ଚାଲିଗଲେ ତବସୁମ୍
ଲୋକପ୍ରିୟ ଅଭିନେତ୍ରୀ ତବସୁମ ଗୋଭିଲ୍ଙ୍କର ପରଲୋକ ହୋଇଛି। ୭୮ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି ତବସୁମ। ଶୁକ୍ରବାର ତାଙ୍କର ଦେହାନ୍ତ ହୋଇଥିଲେ ମଧ୍ୟ ଆଜି ଖବର ସାମ୍ନାକୁ ଆସିଛି। ଆସନ୍ତା ୨୧ ତାରିଖରେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇବାକୁ ଗୋଟିଏ ପ୍ରାର୍ଥନା ସଭା ମୁମ୍ବାଇରେ ଆୟୋଜିତ ହେବ।
ତାଙ୍କ ପୁଅ କହିଛନ୍ତି, “ମା’ ସୁସ୍ଥ ଥିଲେ। ହଠାତ ଏମିତି ଘଟଣା ଘଟଣା ଘଟିଛି। ଶୁକ୍ରବାର ରାତି ପ୍ରାୟ ୮.୪୦ରେ ତାଙ୍କ ଦେହାନ୍ତ ହୋଇଛି। ହସ୍ପିଟାଲରେ ହୃଦଘାତ ଯୋଗୁ ସେ ଆଖି ବୁଜିଛନ୍ତି। ୧୦ ଦିନ ତଳେ ସେ ଶୁଟିଂ ସେଟକୁ ଯାଇଥିଲେ। ଆସନ୍ତା ସପ୍ତାହରେ ପୁଣି ଶୁଟିଂ ହେବାର ଥିଲା। ସବୁ କିଛି ହଠାତ୍ ହୋଇ ଯାଇଛି। ତାଙ୍କର ଗ୍ରାଷ୍ଟ୍ରୋ ସମସ୍ୟା ଥିଲା। କିଛି ଦିନ ସେ ଏଥିପାଇଁ ହସ୍ପିଟାଲ ଯାଇଥିଲେ। ଏହାପରେ ଡିସଚାର୍ଜ ହୋଇଥିଲେ। ଗତକାଲି ସେ ଅସୁସ୍ଥ ଅନୁଭବ କରିବାରୁ ପୁଣି ହସ୍ପିଟାଲରେ ତାଙ୍କୁ ଭର୍ତ୍ତି କରାଯାଇଥିଲା। ୨ ମିନିଟ୍ ଭିତରେ ୨ଟି ହୃଦଘାତ ହେବାରୁ ତାଙ୍କ ମୃତ୍ୟୁ ଘଟିଛି।”
ତବସୁମ ୧୯୪୭ ମସିହାରେ ମୁକ୍ତିଲାଭ କରିଥିବା ଫିଲ୍ମ “ମେରା ସୁହାଗ”ରେ ଏକ ଶିଶୁ କଳାକାର ଭାବରେ ନିଜର ଫିଲ୍ମ କ୍ୟରିୟର ଆରମ୍ଭ କରିଥିଲେ। ପରେ ସେ ଅନେକ ଫିଲ୍ମ ଓ ଟିଭି ଶୋ’ରେ ଅଭିନୟ କରି ଲୋକପ୍ରିୟତା ସାଉଁଟିଥିଲେ।
ତବସୁମଙ୍କର ଅନ୍ତିମ ଇଚ୍ଛା ଥିଲା ଯେ ତାଙ୍କ ମରଶରୀରକୁ ସମାଧି ଦେବା ପୂର୍ବରୁ ତାଙ୍କ ମୃତ୍ୟୁ ଖବର କାହାକୁ ଦିଆ ନଯାଉ। ପରିବାର ଲୋକେ ସେୟା ହିଁ କରିଥିଲେ। ତାଙ୍କର ଅନ୍ତିମ ସଂସ୍କାର ପରେ ମୃତ୍ୟୁ ନେଇ ଗଣମାଧ୍ୟମକୁ ଅବଗତ କରାଯାଇଥିଲା।ଆଜି ମୁମ୍ବାଇରେ ତାଙ୍କର ଅନ୍ତିମ ସଂସ୍କାର କରାଯାଇଛି।
Powered by Froala Editor
