ଭୁବ‌େ‌ନଶ୍ବର: ନଭେମ୍ବର ୩୦ରୁ ଡିସେମ୍ବର ୪ ତାରିଖ ଯାଏଁ ଭୁବନେଶ୍ବରରେ ମେକ୍ ଇନ୍ ଓଡ଼ିଶା କନକ୍ଳେଭ୍ ଆୟୋଜିତ ହେବ । ଏଥିରେ ଭାଗନେବାକୁ ନିବେଶକଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ଆମନ୍ତ୍ରଣ କରୁଛନ୍ତି । ଏହିକ୍ରମରେ ଆସନ୍ତା ୧୭ ତାରିଖରେ ହାଇଦ୍ରାବାଦରେ ଓଡ଼ିଶା ନିବେଶକ ସମ୍ମିଳନୀ ଅନୁଷ୍ଠିତ ହେବ । ଏଥିରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଯୋଗଦେବା ସହ ପୁଞ୍ଜିପତିଙ୍କୁ ଓଡ଼ିଶାରେ ନିବେଶ ପାଇଁ ନିମନ୍ତ୍ରଣ କରିବେ । ଆଜି ମୁଖ୍ୟମନ୍ତ୍ରୀଙ୍କ ଜନ୍ମଦିନ ହୋଇଥିଲେ ହେଁ ସେ ହାଇଦ୍ରାବାଦ ଗସ୍ତରେ ଯିବେ । ସେଠାରୁ ୧୮ ତାରିଖରେ ସେ ମୁମ୍ବଇ ଯିବାର କାର୍ୟ୍ୟକ୍ରମ ରହିଛି । ମିଳିଥିବା ସୂଚନା ଅନୁସାରେ, ରବିବାର ଦିନ ୨ଟାରେ ମୁଖ୍ୟମନ୍ତ୍ରୀ ହାଇଦ୍ରାବାଦ  ଅଭିମୁଖେ ଗସ୍ତ କରିବେ । ସୋମବାର ଦିନ ହାଇଦ୍ରାବାଦ ତାଜ୍ କ୍ରିଷ୍ଣା ହୋଟେଲରେ ଆୟୋଜିତ ହେବାକୁ ଥିବା ଓଡ଼ିଶା ନିବେଶକ ସମ୍ମିଳନୀରେ ସେ ଯୋଗଦେଇ ଶିଳ୍ପପତିଙ୍କ ସହ ୱାନ୍ ଟୁ ୱାନ୍ ଆଲୋଚନା କରିବେ । ୧୮ ତାରିଖ ପୂର୍ବାହ୍ନ ୯ଟା ୨୫ ମିନିଟରେ ହାଇଦ୍ରାବାଦରୁ ମୁଖ୍ୟମନ୍ତ୍ରୀ ମୁମ୍ବଇ ଗସ୍ତ କରିବେ । ୧୯ ତାରିଖ ମୁମ୍ବଇସ୍ଥିତ ଓଡ଼ିଶା ଭବନର ସମ୍ପ୍ରସାରଣ ପାଇଁ ମୁଖ୍ୟମନ୍ତ୍ରୀ ଭିତ୍ତିପ୍ରସ୍ତର ସ୍ଥାପନ କରିବେ । ସେଠାରେ କାର୍ୟ୍ୟକ୍ରମ ସାରି ସେହିଦିନ ସନ୍ଧ୍ୟାରେ ଭୁବନେଶ୍ବର ଫେରି ଆସିବାର କାର୍ୟ୍ୟକ୍ରମ ରହିଛି।

Powered by Froala Editor