତ୍ତୋଳନ ସମୟରେ କଂଗ୍ରେସ ନେତା ମଲ୍ଲିକାର୍ଜୁନ ଖର୍ଗେ, ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ବହୁ ଦଳୀୟ କର୍ମୀ ଉପସ୍ଥିତ ଥିଲେ। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖର୍ଗେ କଂଗ୍ରେସ ମୁଖ୍ୟାଳୟରେ ଜାତୀୟ ପତାକା ଉଡ଼ାଇବା ସହ ଭାରତ ଯୋଡ଼ୋ ଯାତ୍ରା ସ୍ମାରକର ଉଦ୍‌ଘାଟନ କରିଥିଲେ। ପରେ ଏସ୍‌କେ ଷ୍ଟାଡିୟମରେ ଏକ ଜନସଭାର ଆୟୋଜନ କରାଯାଇଥିଲା।

Powered by Froala Editor