କରଜ ନସୁଝିପାରବାରୁ ବିଜେପିର ଜଣେ ଦୃଢ଼ ସମର୍ଥକ ଗୋଟିଏ ଘରେ ୧୬ ଜଣ ଦଳିତ ବର୍ଗର ଲୋକଙ୍କୁ ବନ୍ଦ କରି ରଖି ନିର୍ଯାତନା ଦେଇଥିବା ଅଭିଯୋଗ ହୋଇଛି। ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କର୍ଣ୍ଣାଟକର ଚିକ୍କାମଗାଲୁରୁ ଅଞ୍ଚଳରେ । ଜଗଦେଶ ଗୌଡ଼ ନାମକ ଜଣେ ବିଜେପି ସମର୍ଥକ ଏପରି କାଣ୍ଡ ଘଟାଇଛି । ବନ୍ଦ ହୋଇ ରହିବା ଫଳରେ ଜଣେ ଗର୍ଭବତୀଙ୍କ ପେଟରେ ହିଁ ଶିଶୁଟି ମରି ଯାଇଛି ।

ସୂଚନା ମୁତାବକ ନିର୍ଯାତିତମାନେ ଜଣେ ଜଣେ ଦିନ ମଜୁରିଆ । ସେମାନେ କଫି କ୍ଷେତରେ କାମ କରିଥାନ୍ତି । ସେମାନେ କ୍ଷେତ ମାଲିକ ଜଗଦେଶ ଠାରୁ ୯ ଲକ୍ଷ ଟଙ୍କା କରଜ ନେଇଥିଲେ । ହେଲେ ସେମାନେ ଟଙ୍କା ନଫେରାଇବାରୁ ସେମାନଙ୍କୁ ବନ୍ଦ କରିଦେଇଥିଲା ମାଲିକ । ଅକ୍ଟୋବର ୮ରେ କିଛି ନିର୍ଯ୍ୟାତିତ ପୋଲିସ୍‌ ଥାନାକୁ ଆସି ଜଗଦେଶ ନାମରେ ଏଫ୍‌ଆଇଆର୍‌ ଦେଇଥିଲେ । ହେଲେ ତା ପରଦିନ ସେମାନେ ଏଫ୍‌ଆଇଆର୍‌ ଉଠାଇ ନେଇଥିବା ପୋଲିସ୍‌ ଅଧିକାରୀଙ୍କ ପକ୍ଷରୁ ଜଣାପଡ଼ିଛି ।

ପୀଡ଼ିତମାନେ କହିଛନ୍ତି ଯେ ସେମାନଙ୍କୁ ବନ୍ଦୀ କରି ମାଡ଼ ମରାଯାଉଥିଲା। ସେମାନଙ୍କ ମଧ୍ୟରେ ଜଣେ ଗର୍ଭବତୀ ଥିଲେ। ମାଡ଼ ଓ ନିର୍ଯାତନା ଯୋଗୁ ସେ ନିଜର ସନ୍ତାନକୁ ହରାଇଛନ୍ତି। ଘଟଣା ସାମ୍ନାକୁ ଆସିବା ପରେ ପୁଲିସ୍‌ ମାମଲା ରୁଜୁ କରିଛି ଓ ସମସ୍ତଙ୍କୁ ଉଦ୍ଧାର କରିଛି। ସେହିପରି ଗର୍ଭବତୀଙ୍କ ଅବସ୍ଥା ଭଲ ନଥିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।

ପୁଲିସ୍‌ କହିଛି ଯେ ଜଗଦୀଶ ଗୌଡ଼ା ଓ ତାଙ୍କ ପୁଅ ତିଲକ ଗୌଡ଼ାଙ୍କ ନାଁରେ ମାମଲା ରୁଜୁ ହୋଇଛି। ତେବେ ସେମାନେ ଫେରାର ଅଛନ୍ତି। ସେମାନଙ୍କୁ ଧରିବା ପାଇଁ ଉଦ୍ୟମ ଜାରି ରହିଛି।

Powered by Froala Editor