ପଦ୍ମ ଭୂଷଣ ପୁରସ୍କାର ପ୍ରାପ୍ତ ସାମାଜିକ କର୍ମୀ (ମହିଳା ଅଧିକାର କର୍ମୀ) ଇଲା ଭଟ୍ଟଙ୍କ ପରଲୋକ ଘଟିଛି। ଆଜି ୮୯ ବର୍ଷ ବୟସରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ମହିଳା ସଶକ୍ତିକରଣରେ ଇଲା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ଗାନ୍ଧିବାଦ ନୀତି ପାଇଁ ପରିଚିତ ଇଲା ସବୁବେଳେ ମହିଳାଙ୍କ ଆର୍ଥିକ ସଶକ୍ତୀକରଣ ଦିଗରେ ଓକିଲାତି କରୁଥିଲେ। ଭାରତରେ ସେ ମହିଳାଙ୍କ ପାଇଁ ସେବା ନାଁରେ ଗୋଟିଏ ସଂସ୍ଥା ପ୍ରତିଷ୍ଠା କରିବା ସହ ଏହାର ମୁଖ୍ୟ ଭାବେ କାମ କରୁଥିଲେ। ମହିଳାଙ୍କୁ ଆର୍ଥିକ ସ୍ୱାବଲମ୍ବୀ ଓ ସଶକ୍ତୀକରଣ କରିବାକୁ ଇଲା ୧୯୭୩ ମହାରେ ପ୍ରଥମ ମହିଳା ବ୍ୟାଙ୍କ ପ୍ରତିଷ୍ଠା କରିଥିଲେ। ଏହାର ନାଁ କପୋରେଟିଭ ବ୍ୟାଙ୍କ ଅଫ ସେବା ରହିଥିଲା। ସେହିପରି ୧୯୭୯ରେ ପ୍ରଥମ ମହିଳା ବିଶ୍ୱ ବ୍ୟାଙ୍କ ଗଠନ କରିଥିଲେ।

କମ୍ୟୁନିଟି ଲିଡର୍ସଶିପ ପାଇଁ ତାଙ୍କୁ ୧୯୭୭ରେ ରାମନ ମ୍ୟାଗସେସେ ପୁରସ୍କାର, ୧୯୮୫ରେଭାରତର ୪ର୍ଥ ସର୍ବୋଚ୍ଚ ବେସାମାରିକ ସମ୍ମାନ ପଦ୍ମଶ୍ରୀ ମିଳିଥିଲା। ୧୯୮୬ରେ ରାଇଟ ଲାଇଭଲିହୁଡ ଆୱାର୍ଡ ଏବଂ ପଦ୍ମ ଭୂଷଣ ସମ୍ମାନରେ ସମ୍ମାନିତ କରାଯାଇଥିଲା। ବିଭନ୍ନ ଉଦ୍ୟୋଗ ଜରିଆରେ ମହିଳାଙ୍କୁ ସ୍ୱାବଲମ୍ବୀ କରିବାକୁ ସେ ଉଦ୍ୟମ କରୁଥିବାରୁ ତାଙ୍କୁ ୨୦୧୧ରେ ଗାନ୍ଧି ଶାନ୍ତି ପୁରସ୍କାର ମିଳିଥିଲା।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇଲା ଭଟ୍ଟଙ୍କ ମୃତ୍ୟୁରେ ସମବେଦନା ଜଣାଇଛନ୍ତି। ପ୍ରଧାନମନ୍ତ୍ରୀ ଟୁଇଟ କରି ଲେଖିଛନ୍ତି, ଇଲା ଭଟ୍ଟଙ୍କ ପରଲୋକ ବିଷୟରେ ଜାଣି ଦୁଃଖିତ।

Powered by Froala Editor