ଆଉ ଯୁଦ୍ଧ ଚାହୁଁନାହିଁ ପାକିସ୍ତାନ: ଶହବାଜ୍ ସରିଫ୍
ନୂଆଦିଲ୍ଲୀ: ନଇଁଲା ପାକିସ୍ତାନର ମୁଣ୍ଡ। ଆତଙ୍କବାଦକୁ ସମର୍ଥନ ଓ ଆର୍ଥିକ ମାନ୍ଦାବସ୍ଥାକୁ ନେଇ ଉଚିତ୍ ଶିକ୍ଷା ପାଇଛି ପାକିସ୍ତାନ । ଆରବ ରାଷ୍ଟ୍ର ପରିଷଦ ମାଧ୍ୟମରେ ସହଯୋଗ ପାଇଁ ଭାରତକୁ ଗୁହାରି କରିଛି । ଭାରତ ସହିତ ବନ୍ଧୁତ୍ବ ଓ ଶାନ୍ତି ଚାହୁଛନ୍ତି ବୋଲି ପ୍ରଧାନମନ୍ତ୍ରୀ ଶହବାଜ୍ ସରିଫ୍ କହିଛନ୍ତି ।
ପାକିସ୍ତାନ ପ୍ରଧାନମନ୍ତ୍ରୀ ଶହବାଜ୍ ସରିଫ୍ ଏକ ଆରବ ଦେଶ ଗଣମାଧ୍ୟମକୁ ସାକ୍ଷାତକାର ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭୁରି ଭୁରି ପ୍ରଶଂସା କରିଛନ୍ତି । ସଚ୍ଚୋଟତାର ସହିତ ମୋଦିଙ୍କ କଥାବାର୍ତ୍ତା କରିବା ପାଇଁ ଇଚ୍ଛା ପ୍ରକାଶ କରିଛନ୍ତି । ସେ କହିଛନ୍ତି, ଭାରତ ବିପକ୍ଷରେ ତିନି ତିନୋଟି ଯୁଦ୍ଧ କରି ଶିକ୍ଷା ପାଇଛୁ । ଯୁଦ୍ଧ ପାଇଁ ପାକିସ୍ତାନରେ ଗରିବୀ ଓ ବେରୋଜଗାର ବଢ଼ିଛି । ଆଉ ପାକିସ୍ତାନ ଯୁଦ୍ଧ ଚାହୁଁନାହିଁ । ପାକିସ୍ତାନ-ଭାରତ ମଧ୍ୟରେ ରହିଥିବା ଅନେକ ଗମ୍ଭୀର ମାମଲାକୁ ଟେବୁଲରେ ବସି ସାମ୍ନାସାମ୍ନି ସମାଧାନ କରିବାକୁ ଚାହୁଁଛୁ ବୋଲି କହିଛନ୍ତି ସରିଫ୍ ।
କାଶ୍ମୀର ଭଳି ଗମ୍ଭୀର ମାମଲାକୁ ଟେବୁଲ ଉପରକୁ ଆଣିବାକୁ ଆରବ ରାଷ୍ଟ୍ର ପରିଷଦ ମାଧ୍ୟମରେ ଗୁହାରୀ କରିଛନ୍ତି । କାଶ୍ମୀର ମାମଲାରେ ଭାରତ ସହିତ ଚର୍ଚ୍ଚା କରିବାକୁ ଚାହୁଁଛନ୍ତି ବୋଲି ସରିଫ୍ କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସାମ୍ନାରେ ଏହାର ସମାଧାନର ସୂତ୍ର ବାହାରିବା ଦରକାର । ପାକିସ୍ତାନ ପ୍ରସ୍ତୁତ ରହିଛି, ଏନେଇ ଭାରତ ବିଶ୍ବକୁ ସକରାତ୍ମକ ସନ୍ଦେଶ ଦେବା ଆବଶ୍ୟକ ବୋଲି ସରିଫ୍ କହିଛନ୍ତି ।
କାଶ୍ମୀର ମାମଲାରେ ଭାରତକୁ ସବୁବେଳେ ପରମାଣୁ ଅସ୍ତ୍ର ପ୍ରୟୋଗର ଧମକ ଦେଇଥିବା ପାକିସ୍ତାନର ସ୍ବରରେ ନରମ ହୋଇଛି । ବର୍ତ୍ତମାନ ସମୟରେ ଆତଙ୍କବାଦ ଓ ଆର୍ଥିକ ସଂକଟରେ ଜୁଝି ହେଉଛି ପାକିସ୍ତାନ । ଦେଶରେ ବିଦେଶୀ ମୁଦ୍ରା ଭଣ୍ଡାର ଶୂନ୍ୟ ହୋଇଛି । ମହଙ୍ଗା ମାଡ଼ରେ ଭାଜି ହେଉଛନ୍ତି ଦେଶବାସୀ । ଦୁଇ ଦେଶ ପରମାଣୁ ସମ୍ପନ୍ନ । ଭୂଲରେ ବି ଏହାର ବ୍ୟବହାର ହେଲେ,ଉଭୟ ଦେଶ ମଧ୍ୟରେ କ’ଣ ହୋଇଥିଲା ଦେଖିବାକୁ କେହି ନଥିବେ । ତେଣୁ ଭାରତ ପଡୋଶୀ ଦେଶ ଭାବେ ପାକିସ୍ତାନର ସଂକଟ ସମୟରେ ସହଯୋଗ କରିବା ପାଇଁ ଗୁହାରି କରିଛନ୍ତି ।
Powered by Froala Editor