ଭୁବନେଶ୍ୱର: ଶୀତ ଗାଏବ । ଗରମ ମାଡ଼ି ଆସିଲାଣି । ଦିନରେ ଟାଏଁ ଟାଏଁ ଖରା, ରାତିରେ ବି ବିନା ପଙ୍ଖାରେ ନିଦ ହେଉନି । ମାଘ ମାସରେ ଏମିତି ଅସ୍ୱାଭାବିକ ଗରମ ନାକେଦମ କଲାଣି । ଏବେଠାରୁ ଦିନ ତାପମାତ୍ରା ୩୫ ଡିଗ୍ରୀ ସେଲସିୟସ ଛୁଇଁଲାଣି । ଆଗକୁ କିଭଳି ଅସହ୍ୟ ଗରମ ହେବ, ତାହାକୁ ନେଇ ଚିନ୍ତା ବଢ଼ିଲାଣି ।
ଆଞ୍ଚଳିକ ପାଣିପାଗ କେନ୍ଦ୍ରର ସୂଚନା ମୁତାବକ, ଶୁକ୍ରବାର ରାଜ୍ୟର ୧୧ଟି ସ୍ଥାନରେ ଦିନର ସର୍ବୋଚ୍ଚ ତାପମାତ୍ରା ୩୩ ଡିଗ୍ରୀ କିମ୍ବା ତା’ଠାରୁ ଅଧିକ ଥିଲା । ବୌଦ୍ଧ ତାପମାତ୍ରା ୩୫ ଡିଗ୍ରୀ ରେକର୍ଡ ହୋଇଛି । ଚଳିତବର୍ଷ ଏଯାବତ ଏହା ରାଜ୍ୟରେ ସର୍ବାଧିକ ଦିନ ତାପମାତ୍ରା । ଅନ୍ୟ ସହର ମଧ୍ୟରେ ତାଳଚେର ୩୪.୪, ଭୁବନେଶ୍ୱର ୩୪, ଗୋପାଳପୁର ୩୩.୮, ଝାରସୁଗୁଡ଼ା ୩୩.୬, ଟିଟିଲାଗଡ଼ ୩୩.୫, ସୁନ୍ଦରଗଡ଼ ୩୩.୩, ମାଲକାନଗିରି ୩୩, ଅନୁଗୁଳ ୩୩.୧, ନବରଙ୍ଗପୁର ୩୩, ପୁରୀ ୩୩, ମାଲକାନଗିରି ୩୩ ଡିଗ୍ରୀ ସେଲସିୟସ୍‌ ରେକର୍ଡ ହୋଇଛି । ଭୁବନେଶ୍ୱରରେ ଜାନୁଆରୀ ୨୬ ତାରିଖରେ ମଧ୍ୟ ପାରଦ ୩୪ ଡିଗ୍ରୀ ଅତିକ୍ରମ କରିଥିଲା ।

ଆଞ୍ଚଳିକ ପାଣିପାଗ କେନ୍ଦ୍ର ବୈଜ୍ଞାନିକ ଉମାଶଙ୍କର ଦାସଙ୍କ କହିବାନୁଯାୟୀ ବର୍ତ୍ତମାନ ଭୁବନେଶ୍ୱର ସମେତ ପ୍ରାୟତଃ ଦିନ ତାପମାତ୍ରା ସ୍ୱାଭାବିକଠାରୁ ୩-୪ ଡିଗ୍ରୀ ଅଧିକ ରହୁଛି । କେବଳ ଦିନ ନୁହେଁ, ରାତିବେଳା ତାପମାତ୍ରା ମଧ୍ୟ ସ୍ୱାଭାବିକ ଠାରୁ ୩-୪ ଡିଗ୍ରୀ ଉପରେ ରହୁଛି । ଏଥିଯୋଗୁ ଗରମ ଅନୁଭୂତ ହେଲାଣି । ବର୍ତ୍ତମାନ ପାଗରେ ବିଶେଷ ପରିବର୍ତ୍ତନ ସମ୍ଭାବନା ନାହିଁ । ତେଣୁ ଏଭଳି ସ୍ଥିତି ପ୍ରାୟତଃ ଜାରି ରହିବ । 

Powered by Froala Editor